غزہ حملے - مسلمانوں پر مظالم کی قیامت

طلوعِ اسلام کے بعد سے اب تک اہلِ کتاب (یہود و نصاریٰ) کے ساتھ ویسے تو مسلمانوں کی سینکڑوں جنگیں ہوئیں لیکن فلسطین (القدس) جو کہ تینوں آفاقی مذاہب کا مرکز ہونے کا منفرد درجہ رکھتا ہے ، مذہب کے نام پر لڑی جانے والی جنگوں کا مرکز رہا اور نجانے کب تک رہے گا۔

موجودہ جنگ بھی اہلِ مغرب کی طرف سے لڑی جانے والی صلیبی جنگ ہے ۔۔۔ لیکن فرق یہ ہے کہ مسلمان منتشر ہونے کی وجہ سے اس کا جواب دینے کے اہل نہیں ورنہ تو مسلمانوں کا بچہ بچہ جانتا ہے کہ یہ جنگ عرب-اسرائیل جنگ نہیں بلکہ عالمِ اسلام کے خلاف لڑی جانے والی جنگ ہے اور اسے تمام اسلام دشمنوں کی مکمل حمایت حاصل ہے۔

یہ بات سمجھ سے بالاتر ہے کہ مسلمان امت کیونکر اس بدترین ذلت پر خاموش ہے؟
ایک ایسی امت جو اتنا تابناک ماضی رکھتی ہے کہ روئے زمین پر اگر کہیں سے بھی ایک فرد کی بھی فریاد اس تک پہنچتی تھی تو کہیں محمد بن قاسم اور کہیں طارق بن زیاد بن کر پہنچ جاتے تھے !

آج یہ حال ہے کہ وینیزویلا کا صدر اور اس کی قوم جو مسلمان بھی نہیں ، اسرائیل کی بربریت پر سراپا احتجاج ہے لیکن ۔۔۔ آہ کہ مسلمان مظلوم بچے ذبح ہو رہے ہیں اور ہم ظالموں کو جواب دینا تو دور کی بات اُن کی مذمت تک کرنے سے ڈر رہے ہیں۔
آج یہود و ہنود پھر مسلمانوں کے خلاف چنگیز و ہلاکو کے مظالم رقم کر رہے ہیں اور ہم وہی منظر پیش کر رہے ہیں کہ ۔۔۔۔۔
وہ کہتے ہیں کہ : انتظار کرو ، ہم آپ کو ذبح کرنے کے لئے چھری لے آتے ہیں
اور ہم گردن جھکا کر کھڑے ہوئے ہیں :
بجھی عشق کی آگ اندھیر ہے
مسلماں نہیں خاک کا ڈھیر ہے

مسلمانوں پر مظالم کی قیامت برپا ہے ۔۔۔ اگر اس وقت امت نے اتحاد و جراءت کا مظاہرہ نہ کیا تو سب کی باری آئے گی اور پھر ہم اقبال کے اس شعر کی تعبیر بن جائیں گے :
نہ سمجھو گے تو مٹ جاؤ گے غافل مسلمانو
تمہاری داستاں تک بھی نہ ہوگی داستانوں میں

کریم بخش شعیب (مدینہ منورہ) کے قلم سے۔ بشکریہ: اردو نیوز ، سعودی عرب ، 3-جنوری-2009ء