میرا شہر لوگاں سے معمور کر ‫!

عید میلاد النبی ۔۔۔

2012-01-31T13:41:00.001+05:30

ابھی پچھلے سال کی بات ہے۔ ہمارے ایک واقفکار نے موبائل پر ایس۔ایم۔ایس بھیجا کہ : بھائی جان ، عید میلادالنبی مبارک ہو۔
ہم نے سادہ لوحی سے دریافت کیا کہ : حضور دین میں "تیسری عید" کی ایجاد کا سہرا کس کے سر ہے؟ دین کو پیش کرنے والے (صلی اللہ علیہ وسلم) نے تو صرف "2 عیدیں" ہی دی تھیں۔ یہ تیسری کہاں سے نکل آئی؟
جواب ملا : وہابی ہارڈ لائینر سے بحث کرنا بیکار ہے۔
اور اس جواب کے بعد سے ایس۔ایم۔ایس سے قائم رابطہ بھی ختم ہو گیا۔
لولزززز۔

بھیا ، اس میں خفا ہونے کی کیا بات ہے؟ 10 مواقع پر خوشیاں مناؤ آپ یا 20 موقعوں پر ، ہمیں اس سے کیا غرض؟ مگر للہ اپنی خوشیوں کو بطور دین تو پیش نہ کرو بھائی۔
آخر ہندو یا نصاری کی عیدوں اور ہماری عیدوں کی غرض و غائت میں کچھ تو فرق ہو۔
عیدالفطر روزوں جیسی عظیم عبادت کے اختتام کا ثمر ہے اور عیدالاضحیٰ حضرت ابراہیم علیہ السلام کی عظیم قربانی کی یاد ہے اور ان دونوں عیدوں کے سینکڑوں شواہد شریعت نے دے رکھے ہیں۔ اب اگر کوئی تیسری "عید" اسلئے منانے کا شوق ہے کہ پیارے نبی (صلی اللہ علیہ وسلم) سے محبت کا اظہار کیا جائے تو بھائی ! ایسا اظہار صرف ایک دن کی قید کے ساتھ کیوں؟ اور پھر پیارے نبی (صلی اللہ علیہ وسلم) سے اپنی محبت کی دلیل تو مثالی کردار اور اسوۂ حسنہ پر عمل کے ذریعے دی جانی چاہئے نہ کہ ایک دن کے باجے گاجے اور جلسے جلوس کے شور شرابے کے ساتھ۔

مگر کون سنتا ہے فغان درویش ۔۔۔۔ سو "وہابی ہارڈ لائینر" کے ٹھپے کے ساتھ، ارے تو لو بھیا ہم ہی خاموش ہوئے جاتے ہیں ۔۔۔ جو چاہے آپ کا حسن کرینہ ساز کرے ۔۔۔

نکال پرس ورنہ ٹھنڈا پانی ڈال دوں گا

2012-01-22T13:11:00.001+05:30

ہندوستان ان دنوں شدید سردی کی لپیٹ میں ہے۔

دارالحکومت دہلی میں اقل ترین درجۂ حرارت 4.5 ڈگری سلسیس بتایا جا رہا ہے۔ گہرے کہر کی وجہ سے 200 سے زائد پروازیں متاثر ہو گئی ہیں اور دو درجن ٹرینیں بھی تاخیر سے چل رہی ہیں۔ گہرے کہر کے باعث حد بصارت 50 میٹر سے بھی کم ہو گئی ہے۔

ریاست آندھرا پردیش میں سخت سردی کے سبب 15 اموات پیش آئی ہیں۔ ریاست کی تاریخ میں سردی کی ایسی شدت پہلی مرتبہ ریکارڈ کی گئی ہے کہ ریاست کے تمام 23 اضلاع میں اقل ترین درجۂ حرارت 3 سے 9 ڈگری سلسیس کے درمیان دیکھا گیا ہے۔ گذشتہ سوموار کو ساحلی ضلع وشاکھاپٹنم میں تو درجۂ حرارت صفر سے نیچے چلا گیا تھا۔

آج وکی پیڈیا 24 گھنٹہ کے لئے انٹرنیٹ سے غائب

2012-01-18T13:07:00.002+05:30

عوامی سطح پر پہلی مرتبہ احتجاج کرتے ہوئے انگریزی وکی پیڈیا آج 18/جنوری/2012ء ، ہندوستانی معیاری وقت ساڑھے دس بجے صبح سے 24 گھنٹہ کے لئے انٹرنیٹ سے غائب رہے گا۔
وکی پیڈیا کے بانی ایکزیکٹیو ڈائریکٹر جمی ویلز [Jimmy Wales] نے اپنے قارئین سے درخواست کی ہے کہ اس 24 گھنٹے کے بلیک آؤٹ کے دوران وہ انفرادی طور پر اپنے کانگریس ممبران سے رابطہ قائم کر کے امریکی ایوان نمائندگان میں پیش ہونے والے متنازعہ بل کی مخالفت میں ووٹ دینے کی اپیل کریں۔

واضح رہے کہ امریکی کانگریس میں درج ذیل دو بل منظوری کے لئے پیش کئے جانے والے ہیں :

آن لائن سرقہ کے سدباب کا قانون [Stop Online Piracy Act - SOPA]
تحفظ املاک دانشوران کا قانون [PROTECT IP Act - PIPA]

بتایا گیا ہے کہ اگر یہ قوانین منظور ہو جاتے ہیں تو پھر آزاد اور کھلے انٹرنیٹ کو کاری ضرب لگے گی اور امریکہ کو اختیار حاصل ہو جائے گا کہ وہ اپنی مرضی کی ویب سائیٹس پر سنسرشپ عائد کر سکے۔

متعلقہ خبریں :
Wikipedia joins blackout protest at US anti-piracy moves
Wikipedia blackout on January 18.

خواتین بھڑکیلے لباس نہ پہنیں -- ڈی۔جی۔پی حیدرآباد کا بیان

2012-01-06T04:52:00.001+05:30

خواتین بھڑکیلے لباس نہ پہنیں ، اس کے ذریعے خواتین ہی کے خلاف جرائم میں اضافہ ہو رہا ہے !!
جی ہاں !
یہ حیدرآباد دکن کے محکمہ پولیس کے ڈائرکٹر جنرل وی۔ دنیش ریڈی کا پچھلے دنوں دیا گیا بیان تھا۔ اب اس بیان کو لے کر انگریزی اور اردو اخبارات میں تائید اور مخالفت میں بیان بازی کی لہر چل پڑی ہے۔
آزادئ تہذیب نسواں کی علمبردار جماعتوں اور گروہوں نے ڈی۔جی۔پی کے خلاف مورچہ کھول لیا ہے۔ انہیں لعنت و ملامت کی جا رہی ہے کہ خواتین کی ڈریس کوڈنگ کے قواعد و ضوابط بنانے والے یہ صاحب ہوتے کون ہیں؟
واضح رہے کہ چند ماہ قبل ممبئی کے ایک اعلیٰ پولیس عہدیدار نے بھی خواتین کو پردہ میں رہنے کا مشورہ دیا تھا۔
اور یہ بھی واضح رہے کہ شہر کے چند مدارس اور اسکول کی انتظامیہ نے یہ پابندی عائد کر رکھی ہے کہ لڑکیاں اسکرٹس پہن کر تعلیم گاہ میں نہیں آئیں گی۔ اس پر بہرحال اتنا شور و غوغا نہیں اٹھا ہے جتنا بچارے ڈی۔جی۔پی کو نشانہ بنایا جا رہا ہے۔

صاحب، ٹھیک ہے ہم نہیں کہتے کہ فحاشی اور عریانیت کو پھیلانے کا واحد ذمہ دار لڑکیوں اور خواتین کا لباس ہے۔ لیکن یہ کہنے دیجیے کہ شہوت پرست انسانوں اور فحاشی کے دلدادہ مجرموں کو جنسی جرائم کے ارتکاب کی ترغیب دلانے میں جہاں شراب نوشی ، مخلوط محفلیں ، عریاں اشتہارات ، فحش فلمیں اور ڈرامے ، منشیات کا کھلے عام استعمال وغیرہ جیسے عناصر اپنا کردار ادا کرتے ہیں وہیں نیم عریاں ، جاذب نظر ، پرکشش ، بھڑکیلے اور غیرساتر لباس بھی فحاشی کے فروغ میں اضافہ کا سبب بن رہے ہیں۔
ہم صنف نازک کے لئے زینت کے استعمال کو جائز اور برحق مانتے ہیں لیکن بلاتکلف، بےباک اور لامحدود اظہار کے ہرگز قائل نہیں ہیں۔ لہذا شر کو ابھرنے ، نمایاں ہونے اور فروغ پانے سے روکنے کیلئے برائی کے ہر اس ذریعے پر قدغن لگانے کے قائل ہیں جو جرائم کی ترغیبات کا سبب بنتے ہوں۔

صدر جمعیۃ النساء الاسلامی محترمہ شمیم فاطمہ کا حالیہ بیان بجا طور پر قابل تحسین ہے۔ وہ فرماتی ہیں :
حقائق یہ ہیں کہ طالبات اور خواتین کے بےحیا اور عریاں لباس زیب تن کرنے کی وجہ سے خواتین کے خلاف جرائم میں کئی گیا اضافہ ہو رہا ہے۔ ہر مذہب کے ماننے والوں کو ان مسائل کا سامنا کرنا پڑ رہا ہے۔ اصل میں خواتین ترقی اور ماڈرنزم کے نام پر مغبی باطل تہذیب کی چکاچوند سے اتنی متاثر ہو گئی ہیں کہ انہیں اپنی عفت و شرم و حیا کی حفاظت کا ذرہ برابر احساس نہیں رہا۔ ضرورت اس بات کی ہے کہ خواتین کی تنظیمیں کھلے دل و دماغ سے عریانیت کی وجوہات اور نوجوان نسل پر پڑنے والے خطرناک اثرات کا جائزہ لیں ورنہ اباحیت ، فواحش و منکرات سے کوئی گھر آئیندہ دہے تک بچ نہیں سکے گا۔

متعلقہ خبریں :
DGP's controversial remarks on women's dresses
DGPs remark where twisted: Women cops
V Dinesh Reddy clears air on comment on women's clothing
DGP clarifies on women's clothing and rape remark

سال 2011 میں اردو زبان و ادب کی صورتحال

2012-01-02T23:53:00.002+05:30

روزنامہ اردو ٹائمز ممبئی نے اپنے اتوار ایڈیشن میں گزرے سال 2011ء میں اردو زبان و ادب کے متعلق ایک سوالنامہ یوں پیش کیا تھا :

2011ء میں آپ نے (اردو میں) ایسا کیا (کوئی کتاب ، کوئی افسانہ ، کوئی شعر ، کوئی تنقید یا کچھ اور) پڑھا جس کا تاثر اب تک ذہن میں ہو؟ یا کوئی ادبی واقعہ دل کو لگا ہو یا کوئی سانحہ جس نے آپ کو کچھ سوچنے پر مجبور کیا ہو؟
اردو زبان میں اب ایک ہی اخبار کئی کئی شہروں سے شائع ہونے لگے ہیں ، اس سے اردو زبان کی کوئی ترقی بھی ممکن ہے؟

دیگر نامور ادبی شخصیات کے بالمقابل سہ ماہی اثبات اور اردو کیمپس کے مدیر جناب اشعر نجمی کا تجزیہ اس قدر قابل مطالعہ رہا ہے کہ اشعر نجمی صاحب کی اجازت اور ان کے تعاون و شکریے کے ساتھ راقم الحروف اس پرفکر تجزیے کو اپنے بلاگ پر بھی پیش کرنے کی سعادت حاصل کر رہا ہے۔
ملاحظہ فرمائیں ۔۔۔۔۔۔۔۔۔

2011ء میں آپ نے (اردو میں) ایسا کیا (کوئی کتاب ، کوئی افسانہ ، کوئی شعر ، کوئی تنقید یا کچھ اور) پڑھا جس کا تاثر اب تک ذہن میں ہو؟ یا کوئی ادبی واقعہ دل کو لگا ہو یا کوئی سانحہ جس نے آپ کو کچھ سوچنے پر مجبور کیا ہو؟
ہر سال کی طرح امسال بھی کتابیں بہت چھپیں، بہت سارے اشعار کہے گئے، افسانے لکھے گئے لیکن ان میں سے کوئی ایسی چیز مجھے یاد نہیں جس کا تاثر اب تک میرے ذہن میں موجود ہو۔ البتہ سال رواں کے اخیر میں ایک ایسا واقعہ ضرور رونما ہوا جس نے کم از کم معاشرے میں ہم ادیبوں کی اوقات ضرور بتادی۔ گذشتہ دنوں جسٹس مرکنڈے کاٹجو نے مرزا غالب کو پس مرگ بھارت رتن ایوارڈ دیے جانے کا مطالبہ کیا تھا جس پر انھیں صرف اس لیے ہدف تنقید بنایا گیا، کیوں کہ لوگ کرکٹروں اور فلمی ستاروں کو اس ایوارڈ کا بہتر مستحق سمجھتے ہیں۔ جسٹس کاٹجو اسے ثقافتی ابتذال کی علامت بتارہے ہیں کہ ہم اپنے اصل "ہیرو" کا درجہ رکھنے والی شخصیات کو تیزی سے بھولتے جارہے ہیں۔ میں خود بھی اسے صرف کسی ایک ایوارڈ کے استحصال کی شکل میں نہیں دیکھ رہا ہوں بلکہ اس واقعے نے ہمیں یہ بھی جتادیا ہے کہ ہمارا معاشرہ ادب کو ایک فالتو چیز سمجھتا ہے اور "اسپورٹس" جیسی چیزوں کو ادب سے زیادہ اہم تصور کرتا ہے۔ معاشرے سے بھی شکایت کس منھ سے کریں کہ ہم ادیبوں نے بھی خود کوبے توقیر اور ذلیل کرنے میں کوئی کورکسر نہیں چھوڑا ہے۔ گذشتہ دنوں شہریار کو گیان پیٹھ جیسا موقر ادبی ایوارڈ امیتابھ بچن کے ہاتھوں سے دینے والوں اور حتیٰ کہ اسے لینے والے کی "رواداری اور خودشناسی" کی داد نہ دینا بے انصافی ہوگی۔ مشرق کی تہذیب و ثقافت پر اترانے والوں کو اپنی اس اختراع پر خوش ہونا چاہیے کہ اس بار انھوں نے مغرب کی نقل نہیں کی ہے۔ کیوں کہ مغرب کا ادنیٰ سے ادنیٰ ادبی ایوارڈ بھی اب تک کسی "ٹام کروز" یا "براڈ پٹ" جیسے ہالی ووڈ کے سپر اسٹاروں کے ہاتھوں نہیں دیا جاتا۔

سچن تندولکر کو بھارت رتن دیے جانے کے زوردار مطالبے سے ان لوگوں پر تو کوئی فرق نہیں پڑتا جو ادب کو بقول آڈن "شوق فضول" تصور کرتے ہیں (یہ اور بات ہے کہ انسان اس کے لیے جان کی بازی تک لگاسکتا ہے)۔ لیکن کم از کم ہمارے "خدائی خدمت گاروں" کو اب تسلیم کرلینا چاہیے کہ ادب کی حیثیت ثانوی ہے۔میری نظر میں غالب بھارت رتن کے اس لیے سب سے زیادہ مستحق ہیں، کیوں کہ
(1) وہ ہمارے آخری کلاسیکی اور پہلے جدید شاعر ہیں۔ جدید خیال اور جدید شاعری کی ابتدا نہ صرف ہندوستان میں، بلکہ سارے ہندوستان میں غالب سے ہوتی ہے۔
(2) غالب کے خطوط اور تحریروں میں قبل 1857 اور خاص کر بعد 1857 کی دہلوی تہذیب کے جو مرقعے ملتے ہیں اور پس نوآبادیاتی نظام کے لائے ہوئے منفی اثرات کے بارے میں بہت کچھ ملتا ہے جو اس لیے بھی قیمتی ہے کہ وہ براہ راست مشاہدے پر مبنی ہے۔
(3) غالب روشن خیالی اور صلح کل کے بہت بلند مرتبے پر فائز ہیں۔قومی یک جہتی کے تصور کو مضبوط کرنے کے لیے بھی آج غالب کی بہت ضرورت ہے۔
(4) دیگر زبانوں، خواہ شمال کی یا جنوب کی، ایسا کوئی شخص نہیں ملتا جس کا پیغام خاص کر قومی یک جہتی کا پیغام اور جدید تصورات کو قبول کرنے کی ترغیب دیتا ہو۔

اردو زبان میں اب ا یک ہی اخبار کئی کئی شہروں سے شائع ہونے لگے ہیں ، اس سے اُردو زبان کی کوئی ترقی بھی ممکن ہے؟
اول تو میں اس مفروضے ہی کو غلط سمجھتا ہوں کہ کسی رسالے یا اخبار کی تعداد اشاعت سے ہم اس زبان کی ترقی کو منسلک کر کے دیکھیں۔ لیکن اگر یہ مفروضہ درست بھی ہو تو مایوس ہونے کی چنداں ضرورت نہیں ہے بلکہ ایک اخبار کے مختلف ایڈیشن جن شہروں سے نکل رہے ہیں، ظاہر ہے ان کے کچھ نہ کچھ قارئین بھی ضرورہوں گے ورنہ انھیں نکالنے کا کوئی جواز نہیں ٹھہرتا۔ پھر آپ یہ بھی دیکھیے کہ اردو کی کئی نیوز ایجنسیاں (جو پہلے نہیں ہوا کرتی تھیں) کام کررہی ہیں اور ظاہر ہے کہ منافع بھی کما رہی ہیں۔ ان کے علاوہ کئی اردو ٹی وی چینل چل رہے ہیں جو ظاہر ہے کہ اردو طبقے کے مطالبے کی بنیاد پر ہی جاری کیے گئے ہیں۔ کئی ریاستوں میں اردو کی تعلیم بھی مقابلتاً تسلی بخش ہے۔ لہٰذا جو لوگ اس زبان کے تعلق سے بہت فکرمند ہونے کا ناٹک کر رہے ہیں، وہ یا تو محض بیان بازی کررہے ہیں یا اپنے محدود مفادات کی خاطر حقیقت بیانی سے گریز کررہے ہیں۔ لیکن مجھے شک ہے کہ کہیں آپ اردو زبان کی ترقی کو اردو ادب کی ترقی سے وابستہ کر کے تو نہیں دیکھ رہے ہیں؟ دونوں کے مسائل علاحدہ ہیں ، لہٰذا انھیں خلط ملط نہیں کرنا چاہیے۔

سال 2011 - گولڈن جوبلی تحاریر

2011-12-31T19:53:00.016+05:30

لیجئے صاحب ، اس سال کی آخری تحریر پیش خدمت ہے جو اتفاق سے ہمارے اس بلاگ پر سن 2011ء کی 50ویں پوسٹ ہے۔ اپنی اس اردو بلاگنگ پر جو ایک طائرانہ نظر ڈالتے ہیں تو لگتا ہے کہ ہم 2009ء میں زیادہ فعال رہے تھے جبکہ اس سال جملہ 67 تحاریر بلاگ پر پوسٹ ہوئیں تھیں۔ اس کے بعد سال 2008ء کا نمبر ہے جس کے کھاتے میں جملہ 63 تحریریں محفوظ ہیں۔ تیسرے نمبر پر 50 پوسٹوں کے ساتھ یہ اموات والا سال 2011ء ہے۔

یکم نومبر 2007ء کو بلاگ اسپاٹ (blogger.com) پر جب اپنا نیا بلاگ (ہمارا پچھلا بلاگ ایک اردو بلاگنگ سروس پر قائم تھا جو بلا اطلاع ختم کر دی گئی) شروع کیا تھا تو گمان نہیں تھا کہ اس کو باقاعدگی سے چلا سکیں گے کیونکہ ہمارے کچھ قریبی احباب کا اس مقولے پر زور ہے کہ ہماری فطرت میں ایک جگہ ٹک کر کام کرنے کی خو نہیں ہے۔ اب ہم ان کے سامنے سینہ ٹھوک ای-میل مارنے جا رہے ہیں کہ دیکھو پاشا! ہم نے تمہاری دھمکیوں کے باوجود پورے چار سال مکمل کر لئے بلاگنگ کے !

پورے پچاس پوسٹوں کو یار لوگ "گولڈن جوبلی" کہتے ہیں۔ اور کچھ تو اس پر "پورے پچاس ہزار روپے" کا انعام ملنے کی امید دلاتے ہوئے کہتے ہیں کہ :
سنا ؟ پورے پچاس ہجار ! اور یہ انعام اسلئے ہے کہ یہاں سے پچاس پچاس کوس دور بلاگنگ میدان میں جب بچہ رات کو روتا ہے تو ماں کہتی ہے سوجا بیٹا سوجا نہیں تو "حیدرآبادی" آ جائے گا ۔۔۔ تیری ناک میں دم کرنے ۔۔۔۔
لولززز ۔۔۔۔

"صاحب انعام ونام کی بات چھوڑئیے ، یہ بتائیے مٹھائی کب کھلا رہے ہیں؟"
ہمارے آفس میں بازو کی ڈیسک پر بیٹھے ایک سوڈانی صاحب فرماتے ہیں۔ اتفاق کی بات کہ اسی وقت ہمارے آفس کے ایک دوست چھٹی سے واپس کام پر لوٹے تھے اور ہماری خواہش پر کرنول کی مٹھائی لے آئے تھے ، وہی ہم نے اپنے کولیگ کو پیش کر دی۔
مٹھائی کے نام پر یاد آیا کہ ہم نے ہر چند کہ کرنول کی مشہور مٹھائی "بن کھوا" خصوصی طور پر منگوائی تھی۔ آج سے کوئی پچیس تیس سال پہلے ہمارے بچپن میں "بن کھوا" نامی مٹھائی کا اس قدر شہرہ تھا کہ جیسے آگرہ کا پیٹھا یا بنگال کا رس گلہ یا ممبئی کے افلاطون کا چرچا چہاردانگ عالم ہے۔
مگر افسوس کہ امتداد زمانہ نے اور "ہائی جینک [hygienic] سویٹس" کی دلخوش کن اصطلاح کے سہارے عصر حاضر کے مشینی کاروبار نے لگتا ہے سب ختم کر دیا۔
اس موضوع پر وضاحت کرتے ہوئے منصف ٹی۔وی میں برسرکار ہمارے کرنولی دوست سجاد الحسنین کہتے ہیں کہ ۔۔۔۔۔

ظاہر سی بات ہے کہ نئی نسل پزا اور برگر کے چکر میں مشغول ہے اور مٹھائی فروش بن کو کاٹ کر اس میں کھوا بھرنا شان کے خلاف سمجھنے لگے ہیں۔ "بن کھوا" نامی مٹھائی پوچھی جائے تو آجکل ہوتا یہ ہے کہ ایک ہاتھ سے بن تھمایا جاتا ہے اور دوسرے ہاتھ سے ایک چھوٹی سی پلیٹ جس میں ذرا سا کھوا رکھا ہوتا ہے۔
قادر خان حلوائی کرنولی کے زمانے کے لوگ اب رہے کہاں جو ریت رواج تہذیب اور ذائقے پر جان دیا کرتے تھے۔ آج وہی مٹھائی تو ہے مگر اس میں جو خلوصِ شیریں ہوا کرتا تھا ، وہ عنقا ہے۔

سچ کہا سجاد پاشا بھائی نے۔ صرف مٹھائی کی کیا بات کریں ۔۔۔۔
وقت نے تو بستی کی ، شکل ہی بدل دی ہے
جن پہ رونقیں تھیں وہ ، بام و در نہیں ملتے

چاہتوں بھرے کمرے ، دل کھلے ، کھلا آنگن
اب تو ڈھونڈنے پر بھی ، ایسے گھر نہیں ملتے

سب نے ہر ضرورت سے ، کر رکھا ہے سمجھوتا
لوگ ملتے رہتے ہیں ، دل مگر نہیں ملتے

تھی خبر گرم کہ غالب کے اڑیں گے پرزے

2011-12-30T09:55:00.008+05:30

تھی خبر گرم کہ غالب کے اڑیں گے پرزے
دیکھنے ہم بھی گئے تھے پہ تماشا نہ ہوا

اردو کے عظیم شاعر مرزا اسد اللہ خاں غالب ستائیس (27) دسمبر کو تقریباً 200 سال پہلے پیدا ہوئے تھے۔ ان کی تاریخ پیدایش 27 ڈسمبر 1797ء ہے ۔
حکومت ہند نے کئی برس قبل ان کا جشن منایا تھا جس پر طنز کرتے ہوے ساحر لدھیانوی نے نظم کہی تھی جو بہت مقبول ہوئی تھی کہ
اردو پہ ستم ڈھا کر غالب پہ کرم کیوں ہے
Urdu pe sitam dhha kar, Ghalib pe karam kyon hai
(Why bury Urdu and then praise Ghalib?)

ویسے تو اِس وقت غالب پر حکومت کا کوئی پروگرام تو نہیں مگر دہلی سے یہ خبر سماجی کارکن فیروز بخت احمد نے دی ہے کہ گلی قاسم جان میں واقع غالب کی حویلی پر پھر سے ناجائز قبضے ہونے لگے ہیں۔
یہ وہی فیوز بخت ہیں جنھوں نے سن 1997ء میں جب کہ غالب کا دو سو سالہ جشن سرکاری طور پر منایا جارہا تھا پارلیمنٹ میں مفاد عامہ کی درخواست داخل کرکے اس حویلی کو محفوظ کرنے میں کامیابی حاصل کی تھی۔ انھوں نے اطلاع دی کہ جنرل سیکرٹری یوتھ سرویس مشن جب گلی قاسم جان سے گزر رہے تھے تو انھوں نے دیکھا کہ حویلی غالب میں ایک بڑا سا کاؤنٹر رکھا ہوا ہے اور اس پر تین بڑھئی کام کر رہے ہیں ۔ سیدھے ہاتھ کی جانب دیوار پر کیلیں ٹھکی ہوئی تھیں۔ جن پر کارپنٹر حضرات کی قمیصیں لٹکی ہوئی تھیں۔
جب بڑھیوں سے پوچھا گیا کہ کام کس کا چل رہا ہے؟
تو انھوں نے بتایا کہ برابر میں رہنے والے کسی شفیق کا کام چل رہا ہے۔ اس کے علاوہ بھی اور بہت سے افراد اس حویلی کو استعمال کر رہے ہیں حتٰی کہ اس میں تقاریب کا انعقاد بھی عمل مبں آ رہا ہے۔ کہیں کوئی میز رکھ کر کپڑے استری کر رہا کوئی ترکاری بیچ رہا ہے تو کسی نے گودام بنا رکھا ہے۔
غالب کے مزار کے پاس ، ان کے اشعار کے جو خوبصورت پانچ طغرے آویزاں تھے ان میں سے اب صرف ایک باقی رہ گیا ہے۔ چیف منسٹر دہلی شیلا ڈکشٹ نے فیروز بخت سے یہ وعدہ تو کیا ہے کہ وہ غالب کی حویلی کے تحفظ کے کچھ بھی کرنے تیار ہیں۔
اب دیکھنا یہی ہے کہ انکا وعدہ کب پورا ہوتا ہے۔

ہتک آمیز تصاویر حذف کی جائیں - فیس بک وغیرہ کو دہلی ہائی کورٹ کا حکم

2011-12-25T12:04:00.001+05:30

دہلی ہائی کورٹ نے سماجی روابط (social networking) کی 22 ویب سائیٹس بشمول فیس بک ، یوٹیوب ، گوگل ، آرکٹ ، یاہو اور مائیکروسافٹ کو 6/فبروری/2012 تک کی مہلت دی ہے کہ وہ تمام مذہب مخالف یا غیرسماجی مشمولات کو ہٹا دیں۔
عدالت نے ان تمام ویب سائیٹس کو ہدایت دی ہے کہ 6/فبروری تک تعمیل رپورٹ پیش کر دی جائے۔

دہلی ہائی کورٹ میں ایڈیشنل سول جج مہیش کمار نے دارالعلوم دیوبند کے سابق ترجمان اور FatwaOnline.org کے بانی مفتی اعجاز ارشد قاسمی کی داخل کردہ شکایت پر یہ قدم اٹھایا ہے۔ مفتی اعجاز قاسمی نے ادعا کیا تھا کہ بعض ایسی اہانت آمیز تصاویر شائع کی گئی ہیں جن سے ہر طبقے کے مذہبی جذبات کی توہین اور تحقیر ہوتی ہے۔
واضح رہے کہ فیس بک پر پچھلے چند دنوں سے ایک ایسی واہیات تصویر گردش میں ہے جس میں ایک خاتون کو انتہائی قابل اعتراض شکل میں خانہ کعبہ کی چھت پر بیٹھے دکھایا گیا ہے۔

اخبار نویسوں سے گفتگو کرتے ہوئے اس کیس کے وکیل نے کہا ہے کہ متعلقہ کمپنیوں کو 6/فبروری تک ، مکمل تفصیلات کے ساتھ یہ بتلانا لازمی ہوگا کہ ان کمپنیوں نے قابل اعتراض اور اہانت آمیز مشمولات کو ویب سائیٹس سے خارج کرنے کے سلسلے میں کیا کاروائی کی ہے؟
عدالت نے گذشتہ 20/دسمبر کو ان ویب سائیٹس سے خواہش کی تھی کہ وہ تصاویر ، ویڈیو یا کسی اور شکل میں موجود قابل اعتراض مواد کو فوری حذف کریں بصورت دیگر یہ مواد مذہبی جذبات کو مجروح کر سکتا ہے۔

واضح رہے کہ حکومت ہند کے وزیر انفارمیشن تکنالوجی جناب کپل سبل گذشتہ چند ماہ سے مقبول سوشل نیٹ ورکنگ ویب سائیٹس فیس بک اور گوگل سے مسلسل تقاضا کر رہے ہیں کہ وہ قابل اعتراض اور تکلیف دہ مواد کو حذف کریں۔ کپل سبل نے صحافتی گوشوں کی جانب سے اس اعتراض کو رد کر دیا ہے کہ ان کا مقصد انٹرنیٹ پر کسی قسم کی سنسرشپ کو لاگو کرنا ہے۔ ان کا کہنا ہے کہ اس معاملے میں مداخلت کے لئے حکومت اسلئے مجبور ہے کہ متعلقہ کمپنیاں تعاون سے گریز کر رہی ہیں۔
وزیر انفارمیشن تکنالوجی نے ان کمپنیوں کو مشورہ دیتے ہوئے کہا ہے کہ انہیں چاہیے کہ وہ ایسا خودکار نظام متعارف کروائیں جس کے تحت شکایت ملتے ہی متعلقہ مواد خود بخود حذف ہو جایا کرے۔

NDTV خبر :
Court orders social networking sites to remove objectionable images

ٹائمز آف انڈیا خبر :
Court summons India heads of Google, Facebook, Yahoo

جس کی لاٹھی ، اس کی بھ۔۔۔۔۔

2011-12-23T05:31:00.004+05:30

ایک نظم تین عنوانات

1 : تیسری دنیا کو اسلحہ برآمد کرنے والوں میں سرفہرست
امریکہ اور روس
فرانس اور انگلستان
اور چین

2 : ایٹمی ہتھیاروں کے سب سے بڑے ذخیرہ اندوز
امریکہ اور روس
فرانس اور انگلستان
اور چین

3 : اقوام متحدہ کی سلامتی کونسل کے مستقل ارکان
امریکہ اور روس
فرانس اور انگلستان
اور چین

(شاعر : شاہین)

یہ کالی کالی زلفیں ۔۔۔۔

2011-12-19T15:41:00.001+05:30

بالوں کی چار قسمیں ہوتی ہیں

خشک بال
چمکیلے بال
نارمل بال
وہ انسانی سر جو اپنے ہاں بال رکھنے سے بال بال بچ جاتا ہے

کہتے ہیں کہ آخری قسم مردوں میں زیادہ پائی جاتی ہے۔

شعراء حضرات نے بال کو گیسو ، زلف ، کاکل وغیرہ وغیرہ سے یاد کیا ہے۔ اور اپنے فرضی محبوب کی تعریف میں بالوں کو سنبل ، سانپ ، ناگن ، زنجیر ، سائباں ، بادل ، رات کا اندھیرا اور ساون کی گھٹا جیسے استعاروں سے تشبیہ دی ہے۔ اس کے علاوہ شعری انداز میں بھی تعریف کے ڈونگرے برسائے ہیں ۔۔۔ مثلاً

زلف جاں سے ملی فکر و نظر کی چاندنی
زلفوں کے پیچ و خم میں یہ عارض کی دھوپ چھاؤں
زلفیں دراز روئے منور زلفیں راتوں سی
کس نے کھولا ہے ہوا میں گیسوؤں کو ناز سے
اڑی زلف چہرے پہ اس طرح کہ شبوں کے راز مچل گئے

نگار خانے کے نغموں میں بھی زلفوں کا ذکر بڑے دلنشین انداز میں بیان کیا جاتا رہا ہے ۔۔۔

تری زلفوں سے جدائی تو نہیں مانگی تھی
چہرہ ہے یا چاند کھلا ہے زلف گھنیری شام ہے کیا
یہ جھیل سی گہری آنکھیں ، زلفوں کا رنگ سنہرا
لٹ الجھی سلجھا جا رے بالم

ویسے آجکل کی نوجوان نسل بھی کیا خوب ہے ، بقول شاعر :
اس طرح بن ٹھن کر نکلتا ہے وہ کالج کے لئے
مجھ کو گلزار بھی گلنار نظر آتا ہے

اور پھر مرزا غالب کا تو جواب نہیں ۔۔ فرمایا :
رنگ پیراہن کا خوشبو زلف لہرانے کا نام
موسم گل ہے تمہارے بام پر آنے کا نام

اور کسی پنجابی فلم کے نغمے کے بول کچھ یوں ہیں :
بین نہ بجاوئیں منڈیا
میری گت سپنی بن جائے گی

اور پھر فارسی شعراء تک بات نکلی تو ۔۔۔۔
زلف سنبل چشم نرگس لعل لب رخسار گل
من نہ دیدم ہیچ جائے یک درخت

(ڈاکٹر عابد علی کے فکاہیہ سے استفادہ)

سن 2011ء - اموات کا سال

2011-12-18T13:53:00.005+05:30

فٹبال کھلاڑی سوکریٹس (Socrates) ، برازیل
تفریحی دنیا کے بادشاہ معین اختر ، پاکستان
ہیوی ویٹ چمپئین جوفریزر (Joe Frazier) ، امریکہ
بانی ایپل کمپیوٹر اسٹیو جابس (Steve Jobs) ، امریکہ
ممتاز کرکٹ کھلاڑی منصور علی خان پٹوڈی ، ہندوستان

۔۔۔ ان سب نے اپنے متعلقہ میدانوں میں نام کمایا تھا اور ساری دنیا میں بڑی تعداد میں ان کے مداح پائے جاتے تھے ۔۔۔ سال 2011ء میں انتقال کر گئے۔

پروفیسر سریش ٹنڈولکر بھی ماہ جون میں انتقال کر گئے جنہوں نے ہندوستان کی غربت کا تفصیلی جائزہ لیا تھا۔
جدید آزاد ہندوستان کی غیر فلمی موسیقی میں غزل کو ایک نیا انداز دینے والے غزل کنگ جگجیت سنگھ بھی پرلوک سدھارے۔
ہندوستان کے سب سے زیادہ جانے پہچانے مصور مقبول فدا حسین المعروف ایم۔ایف۔حسین ، جنہوں نے ایک تنازعے کے بعد قطر کی شہریت اختیار کر لی تھی ، اسی سال ماہ جون میں انتقال کر گئے اور برطانیہ میں قطری شہری کی حیثیت سے مدفون ہوئے۔
ملک کے سب سے متنازعہ ہندو سادھو ستیہ سائی بابا بھی ماہ اپریل میں دنیا چھوڑ گئے۔ ان کے انتقال کے وقت ان کی دولت کا تخمینہ 8 بلین ڈالر سے زیادہ لگایا گیا۔
ہندوستانی فلمی دنیا بالی ووڈ میں ایک البیلے نوجوان کے طور پر مشہور جو خود اعتماد تھا اور جو موسیقی ، فیشن اور لباس میں مغربی دنیا سے متاثر نہیں تھا اور جسے ہندوستانی ایلوس پریسلے (Elvis Presley) کے خطاب سے بھی نوازا گیا تھا، یعنی شمی کپور ، ماہ اگست میں 80 سال کی عمر میں انتقال کر گئے۔ اسی طرح "سدا بہار اداکار" کے طور پر مقبول 88 سالہ دیو آنند بھی دسمبر میں لندن میں وفات پا گئے۔

پاکستان میں پنجاب گورنر سلمان تاثیر ماہ جنوری میں قاتلانہ حملے میں انتقال کر گئے اور جنوری میں ہی کرکٹر اسلم کھوکھر اور سیاستداں نصیر اللہ بابر انتقال کر گئے۔ ماہ اکتوبر میں سابق وزیر اعظم پاکستان ذوالفقار علی بھٹو کی اہلیہ بیگم نصرت بھٹو کا انتقال ہوا۔

عالمی سطح کے قائدین میں اسامہ بن لادن ، معمر قذافی ، کینیا کی نوبل انعام یافتہ خاتون ونگاری متھائی (Wangari Maathai) ، سعودی عرب کے شاہ عبداللہ کے بھائی سلطان بن عبدالعزیز اور سعودی عرب ہی کے مشہور تاجر اور الراجحی بنک کے بانی صالح عبدالعزیز الراجحی بھی اسی سال انتقال کر گئے۔
جیمس بانڈ فلموں کی ٹائیٹل موسیقی دینے والے مشہور موسیقار جان بیری (John Barry) نے جنوری میں اپنی حیات پوری کی۔ اسی طرح ہالی ووڈ کی مشہور اداکارہ الزیبتھ ٹیلر (Elizabeth Taylor) بھی اپنے پیچھے ایک یادگار رومانس کا ورثہ چھوڑ کر مارچ میں دنیا سے وداع ہوئیں۔ اور مارچ ہی میں انٹرنیٹ کے فروغ اور دنیائے کمپیوٹر کو نئی جہت دینے والے پال بیرن (Paul Baran) بھی رخصت ہوئے۔ "ڈولی (Dolly)" کی عرفیت سے مشہور جنوبی افریقہ کے عظیم کرکٹر باسل ڈی اولی ویرا (Basil D'Oliveira) نے بھی گذشتہ ماہ نومبر میں اپنی زندگی کے دن پورے کئے۔

(استفادہ از مضمون : عامر اللہ خان ، روزنامہ اعتماد ، 18/دسمبر/2011)

ہارورڈ یونیورسٹی سے پروفیسر سبرامنیم سوامی کا اخراج

2011-12-17T15:27:00.002+05:30

375 سالہ قدیم ہارورڈ یونیورسٹی (کیمبرج ، امریکہ) نے بالآخر پروفیسر ڈاکٹر سبرامنیم سوامی (رکن پارلیمنٹ ہندوستان) کو اپنے موقر تعلیمی ادارے سے خارج کر دیا ہے۔ اسی کے ساتھ درج ذیل دو نصاب بھی یونیورسٹی سے خارج کر دئے گئے ہیں جس کی تعلیم کے لئے ڈاکٹر صاحب یونیورسٹی میں بحیثیت پروفیسر فائز رہے تھے :

Quantitative Methods in Economics and Business
Economic Development in India and East Asia

سال رواں جولائی میں ڈاکٹر صاحب نے اپنے ایک کالم میں مذہبی تعصب کا مظاہرہ کرتے ہوئے فرمایا تھا کہ ہندوستان میں صرف انہی مسلمانوں کو ووٹ کا حق ملنا چاہئے جو اس بات کا اعتراف کریں کہ ان کے آبا و اجداد ہندو تھے۔ ونیز پروفیسر موصوف نے ہندوستان کی سینکڑوں مساجد کو ڈھانے کی بھی وکالت کی تھی۔
شائد ہندوستانی جمہوری سیاست میں ایسے متنازعہ بیانات کے لئے جگہ نکل آتی ہے مگر افسوس کہ ملک کے باپر پروفیسر سوامی کے ایسے متنازعہ بیانات یا خیالات کے لئے کوئی جگہ نکل نہیں پائی۔ ہارورڈ یونیورسٹی نے اسی بنیاد پر انہیں اپنے ادارے سے نکال باہر کرنا مناسب سمجھا۔

واضح رہے کہ ڈاکٹر سوامی کے متذکرہ متنازعہ مضمون پر اعتراضات کے باوجود یونیورسٹی نے اظہار رائے کی آزادی کا فائدہ دیتے ہوئے ڈاکٹر صاحب کو درس کیلئے مدعو کرنا چاہا تھا مگر 400 سے زائد طلبا نے پروفیسر سوامی کو ہٹائے جانے کی درخواست دائر کر دی۔ یونیورسٹی فیکلٹیز نے اجلاس میں بحث کے بعد فیصلہ کیا کہ ڈاکٹر سوامی کا مضمون ایک مذہبی فرقے کے خلاف منفی تشہیر اور مقدس مقامات کے خلاف تشدد کا اعلان کرتا ہے۔ لہذا ہارورڈ یونیورسٹی کی اخلاقی ذمہ داری بنتی ہے کہ وہ خود کو ایسے شخص کے ساتھ وابستہ نہ کرے جو کسی اقلیتی طبقے کے خلاف نفرت کا احساس ظاہر کرتا ہے۔

ڈاکٹر سبرامنیم سوامی نے 1965ء میں ہارورڈ یونیورسٹی سے ہی معاشیات میں ڈاکٹریٹ کی تھی۔ لیکن ہندوستانی عوام انہیں معاشیات کے پروفیسر سے زیادہ ایسے سیاستداں کے طور پر جانتے ہیں جو آئے دن اپنے متنازعہ بیانات کے سبب زیربحث ہوتے ہیں۔ ڈاکٹر سوامی نے یونیورسٹی کے فیصلے پر اپنا احتجاج درج کرواتے ہوئے کہا ہے کہ یونیورسٹی نے اس سلسلے میں ان سے کوئی بات نہیں کی اور اچانک فیصلہ لے لیا ہے۔ حالانکہ اصولی طور پر دیکھا جائے تو ہر یونیورسٹی کا یہ نجی معاملہ ہوتا ہے کہ وہ کسے استاد کے طور پر رکھے اور کسے نہیں؟ ہر تعلیمی ادارے کو مکمل حق حاصل ہے کہ اپنی شہرت اور عزت کے موافق وہ کوئی فیصلہ لے۔ اس پس منظر میں ڈاکٹر سوامی کا احتجاج بےجا ہے۔

ڈاکٹر سوامی اور ان جیسی سوچ کے حامل افراد کو جاننا چاہئے کہ بین الاقوامی برادری میں ہندوستان کی شبیہ ایک ایسے ہمہ مذہبی ملک کی ہے جہاں فرقہ وارانہ ہم آہنگی کی کئی مثالیں قائم ہوئی ہیں۔ گو کہ ایودھیا ، گجرات جیسے واقعات سے کچھ وقت کے لئے ملک عدم استحکام سے لرز جاتا ہے لیکن پھر اتحاد کی مضبوط ڈور تن جاتی ہے۔ تعصب کے دائرے میں مقید سیاستدانوں کو اپنے محدود نظریات کی ترسیل سے قبل ملک کی شبیہ کی فکر کرنا چاہئے۔

ہارورڈ یونیورسٹی کا قابل تحسین فیصلہ نہ صرف پروفیسر سوامی کو اپنی روش بدلنے کا موقع فراہم کرتا ہے بلکہ دنیا کی تمام فرقہ پرست تنظیموں اور افراد کے لئے بھی ایک سبق ہے۔

(استفادہ از مضمون : ابوجاسم ، روزنامہ منصف ، 11/دسمبر/2011)

قطر کی سب سے بڑی جامع مسجد - محمد بن عبدالوہاب سے موسوم

2011-12-14T14:49:00.001+05:30

امیر قطر شیخ حمد بن خلیفہ آل ثانی نے قطر کی سب سے بڑی جامع مسجد کو امام محمد بن عبدالوہاب (رحمۃ اللہ علیہ) کے نام سے موسوم کر دیا ہے۔ سرکاری سطح پر یہ اعلان کل بروز منگل 13/دسمبر/2011 کو قطر ایوان امیری نے جاری کیا ہے۔
بیان میں یہ وضاحت بھی کی گئی کہ :
دولۃ قطر ، امت کی نمایاں ہستیوں اور تہذیبی اقدار کو روشن کرنے والی شخصیتوں کے احیاء کی پالیسی پر گامزن ہے۔ اور اسی تناظر میں مصلح امت شیخ محمد بن عبدالوہاب (رحمۃ اللہ علیہ) کے نام سے جامع مسجد کو موسوم کیا گیا ہے۔

اس جامع مسجد کا جملہ رقبہ 175,164 مربع میٹر بتایا گیا ہے۔ تین مرکزی دروازے اور 17 بغلی دروازے ہیں۔ مرکزی ہال کی چھت پر 28 بڑے گنبد اور اطراف میں 65 مزید چھوٹے گنبد نصب کئے گئے ہیں۔
ائرکنڈیشن مرکزی ہال میں بیک وقت 11 ہزار مصلی نماز ادا کر سکتے ہیں اور اس کے علاوہ ہال سے منسلک خصوصی گوشے میں 1200 خاتون نمازیوں کی بھی گنجائش رکھی گئی ہے۔ مسجد میں ادائیگی نماز کیلئے مجموعی طور سے جملہ تیس (30) ہزار مصلیان کی گنجائش فراہم کی گئی ہے۔

بابری مسجد - تعمیر سے شہادت تک

2011-12-06T23:38:00.001+05:30

از طرف :
رشید انصاری (رابطہ ای-میل)

6 / دسمبر ہر سال آتا ہے اور ہمیں بابری مسجد کی شہادت کے المناک واقعہ کے ساتھ ہندوستان میں بڑھتی ہوئی فرقہ پرستی اور فاشزم اور حکومت کی مشنری میں محدود پیمانے پر سہی لیکن ہر سطح (وزراء سے لے کر ایک پولیس کانسٹبل تک) پر پائے جانے والے تعصب اور مسلم دشمنی سے صرف مسلمانوںکو ہی نہیں بلکہ پوری قوم اور ملک کو لاحق خطرات سے آگاہ کرتا ہے گو کہ بابری مسجد کی شہادت کے کلیدی مجرم نرسمہا راؤ جیسا فرقہ پرست ، مسلم دشمن اور نااہل شخص نہ وزیراعظم بنا ہے اورنہ ہی بن سکے گا۔ سیکولرازم کا دم بھرنے والی تمام جماعتوں کانگریس اور سنگھ پریوار دونوں ہی بابری مسجد کی شہادت کے جرم میں برابر کی شریک ہیں۔
یہ گڑے مردے اکھاڑنا، یا زخموں کو ہرا کرنا نہیں ہے بلکہ ماضی سے سبق لینے کیلئے بابری مسجد کے ماضی کا ذکر انگریزوں، کانگریس اور سنگھ پریوار کے حوالے سے اختصار کے ساتھ پیش ہے۔

شہنشاہ بابر کے ایک سپہ سالار میر باقی نے 1528ء میں ایودھیا (ضلع فیض آباد) میں بابری مسجد تعمیر کروائی تھی۔ 1528ء سے لے کر 1850ء کے بعد تک بھی یہ بات کسی نے نہیں کہی تھی کہ بابری مسجد کسی مندر (خاص طور پر رام چندر جی کے مقام پیدائش ) رام جنم بھومی کی جگہ بنے مندر کو توڑ کر بنائی گئی تھی ویسے رام چندر جی کا مقام پیدائش ایودھیا ہونا نیز رام چندر جی کی حقیقی تاریخی حیثیت ہی مشتبہ باتیں ہیں حد تو یہ کہ بابری مسجد کی جگہ پر رام چندر جی کے مقام پیدائش کا ہونا گذشتہ سال الٰہ آباد ہائی کورٹ نے دلیل و ثبوت کی بنیاد پر نہیں بلکہ "عقیدے " کی بنیاد پرتسلیم کرکے نہ صرف خود کو مذاق کا موضوع بنالیا بلکہ ملک کی عدالت عظمیٰ نے بھی عدالت عالیہ الٰہ آباد کے اس فیصلے کو " عجیب و غریب" قرار دے کر عدالتی فیصلہ پر اعتراض کرنے کا جواز پیدا کردیا ہے ۔

بابری مسجد رام جنم بھومی مسئلہ انگریزوں نے ہی پیدا کیا تھا۔ اس کے ساتھ ان ہی بیکر صاحب نے کئی ایسے فتنہ انگیز نکات پیش کئے جنہوں نے ایک غیر متنازع بات کو متنازع بنانے میں اہم حصہ لیا ہے ۔ ہالینڈ سے تعلق رکھنے والے ہنس بیکر نے ہی 1008ء میں " جنم بھومی مندر" کی تعمیر کی بات لکھی تھی۔ انگریزوں کی ریشہ دوانیوں میں یہ امر بھی شامل ہے کہ 1855ء کی پہلی جنگ آزادی کی ناکامی کے بعد ایودھیا میں انگریزوں کی افواج اور انگریزوں کے نمک خوار ہندو زمینداروں اور تعلقہ داروں نے مل کر ہنومان گڑھی کی مسجد شہید کی اور مسجدیں بھی توڑیں جب مولوی امیر علی امیٹھوی نے مساجد کو واگذار کرنے کیلئے کاکارروائی کی تو تاریخ حدیقہ شہدا اور قیصر التواریخ کے مورخین کا خیال ہے کہ انگریزوں کے توپ خانے کی زد میں آکر مجاہدین شہید ہوئے اور بعد ازیں انگریزوں نے مولوی امیر علی کو سزائے موت دے کر شہید کردیا۔ اس کے بعد مقدمہ بازی تو ہوتی رہی لیکن کوئی خاص مسئلہ پیدا نہ ہوسکا (افکار ملی ماہنامہ ۔ بابری مسجد نمبر2003) اس کے بعد انگریزوں نے اپنی سروے رپورٹس ، انتظامیہ کے شائع کردہ گزیٹرس وغیرہ میں بابری مسجد کے بارے میں لکھنا شروع کیا کہ یہاں پہلے مندر تھا چنانچہ اس سلسلے میں " مانگمری مارٹن اور پی کارینگی کی رپورٹس نے قیاسات کی بنیاد پر مندرکی جگہ مسجد کے مفروضے پیش کئے ۔

1870ء میں فیض آباد تحصیل کا بندوبست ہونے لگا تو قائم مقام ڈپٹی کمشنر پی کارینگی P.CARENGY نے تین مندروں (بشمول رام جنم بھومی استھان) کی جگہ مسجدوں کی تعمیر کا فتنہ چھیڑا تھا وہ بھی " مقامی طور پر سے یقین کئے جانے کی بنیاد پر" (نہ کہ کسی تاریخی شواہد یا ثبوت) کارینگی کی رپورٹ وہ پہلی رپورٹ جس میں مسجد مندر مسئلہ کھڑا کرنے کی کوشش کی گئی تھی۔ اس کے بعد برطانوی حکومت کے دور میں جن جن دستاویزات میں اسی رپورٹ کو بنیاد بناکر اور نمک مرچ لگاکر پیش کیا گیا ۔

1871ء میں ملک میں آثار قدیمہ کا محکمہ قائم کیا گیا ۔ آثار قدیمہ کے تعلق سے اہم کام الیگزینڈر کننگھم نے انجام دیا ۔ اس نے بھی مسلمانوں پر مندر مسمار کرنے کی باتیں لکھیں ۔ انگریزوں کی کوشش یہی تھی کہ ایک بڑی قضیہ کھڑا کردیا جائے وہ اس میں کامیاب رہے (بابری مسجد ۔ سید صباح الدین) ۔ انگریزوں نے اس قضیہ کو بڑھانے کی تدابیر کیں اور یہ تاثر قائم کیا کہ مندرکو مسمار کرکے بابری مسجد بنائی گئی تھی۔ بابری مسجد کے مقابل ایک خالی جگہ جو " جنم استھان" کہلاتا تھا صدہا برس سے خالی پڑا تھا تاہم ہندو وہاں پوجا ضرور کرتے تھے۔ 1963ء میں تھانیدار کی اعانت سے راتوں رات ایک چبوترہ بنالیا اور اس کو بڑا کرنے کی کوشش بھی کرتے رہے چنانچہ بابری مسجد کے متولی ، خطیب اور موذن محمد اصغر نے اس سلسلے میں1983ء اور 1984میں دو درخواستیں دی تھیں جس کا ذکر سید صباح الدین نے " بابری مسجد" نامی کتاب میں درج کیا ہے۔ دوسری جانب1985ء میں مہنت رگھو ویر داس اور دوسرے مہنتوں نے چبوترہ پر مندر تعمیر کرنے کی اجازت کیلئے عدالت میں درخواست دی تھی ۔ واضح ہو کہ یہ چبوترہ مسجد سے باہر تھا اور اس عرضی میں یہ دعویٰ نہیں کیا گیا تھا کہ بابری مسجد مندر توڑ کر بنائی گئی ہے ۔ نہ ہی بابری مسجد کو حاصل کرنے کی درخواست کی گئی تھی ۔ فیض آباد کے سبجج پنڈت ہری کشن نے یہ درخواست خارج کردی تھی ۔ اس فیصلے کے خلاف مہنتوں نے جواپیل کی تھی وہ بھی ڈسٹرکٹ جج نے خارج کردی لیکن انگریز جج (ایف ۔ اے چیمپئر) نے اپنے فیصلے میں بغیر کسی دلیل کے انگریز مؤرخوں کی پیروی میں لکھا کہ " یہ بات افسوسناک ہے کہ ایک مسجد ایسی زمین پر بنائی گئی جو ہندوؤں کے نزدیک خاص تقدس رکھتی ہے لیکن کیوں کہ واقعہ 356 سال قبل پیش آیا تھا لہٰذا اب اس کا تدارک ممکن نہیں ہے ۔ جملہ فریقین موجودہ حالت کو برقرار رکھیں"
(بابری مسجد اے ٹیل ان ٹولڈ A tale untold صفحہ 50 / محمد جمیل اختر)

1885ء کے بعد فریقین نے خاموشی اختیار کرلی تھی ہندوؤں نے بابری مسجد پر کوئی دعویٰ نہیں کیا وہ مسجد سے باہر واقع چبوترے پر پوجا کرتے رہے لیکن یہ خاموشی اور قضیہ کا آگے نہ بڑھنا انگریزوں کو پسند نہ تھا چنانچہ1905ء میں ایچ آر نیویل نے فیض آباد گزیٹر مرتب کیا اور صفحہ : 153 پر لکھا ۔۔
" 1528ء میں بابر نے اس روایتی جگہ پر اجودھیا میں مسجد بنائی جہاں رام پیدا ہوئے تھے" ۔ اس نے یہ بھی لکھا تھا " یہاں مسلمان حاکم کی موجودگی اور اس کے دربار کی وجہ سے ہندوؤں کی مقدس جگہیں پس پشت پڑگئیں" نیویل نے وہی جھوٹ باتیں دہرادی ہیں جو ماضی میں انگریز کہتے رہے تھے لیکن اس نے ہر بات یوں وثوق سے لکھی جیسے کہ ثابت شدہ تاریخی حقائق لکھ رہا ہے جبکہ اس کے پیشرو " قیاس ۔ مانا جاتا ہے" وغیرہ کے سہارے جھوٹ لکھا کرتے تھے۔ مسز اے ایس بیورج نے 1922ء میں تزک بابری کا انگریزی میں ترجمہ کیا اس کی بددیانتی کا حال یہ ہے کہ جب اس کو بابرنامہ مغلوں کے عہد کی کسی تاریخ سے یہ پتہ نہ چل سکا کہ بابرنے رام جنم استھان کو مسمار کرکے وہاں ایک مسجد بنائی تو اس نے بابرنامہ کے صفحہ656 پر 1905ء کے گزیٹر ایچ آر نیویل کا ہی بیان نقل کردیا بیورج نے بھی محقق کی جگہ قیاسات پر مبنی خیالات کا اظہار کیا ۔ اس نے بابرکی ایودھیا آمدکا ذکرکیا لیکن اس نے یہ بات قیاساً(Presumable) سے شروع کی ہے اوریہ بھی حیرت انگیز انکشاف کردیا کہ " تزک بابری" میں 935ھ (م 1528ء) کے چند جزوی واقعات تحریر نہیں کئے گئے جس کی وجہ سے اودھ کے متعلق معلومات حاصل نہیں کئے جاسکے۔

یہ تو تھیں انگریزوں کی ریشہ دوانیاں اور جوبات قضیہ نہ تھی اسے قضیہ بنانے کی کوشش کے احوال ۔
عام طور پر مانا جاتا ہے کہ آزادی کے بعد 22 اور 23 دسمبر کی درمیانی شب کو اچانک شر پسندوں نے بابری مسجد کا تالا توڑ کر مسجد میں گھس کر منبر کے پاس مورتیاں رکھ دیں لیکن ساری بات یوں نہیں ہے اس سلسلے میں کانگریس کا رول شروع سے آحر تک قابل مذمت رہا واضح ہو کہ بابری مسجد میں مورتیاں جب رکھی گئیں تب سے 1986ء میں بابری مسجد میں پوجا کی اجازت دیئے جانے اور 1992ء میں مرکز میں کانگریس کا راج تھا بلکہ اتر پردیش میں بھی زیادہ تر کانگریس کا راج رہا۔ سنگھ پریوار تو 1984ء میں مندر مسجد معاملے میں سامنے آئی تھی۔ ملک جب آزاد ہوا، گاندھی جی کے قتل سے پہلے اور بعد ایودھیا اور فیض آباد وغیرہ میں کیاحالات تھے اس کا اندازہ گاندھی جی کے چیلے اوررکن پردیش کانگریس کمیٹی اور سکریٹری کانگریس کمیٹی فیض آباد کے ان خطوط سے ہوتا ہے جو کہ انہوں نے اس وقت کے یو پی کے وزیر داخلہ لال بہادر شاستری (آنجہانی وزیراعظم ہند) کو لکھے تھے۔ 13/نومبر1949ء کو چبوترہ وسیع کرنے کیلئے بابری مسجد کے آس پاس جو قبریں تھیں ان کو کھود ڈالا گیا تھا گویا بابری مسجد میں بتوں کی تنصیب سے پہلے ہی اجودھیا میں کشیدگی تھی ۔ مزید تفصیلات اکشے کمار برہمچاری کے خطوط میں پڑھے جاسکتے ہیں
(افکار ملی ، ماہنامہ دہلی) کا بابری مسجد نمبر2003 صفحہ157 اور 'بابری مسجد' مرتبہ محمد عارف اقبال (حصہ دوم صفحہ449) ۔
شری اکشے برہمچاری نے لکھا تھا : میں تقریباً بارہ بجے کے ہمراہ بابری مسجد گیا (23دسمبر1949 ) جہاں مورتی رکھی ہوئی تھی تھوڑے سے آدمی مسجد کے پاس جمع تھے اس وقت آسانی سے مسجد کی حفاظت ہوسکتی تھی اور مورتی کو ہٹایا جاسکتا تھا۔ ضلع مجسٹریٹ نے اس کو مناسب نہیں سمجھا۔

آگے بڑھنے سے قبل یہ بتادیا جائے کہ دسمبر1949ء میں پنڈت گووند ولبھ پنت یو پی کے وزیر اعلیٰ تھے لال بہادری شاستری وزیر داخلہ تھے ۔ مسلمان قائدین میں مولانا آزاد ، سیف الدین کچلو، آصف علی، رفیع احمد قدوائی، ڈاکٹر سید محمود اور شیخ عبداللہ تھے لیکن اس سلسلے میں کسی کا کچھ کرنا و کہنا تو دورکی بات ہے کسی نے ایودھیا کا دورہ نہیں کیا ۔ دسمبر1949ء اور اس کے بعد فیض آباد کے ڈپٹی کمشنر کے کے نیر چاہتے تو 23دسمبر یا اس کے بعد مورتیاں مسجد سے ہٹائی جاسکتی تھیں۔ حد تویہ ہے کہ ڈپٹی کمشنر فیض آباد نے اس وقت کے چیف سکریٹری اتر پردیش بھگوان سہائے کو جواب دیا کہ "مسجد سے مورتیاں ہٹانے کو ایک خطرناک قدم قراردیا اور ایسا کرنے سے اپنی معذوری ظاہر کی"
('بابری مسجد' حصہ اول صفحہ327)

ممتاز قانون داں اور مصنف اے جی نورانی نے 1949-50ء کے مرکزی وزیر داخلہ سردار پٹیل اور وزیر اعلیٰ یو پی پنڈت گووند ولبھ پنت کی خط و کتابت انگریزی ماہنامہ " مین اسٹریم" میں شائع کی تھی جس سے یہ ثابت ہوتا ہے کہ دونوں رہنماؤں کو علم تھا کہ ایک مسجد کو مندر بنانے کی کوشش کی جارہی ہے ۔ دونوں قائدین نے سچائی کو تسلیم کرنے کے باوجود اس کو طاقت کے ذریعہ بحال کرنے کی جگہ تصفیہ ، افہام و تفہیم پر زور دیا اور "یکطرفہ کارروائی" سے احتراز کئے جانے اور جارحانہ اور دباؤ والے طریقوں کو اختیار کرنے کا مشورہ نہیں دیا۔ مسجد پر غاصبانہ قبضہ کو سردار اور پنت نے سچائی تسلیم کرنے کے باوجود " تصفیہ" کی ضرورت کیوں نہیں محسوس کی تھی۔ کیوں اس کا جواب کون دے
(بابری مسجد حصہ دوم ، محمد عارف اقبال صفحہ 455 تا 458)

مسجد پر ناجائز قبضہ برخواست کرنے کی جگہ ڈپٹی کمشنر کرشن کمار نائر نے مسجد اور متصل قبرستان کو قرق کرلیا اور مسجد میں تالا ڈال دیا گیا۔
مسلمانوں نے مقدمہ دائر کرنے کی مدت کے آخری دنوں میں 1961 ء میں یو پی سنی وقف بورڈ نے مذکورہ اراضی پر حق ملکیت کا دعویٰ کرتے ہوئے مسجد سے مورتی ہٹوانے کیلئے عدالت میں اپیل دائر کی ۔ اتنے اہم معاملے میں اس قدر تاخیر ناقابل فہم ہے۔
مندرجہ بالا واقعات سے بڑے بڑے کانگریسی قائدین اور اس دور کے مسلمان قائدین کی روش کا پتہ چلتا ہے ۔
1984ء دہلی میں ہندوؤں (وشواہندو پریشد) نے مسجد کا تالا کھلوانے کا مطالبہ کیا اس طرح سنگھ پریوار " مندر وہیں(جہاں بابری مسجد تھی) بنے گا" کے نعرے کے ساتھ میدان میں آگئی اس کا بی جے پی کو فوری فائدہ یہ ہوا کہ جہاں 1984ء کے انتخابات میں اسے صرف دو نشستیں پارلیمان میں حاصل ہوئی تھیں لیکن اگلے انتخابات میں یہ تعداد 90 سے زائد ہوگئی تھی۔ یہ بات بھی قابل ذکر ہے کہ کانگریس کے بے حد اہم اور سینئر قائد پنڈت نہرو کے ساتھی اور پنڈت نہرو اور لال بہادری شاستری کی موت کے بعد نگران وزیراعظم بننے والے شری گلزاری لال نندہ 1982ء میں وشواہندو پریشد میں شامل ہوگئے تھے اور 1983ء میں " شری رام جنم اتسو سمیتی " بنائی تھی۔

کانگریسی حکومتوں نے بابری مسجد کی ملکیت کے مقدمہ یا 1992ء میں بابری مسجد کی شہادت کے بعد شہادت کے مجرموں کے خلاف مقدمہ کی عاجلانہ یکسوئی کیلئے کچھ نہیں کیا لگتا یہی ہے کہ حکومتوں کی پالیسی کی بنیاد ٹال مٹول پر رہی حد تویہ ہے کہ لبراہن کمیشن کو بھی دل کھول کر مہلت دی گئی غرض کہ قانونی لحاظ سے معاملہ کی یکسوئی کی سنجیدہ کوشش کا ہمیشہ فقدان رہا۔
یکم فروری 1986ء ڈسٹرکٹ جج فیض آباد نے بابری مسجد کا تالا کھول کر ہندوؤں کو عام پوجا پاٹ کی اجازت دی عدالت نے یہ فیصلہ دیتے وقت قواعد و ضوابط کو اس حد تک بالائے طاق رکھا کہ فریق مخالف مسلمانوں کو اپنی رائے تک دینے کا موقع نہیں دیا گیاکمال تو یہ ہے کہ یہ حکم ایک ایسے فرد کی درخواست پر دیا گیا تھا جس کا کسی مقدمہ سے کوئی تعلق نہ تھا جبکہ ملکیت کے مقدمہ کے ایک اہم فریق محمد ہاشم کے عذر و دلائل کو ڈسٹرکٹ جج کے ایم پانڈے نے نہ صرف ایک دن قبل یو ایس پانڈے کی درخواست کا فیصلہ کرتے ہوئے اصل مقدمہ 1950ء کے اس عدالتی حکم جس کے تحت بابری مسجد کو مقفل کردیا گیا تھا نظر انداز کرکے بابری مسجدکو عملاً مندر میں تبدیل کردیا اور متنازع فیہ عمارت (جس کی ملکیت کا مقدمہ زیر سماعت تھا) کا مکمل اختیار فریق مخالف یعنی ہندوؤں کو دے دیا۔ اس درخواست کو منصف مجسٹریٹ نے مسترد کردیا تھا لیکن راجیو گاندھی جو اس وقت وزیراعظم تھے " ہندو ووٹ" کومضبوط کرنے کیلئے اپنے چچا ، مشیر اور مرکزی وزیر ارون نہرو کے مشورے پر بابری مسجد کا تالا کھلوایا تھا اسی واسطے اس فیصلے کی اور تالا کھولے جانے کی زبردست تشہیر ہوئی آل انڈیا ریڈیو اور دور درشن سے اس کی زبردست تشہیر کی گئی ۔
طرفہ ستم یہ ہے کہ ڈسٹرکٹ جج کے فیصلے کے خلاف محمد ہاشم کی اپیل کو الہ آباد کی عدالت العالیہ (ہائی کورٹ) نے مسترد کرتے ہوئے "جوں کی توں حالت" یعنی مسجد میں پوجا کی اجازت برقرار رکھی
(صفحہ73 پروفیسر ایس اے ایچ حقانی ، Secularism Under Siege)

سچ تو یہ ہے کہ اسی واقعہ کے بعد ملک بھر کے مسلمانوں کو بابری مسجد پر 1949ء سے کیا گذرتی رہی ہے بلکہ بابری مسجد کے وجود کا پتہ چلا ویسے 1984ء سے ہی ملک بھر میں بابری مسجد کا چرچا ہونے لگا تھا لیکن عام نہ تھا۔

راجیو گاندھی کے دور میں 9/نومبر1989ء کو "شیلا نیاس" کیا گیا تو کہ یہ عدالت کے حکم کے برخلاف امتناع فیہ علاقہ میں کیا گیا لیکن اس دور کے وزیر داخلہ بوٹا نسگھ نے یہ کہہ کر دھوکہ دیا کہ یہ ممنوعہ علاقہ سے باہر ہوا ہے ۔
30/اکتوبر1990ء کو یو پی میں ملائم سنگھ وزیر اعلیٰ تھے ہزاروں کارسیوکوں نے بابری مسجدکو منہدم کرنے کی کوشش کی ملائم سنگھ کے حکم پر ان کو روکنے کیلئے گولی چلائی گئی ۔ مسجد کو بچالیا گیا چند کارسیوک مارے گئے لیکن مسجد کو بچا لیا گیا ۔
نرسمہا راؤ کی بدنیتی کا حال ملاحظہ ہو وہ وزیراظم بنے تو ستمبر1991ء میں ایک بل پیش کیا گیا جس کے تحت مختلف مذاہب کی عبادت گاہوں کی حیثیت میں کوئی تبدیلی نہیں ہوگی اور 15اگست1947ء کو ان کی جو حیثیت تھی وہ برقرار رہے گی تاہم بابری مسجد کو نرسمہاراؤ نے اس بل کی شرائط سے مستثنیٰ رکھا(کیوں؟ نرسمہا راؤ کو بابری مسجد کی برقراری منظور نہ تھی)۔

بالآخر6-دسمبر کو بابری مسجد کو شہید کردیا گیا !!

مسجد کی شہادت سے قبل نرسمہا راؤ سارے ملک کو یہ کہہ کر دھوکہ دیتے رہے کہ مسئلہ حل کرلیا جائے گا سپریم کورٹ میں بھی مسجد کی برقراری اور نقصان نہ پہنچانے کا حلف نامہ نرسمہا راؤ نے اپنے دوست کلیان سنگھ سے داخل کروایا اور جس وقت مسجد شہید کی جارہی تھی نرسمہا راؤ سوتے رہے کارسیوکوں کو من مانی کرنے کی کھلی چھوٹ حاصل تھی پولیس اورنیم فوجی دستوں کو مداخلت سے روک دیا گیا اور نہ صرف مسجد شہید کردی گئی بلکہ اس کی جگہ عارضی مندر کی تعمیر تک نرسمہا راؤ کی مجرمانہ بے علی برقرار رہی ہے اس لئے بابری مسجد کی شہادت کا کلیدی مجرم نرسمہا راؤ کو کہا جاتا ہے۔

یوم عاشورہ اور 6/ڈسمبر

2011-12-04T12:33:00.003+05:30

سعودی ہجری تقویم کے مطابق پہلے اعلان ہوا تھا کہ 26/نومبر 2011ء کو یکم محرم الحرام 1433ھ قرار پائے گی۔ اس لحاظ سے یوم عاشورہ (10-محرم) ، 5-ڈسمبر کو آنے والا تھا۔
مگر کل ہفتہ 3/ڈسمبر کو قومی اخبارات نے اعلان کیا ہے کہ یوم عاشورہ ، 6/ڈسمبر کو قرار پایا ہے۔ بعد نماز عشاء ریاض کی تمام مساجد میں بھی اس کا اعلان کیا گیا۔
مفتی اعظم سعودی عرب شیخ عبدالعزیز بن عبداللہ آل شیخ نے فرمان جاری کیا ہے کہ یوم عاشورہ (10 محرم) کا روزہ 6-ڈسمبر بروز منگل کو رکھا جائے گا۔
سعودی سپریم کورٹ کے اعلان کے مطابق چاند نظر نہ آنے کے سبب 26/نومبر ، ماہ ذی الحجہ کا آخری دن قرار پایا تھا اور یوں 27/نومبر ، بروز پیر سے سعودی عرب میں محرم الحرام 1433ھ کی شروعات ہوئی ہے۔ اس لحاظ سے سعودی عرب میں یوم عاشورہ کا روزہ 6-ڈسمبر بروز منگل کو رکھا جائے گا۔

خبر بحوالہ
سعودی گزٹ : Ashoura on Tuesday
عرب نیوز : Muharram 10 is on Tuesday: Supreme Court

عجیب بات یہ ہے کہ انڈیا اور پاکستان میں بھی یوم عاشورہ 6-ڈسمبر منگل کو ہوگا۔ حالانکہ برسوں سے دیکھا گیا ہے کہ ایک دن کا فرق ضرور ہوتا ہے۔

اتفاق سے یوم عاشورہ یعنی 6-ڈسمبر ، بابری مسجد کی برسی کا بھی دن ہے۔ ہند کے تمام حساس شہروں بشمول حیدرآباد میں ریاستی حکومتوں کی جانب سے ہائی الرٹ کر دیا گیا ہے۔ اللہ کرے کہ یہ دن خیریت سے گزر جائے۔

غیر زبانوں کے الفاظ - شمس الرحمن فاروقی

2011-11-27T15:09:00.002+05:30

غیر زبانوں کے الفاظ
از : شمس الرحمن فاروقی
[بحوالہ : "لغات روزمرہ"، تیسرا اضافہ و تصحیح شدہ ایڈیشن]

غیر زبانوں کے جو لفظ کسی زبان میں پوری طرح کھپ جاتے ہیں، انھیں "دخیل" کہا جاتا ہے۔ اصول یہ ہے کہ صرف اور نحو کے اعتبار سے دخیل لفظ اور غیر دخیل لفظ میں کوئی فرق نہیں۔
جب کوئی لفظ ہماری زبان میں آگیا تو وہ ہمارا ہوگیا اور ہم اس کے ساتھ وہی سلوک روا رکھیں گے جو اپنی زبان کے اصلی لفظوں کے ساتھ روا رکھتے ہیں، یعنی اسے اپنی مرضی اور سہولت کے مطابق اپنے رنگ میں ڈھال لیں گے اور اس پر اپنے قواعد جاری کریں گے۔ لہٰذا یہ بالکل ممکن ہے کہ کسی دخیل لفظ کے معنی، تلفظ، جنس یا املا ہماری زبان میں وہ نہ ہوں جو اس زبان میں تھے جہاں سے وہ ہماری زبان میں آیا ہے۔ اردو میں عملاً اس اصول کی پابندی تقریباً ہمیشہ ہو ئی ہے۔ لیکن شاعری میں اکثر اس اصول کو نظر انداز کیا گیا ہے۔ صرف و نحو کی کتابوں میں بھی بعض اوقات اس اصول کے خلاف قاعدے بیان کیے گئے ہیں۔ یہ دونوں باتیں غلط اور افسوسناک ہیں۔ نحوی کا کام یہ ہے کہ وہ رواج عام کی روشنی میں قاعدے مستنبط کرے، نہ کہ رواج عام پر اپنی ترجیحات جاری کرنا چاہے۔ شاعر کا منصب یہ ہے کہ وہ حتی الامکان رواج عام کی پابندی کرتے ہوئے زبان کی توسیع کرے، اس میں لچک پیدا کرے نہ کہ وہ رواج عام کے خلاف جا کر خود کو غلط یا غیر ضروری اصولوں اور قاعدوں کا پابند بنائے۔

اردو میں دخیل الفاظ بہت ہیں اور دخیل الفاظ کے ذخیرے سے بھی بہت بڑا ذخیرہ ایسے الفاظ کا ہے جو دخیل الفاظ پر تصرف کے ذریعہ بنائے گئے ہیں۔ یہ تصرف کئی طرح کا ہو سکتا ہے۔

(1) غیر زبان کے لفظ پر کسی اور زبان کے قاعدے سے تصرف کر کے نیا لفظ بنانا۔ اس کی بعض مثالیں حسب ذیل ہیں:
* فارسی لفظ "رنگ" پر عربی کی تاے صفت لگا کر "رنگت" بنا لیا گیا۔
* فارسی "نازک" پر عربی قاعدے سے تاے مصدر لگا کر "نزاکت" بنا لیا گیا۔
* عربی لفظ "طرفہ" پر فارسی کی علامت فاعلی لگا کر "طرفگی" بنایا گیا۔
* فارسی لفظ "دہ /دیہہ" پر عربی جمع لگا کر "دیہات" بنایا اور اسے واحد قرار دیا۔
* عربی لفظ "شان" کے معنی بدل کر اس پر فارسی کا لاحقۂ کیفیت لگایا اور "شاندار" بنا لیا۔
* عربی لفظ "نقش" پر خلاف قاعدہ تاے وحدت لگا کر "نقشہ" بنا یا، اس کے معنی بدل دیے، اور اس پر فارسی لاحقے لگا کر "نقشہ کش/نقش کشی؛ نقشہ نویس/ نقشہ نویسی؛ نقشہ باز" وغیر بنا لیے۔
* عربی لفظ "تابع" پر فارسی لاحقہ "دار" لگا لیا اور لطف یہ ہے معنی اب بھی وہی رکھے کیوں کہ "تابع" اور "تابع دار" ہم معنی ہیں۔

(2) غیر زبان کے لفظ پر اپنی زبان کے قاعدے سے تصرف کرنا۔ اس کی بعض مثالیں حسب ذیل ہیں:
* عربی "حد" پر اپنا لفظ "چو" بمعنی "چار" اضافہ کیا ، پھر اس پر یاے نسبتی لگا کر "چو حدی" بنا لیا۔
* عربی لفظ "جعل" کے معنی تھوڑا بدل کے اس پر اردو کی علامت فاعلی لگا کر "جعلیا" بنایا گیا۔ فارسی کی علامت فارعلی لگا کر "جعل ساز" بھی بنا لیا گیا۔
* عربی لفظ "دوا" کو "دوائی" میں تبدیل کر کے اس کی جمع اردو قاعدے سے "دوائیاں" بنی۔
* فارسی لفظ "شرم" پر اپنا لاحقۂ صفت بڑھا کر "شرمیلا" بنا لیا۔
* فارسی لفظ "بازار" پر اردو لفظ "بھاؤ" لگا کر اردو قاعدے کی اضافت بنا لی گئی؛ "بازار بھاؤ"۔

(3) اپنی زبان کے لفظ پر غیر زبان کا قاعدہ جاری کر کے نیا لفظ بنا لینا۔ بعض مثالیں حسب ذیل ہیں:
* "اپنا" میں عربی کی تاے مصدری اور اس پر ہمزہ لگا کر "اپنائیت" بنایا گیا۔ لکھنؤ میں "اپنایت" بولتے تھے لیکن بعد میں وہاں بھی "اپنائیت" رائج ہوگیا۔ "آصفیہ" میں "اپنائیت" ہی درج ہے۔
* اردو کے لفظ پر "دار" کا فارسی لاحقہ لگا کر متعدد لفظ بنائے گئے؛ "سمجھ دار، چوکیدار، پہرے دار" وغیرہ۔
* اردو کے لفظ "دان" کا لاحقہ لگا کر بہت سے لفظ بنا لیے گئے ، جیسے:" اگردان، پیک دان، پان دان " وغیرہ۔

(4) غیر زبان کے لفظ سے اپنے لفظ وضع کرلینا۔ بعض مثالیں حسب ذیل ہیں:
* مصدر "گرم" سے "گرمانا"؛"شرم" سے "شرمانا" وغیرہ۔
* اسم "نالہ" سے "نالش"؛ "چشم" سے "چشمہ(بمعنی عینک)" وغیرہ۔
* صفت "خاک" سے "خاکی" (رنگ، انگریزی میں Khaki کا تلفظ "کھیکی")

(5) غیر زبان کے طرز پر نئے لفظ بنا لینا۔ مثلاً حسب ذیل لفظ فارسی / عربی میں نہیں ہیں، اردو والوں نے وضع کیے ہیں:
* بکر قصاب؛ دل لگی؛ دیدہ دلیل؛ ظریف الطبع؛ قابو پرست؛ قصائی؛ ہر جانہ؛ یگانگت وغیرہ۔

(6) اپنا اور غیر زبان کا لفظ ملا کر، یا غیر زبان کے دو لفظ ملا کر اپنا لفظ بنا لینا، مثلاً:
آنسو گیس (اردو، انگریزی)؛ بھنڈے بازار (اردو، فارسی)؛ خچر یاتری (اردو ، انگریزی)؛ خود غرض (فارسی، عربی)؛ گربہ قدم (فارسی، عربی) وغیرہ

جیسا کہ میں نے اوپر کہا ہے، دخیل الفاظ ، چاہے وہ براہ راست دخیل ہوئے ہوں یا ان کے زیر اثر مزید لفظ بنے ہوں، سب ہمارے لیے محترم ہیں۔ کسی دخیل لفظ، کلمے یا ترکیب کو، یا اس کے رائج تلفظ یا املا کو یہ کہہ کر مسترد نہیں کیا جاسکتا کہ جس زبان سے یہ لیا گیا ہے وہاں ایسا نہیں ہے۔ جب کوئی لفظ ہماری زبان میں آگیا تو اس کے غلط یا درست ہونے کا معیار ہماری زبان،اس کے قاعدے، اور اس کا روز مرہ ہوں گے نہ کہ کسی غیر زبان کے۔

ہمارے یہاں یہ طریقہ عام ہے کہ کسی لفظ یا ترکیب یا اس کے معنی کے لیے فارسی سے سند لاتے ہیں اور کہتے ہیں کہ چونکہ فارسی میں ایسا ہے، اس لیے اردو میں بھی ٹھیک ہے۔ یہ طریقہ صرف اس حد تک درست ہے جب تک فارسی کی سند ہمارے روزمرہ یا ہمارے رواج عام کے خلاف نہ پڑتی ہو۔
"فارسی میں صحیح ہے اس لیے اردو میں صحیح ہے"، یہ اصول بھی اتنا ہی غلط ہے جتنا یہ اصول کہ "فارسی [یا عربی] میں غلط ہے، اس لیے اردو میں بھی غلط ہے۔"
مثال کے طور پر "مضبوط" کو جدید فارسی میں "مخزون" کے معنی میں بولتے ہیں۔ ہم کہتے ہیں کہ مثلاً "یہ کتاب نیشنل لائبریری میں مخزون ہے"۔ یہاں فارسی والا "مضبوط" کہے گا۔ ظاہر ہے کہ فارسی کی یہ سند اردو کے لیے بے معنی ہے۔

یہ بات صحیح ہے کہ اردو نے فارسی /عربی سے بے شمار الفاظ ، محاورات اور تراکیب حاصل کیے ہیں۔
لہٰذا یہ بالکل ممکن ہے کہ اگر اردو میں کسی عربی/فارسی لفظ کے بارے میں کوئی بحث ہو تو ہم عربی/فارسی کی سند لا کر جھگڑا فیصل کرلیں۔ لیکن شرط یہی ہوگی کہ عربی /فارسی کی سند ہمارے رواج عام یا روزمرہ کے خلاف نہ ہو۔ مثلاً لفظ "کتاب" کی جنس کے بارے میں اختلاف ہو تو یہ سند فضول ہوگی کہ عربی میں "کتاب"مذکر ہے، لہٰذا اردو میں بھی یہ لفظ مذکر ہوگا/ہونا چاہیے۔ اسی طرح، اگر یہ سوال اٹھے کہ "طشت از بام ہونا" صحیح ہے کہ نہیں، تو یہ استدلال فضول ہوگا کہ فارسی میں "طشت از بام افتادن" ہے، لہٰذا اردو میں بھی "طشت از بام گر پڑنا" ہونا چاہیے۔ دوسری بات یہ کہ ہمارے یہاں یوں بولتے ہیں، "سارا معاملہ طشت از بام ہو گیا"، جب کہ فارسی میں یہ محاورہ "طشت" کے حوالے سے بولتے ہیں، یعنی یوں کہتے ہیں:"طشت از بام افتاد"۔ ظاہر ہے کہ یہ ضد کرنا بھی غلط ہے کہ اردو میں بھی یوں ہی بولنا چاہیے۔
یا مثلاً اردو میں "لطیفہ" کے معنی ہیں، "کوئی خندہ آور چھوٹی سی کہانی یا چٹکلا"۔ یہ معنی نہ فارسی میں ہیں نہ عربی میں۔ لیکن ظاہر ہے کہ اردو میں رائج معنی کو اس بنا پر مسترد نہیں کیا جاسکتا ۔ اگر کوئی شخص "لطیفہ" کو اردو میں "سخن خوب و نیکو" ، یا "اچھی چیز، اچھائی" کے معنی میں استعمال کرے اور کہے کہ (مثلاً) "مقدمہ شعر و شاعری لطیفوں [یا لطائف] سے بھری ہوئی ہے" درست استعمال ہے ، کیوں کہ فارسی میں "لطیفہ"بمعنی "سخن خوب" اور عربی میں بمعنی "اچھی چیز" وغیرہ ہے، تو اس کی بات قطعی غلط قرار دی جائے گی۔
لہٰذا بنیادی بات یہی ہے کہ جو استعمال، لفظ ، ترکیب، کلمہ ، اردو کے قاعدے یا رواج کے مطابق ہے، وہ صحیح ہے۔ دوسری بات یہ کہ اردو پر غیر زبانوں، خاص کر عربی /فارسی کے قاعدے جاری کرنا درست نہیں ہے، اس لے کو جتنا دھیما کیا جائے ، اچھا ہے۔

بشکریہ : فیس بک تحریر

آئینہ سچ کہتا ہے مگر ۔۔۔

2011-11-23T14:33:00.001+05:30

جہاں تک خواہش نفس کا تعلق ہے ہم سب اسی کے تو غلام ہیں۔ لاکھ کوششوں کے باوجود اسے مغلوب نہیں کر پاتے۔ تمام برائیاں ، بگاڑ ، یہ سب خواہش نفس کی تکمیل کے لئے ہماری کوششوں کا نتیجہ ہے۔ جس نے خواہش نفس کو مغلوب کر لیا وہ ولی یا پھر فرشتہ صفت بن گیا۔ یہ خواہشات نفس ہی تو ہیں جس کی وجہ سے انسان درندہ بن گیا ہے۔ ہر شئے کو پانے کی تمنا ، قناعت پسندی سے اجتناب ، کمزور ایمان ، خواہش نفس کی تکمیل کے لئے ہر جائز و ناجائز کام کے لئے اکساتے ہیں۔

رہی بات انسان کا اپنے آپ کو اچھا سمجھنے کی۔ تو یہ بھی اس کے نفس کی بدولت ہے۔ آئینہ سچ بولتا اور سچ دکھاتا ہے مگر یہ سچ اپنے سے متعلق ہو تو کڑوا ہونے کے باوجود ہمیں امرت لگتا ہے۔ ہم اپنے آپ کو دوسروں سے اچھا سمجھتے ہیں۔ اسلئے کہ بقول کسی مفکر کے ، دوسروں کی آنکھوں کا تنکا تو نظر آ جاتا ہے مگر خود کی آنکھوں کا شہتیر نظر نہیں آتا۔ ہم ہمیشہ دوسروں کا جائزہ لیتے رہتے ہیں اور خود اپنے محاسبے کی عادت نہیں ہے۔ جس دن محاسبہ کرنے لگیں گے اس دن سے ہم اپنی اصلیت کو جان جائیں گے اور ہلاکت سے بچ جائیں گے۔
جب انسان خود کو اچھا سمجھنے لگتا ہے تو دوسروں کو خود سے کمتر جاننے لگتا ہے۔ احساس برتری میں مبتلا ہو کر دوسروں کی توہین و تضحیک کرنے لگتا ہے۔ دوسروں سے متعلق اس کا رویہ ناقدانہ اور ناصحانہ ہو جاتا ہے۔ وہ خود کو خدائی فوجدار سمجھنے لگتا ہے۔ جب وہ اس مقام پر پہنچ جاتا ہے تو یہ اس کی تباہی اور زوال کا نقطہ آغاز ہو جاتا ہے۔ بس یہی اس کی ہلاکت ہے۔
مذہب سے دوری ، اخلاقی تعلیمات کی کمی ، دولت کی فراوانی ، خوشامد پسندوں کا ساتھ ، اسے اس مقام تک پہنچا دیتا ہے۔ یہی وجہ ہے کہ خوشامد پسندوں سے دور رہنے کی تاکید کی گئی ، سامنے تعریف کرنے والے کے لئے قتل کی سزا رکھی گئی ہے۔ منہ پر تعریف کرنے والے کے منہ میں خاک کہا گیا۔
افسوس اس بات کا ہے کہ ہم اس قسم کے لوگوں میں رہنا پسند کرتے ہیں جو ہماری تعریف کر کے ہمیں ہلاکت میں ڈالنا چاہتے ہیں۔ اگرچہ کہ ہم یہ ظاہر کرنا چاہتے ہیں کہ ہم تعریف سے خوش نہیں ہوتے ، مگر یہ حقیقت ہے کہ سچ کہنے والوں ، ہمیں اپنی اصل حقیقت دکھانے والوں کے ساتھ رہنا ہم گوارہ نہیں کرتے۔ صحت مند تنقید کرنے والوں کو ہم حاسد سمجھتے ہیں۔ اور اپنے مفادات کے لئے جھوٹی تعریف کرنے والوں کو اپنا دوست اور ہمدرد۔
جب یہی ہمدرد پوری طرح سے تباہی کے دلدل میں پہنچا دیتے ہیں تو ہوش آتا ہے مگر اس وقت تک کافی دیر ہو چکی ہوتی ہے۔

**

اقتباس بشکریہ : اداریہ ہفت روزہ "گواہ" (25/نومبر/2011) - فاضل حسین پرویز

ہو گئی قربانی ۔۔۔

2011-11-08T03:50:00.002+05:30

الحمد للہ قربانی ہوگئی !
بکرے کٹے بھی اور تقسیم بھی ہو گئے۔ گھر گھر سے کلیجی اور بٹ کے پکوان کی خوشبو نے اعلان کیا کہ امّتِ ابراہیمی کے ہر فرزند نے مزے لے لے کر سنّتِ ابراہیمی کا لطف اٹھایا۔ حضرت ابراہیم(علیہ السلام) کو تو مفت میں فرشتوں نے دُنبہ پیش کردیا اور بغیر کسی مشقّت کے انہوں نے ایک اکیلے بکرے کو ذبح کردیا۔لیکن فرزندانِ امتِ ابراہیمی کودو دو اور چار چار بکرے ڈھونڈھنے، قصّاب کو لانے، اور پھرصاف صفائی میں جتنی محنت اور مشقّت سے دوچار ہونا پڑا یہ تو حضرتِ ابراہیم (علیہ السلام) کو بھی نہیں کرنا پڑا۔ اور نہ انہیں علماء سے پوچھنا پڑا کہ بکرے کی عمر کیا ہو، اسکا رنگ کیسا ہو، اسکی ٹانگ اور کان کیسے ہوں، اور نہ بی بی ہاجرہ(علیہا السلام) کو گوشت صاف کرنے، اچھے والا گوشت سمدھاوے میں بھیجنے ، درمیانی گوشت رشتہ داروں میں اور کم درجے کا گوشت غریبوں کو دینے کیلئے پیکٹس بنانے کی زحمت اٹھانی پڑی۔ اور نہ انہیں مسلمان بستیوں میں سے گزرتے ہوئے ناک پررومال رکھنے کی نوبت آئی جہاں قربانی کرکے اوجڑی ، خون اور غلاظت گلی میں پھینک دینا مسلمانوں کیلئے ثواب میں شامل ہے۔ سلام ہو حضرت ابراہیم(علیہ السلام) پر کہ جنہوں نے بیٹے کی قربانی پیش کردی اور ہمارے لئے اتنی آسان سنت چھوڑ گئے کہ ثواب کا ثواب بھی اور لذیذ گوشت کے مزے بھی۔
غیر مسلم بھی دیکھتے ہونگے تو حیرت میں پڑجاتے ہونگے کہ جس قربانی کو اللہ تعالیٰ " إن هذا لهو البلاء المبين بے شک یہ سب سے بڑی آزمائش ہے " کہتا ہے۔ جس قربانی پر اللہ تعالیٰ " سلام على إبراهيم یعنی ابراہیم پر سلام ہو" کہہ کر انکی قربانی کو سلام کرتا ہے۔ اور اسکو ذبح عظیم یعنی عظیم ذبیحہ قرار دیتاہے کیا وہ قربانی یہی ہیکہ اس کی یاد میں ہر سال لاکھوں جانوروں کا خون بہادیاجائے؟ ایک دو وقت کا مزے لے کردستر خوان سجایاجائے؟ جس قربانی کے نتیجے میں اللہ تعالیٰ فرماتا ہے کہ " إني جاعلك للناس إماما " یعنی ہم آپ کو تمام انسانوں کی امامت اور قیادت یعنی لیڈرشپ بخشیں گے۔اگر لاکھوں جانوروں کو ذبح کرنے سے دنیا کی قیادت مل سکتی تھی تو آج مسلمان چاہے وہ مسلم ملکوں کے تاجدار ہوں کہ دوسرے ملکوں کے خستہ حال، سارے کے سارے امریکیوں، یہودیوں یا ہندووں کے رحم و کرم پر نہ ہوتے۔ اگر اللہ تعالیٰ اس گوشت کی تقسیم پر سلام بھیجنے والا ہوتا تو نہ آج ہندوستانی مسلمان اخلاقی اور معاشی طور پر ہریجنوں سے بد تر ہوتے اورنہ پاکستانیوں پر دہشت گردی اور کرپٹ ہونے کے الزام ہوتے۔ اس کا سبب صرف ایک ہے ۔ وہ یہ کہ ہم جو ذبیحہ کر رہے ہیں وہ تو الحمدللہ فقہی اعتبار سے مکمل سنتِ ابراہیمی پر مبنی ہے لیکن اس کی نیّت ، نیّت ابراہیمی و نیّت اسماعیلی نہیں۔ آپ کہیں گے یہ کون سی نئی نیّت ہے؟

جی نہیں۔ یہ کوئی نئی نیّت نہیں ہے۔ یہ قربانی کی اصل روح ہے۔ جو کچھ آپ کررہے ہیں وہ تو صرف ایک جسم ہے۔ جب تک اس میں روح نہ ہووہ جسم بے جان ہے۔ یہاں امام بخاری(رحمۃ اللہ) کی حکمت سمجھ میں آتی ہے جنہوں نے "تمام اعمال کا دارومدار نیّتوں پر ہے " والی حدیث کو سرِکتاب رکھا۔ جس وقت حضرت ابراہیم(علیہ السلام) چُھری پھیرنے لگے تھے اُس وقت اُن کے ، حضرت اسماعیل(علیہ السلام) کے اور بی بی ہاجرہ کے ذہن میں جو عزم اور ارادہ چل رہا تھاوہ دراصل نیّت ہے جو قربانی کرنے سے پہلے آپ کے ذہن میں سچے دل سے چلنا چاہئے۔ یہ چیز اللہ تعالیٰ کے ہاں پہنچتی ہے۔ گوشت دنیا والوں کیلئے ہے اور نیّت اللہ تعالیٰ کیلئے ہے۔ اگر نیّت ہی نہ پہنچے تو زمین پر ایک جانور کا گلا کاٹ کر آپ نے کوئی ایسا کام نہیں کیا جس سے آپ کی زندگی میں کوئی انقلاب آئے گا۔
لن ينال الله لحومها ولا دماؤها ولكن يناله التقوى منكم ۔ سورہ الحج - آیت 37
یعنی "ا للہ تعالیٰ کے ہاںقربانی کا نہ گوشت پہنچتا ہے نہ اسکا خون بلکہ اسکے پاس تمہارا تقویٰ پہنچتا ہے"۔

یہ تقویٰ ہی دراصل وہ نیّت ہے جو چھری پھیرنے سے پہلے سچے دل سے نکلتی ہے۔ پتہ یہ چلا کہ جانور کو ذبح کرنا اصل سنّت نہیں بلکہ وہ نیّت یا ارادہ اصل سنت ِ ابراہیمی یا سنّتِ اسماعیلی ہے جسکے بغیر ہم نے اگر دس دس بکرے بھی کاٹ ڈالے تو یہ اللہ کے ہاں پہنچنے والے نہیں۔چونکہ یہ نیّت فقہہ کی کتابوں میں لکھی نہیں ہوتی اور نہ ہمارے مفتی سمجھاتے ہیں اسلئے یہ بات عجیب سی لگ رہی ہے۔اصل سنت ایک مستحب بن گئی ہے۔ آیئے آئندہ سال کیلئے اس نیّت کو ابھی سے اپنے دل میں پیدا کرنے کی کوشش کریں۔ جب یہ یقین ہوجائے کہ واقعی اس نیّت پر عمل کرنے کی ہمت ہے تو پھر قربانی کریں ۔قربانی صرف جانور کو ذبح کرنے کا نام نہیں۔ یہ تو اصل قربانی کے عمل کی آخری قسط یا Episode ہے ۔ قربانی کا بکرا لانے کیلئے بکرا مارکٹ جانے سے پہلے کچھ ہوم ورک بہت ضروری ہے ورنہ آپ کا حال اس طالبِ علم کا ہوگا جو اسٹیٹ کا Topperبننے کا ارمان تو رکھتاہے لیکن بغیر اسٹڈی کیئے امتحان ہال میں پہنچ جاتاہے۔ یہ دلیل پیش کرتاہے کہ اسکا لباس، قلم، ہال ٹکٹ، وقت کی پابندی سب کچھ طریقے کے مطابق ہے، پرچہ بھی اسکا صاف ستھراہے۔ لہذا اسکو پورے نمبر ملنے چاہئے۔

بکرا خریدنے کا پہلا مرحلہ:
اگر آپ نے قربانی دینے کا تہیّہ کرلیا ہے تو گھر سے نکلنے سے پہلے ذرا گھر کے اندر حضرت ابراہیم(علیہ السلام) کی طرح مانباپ کے عقیدے اور آمدنی پر نظر ڈالنی ہوگی۔اگر گھر میں ناجائز کاروبار کی آمدنی آرہی ہو، رشوت، زمینوں پہ قبضے، جھوٹ اور فریب سے کمائی میں اضافہ ہورہاہو، جہیز کا مال جو کہ لڑکی کے باپ سے سسٹم کے نام پر وصول کیاگیاہو، اللہ اور اسکے رسول (صلی اللہ علیہ وسلم) کی کھلی نافرمانی ہوتی ہو تو بکرا خریدنے سے پہلے گھر والوں کو سمجھانافرض ہے۔جب کوئی نہ مانے تو گھر چھوڑدینا سنّتِ ابراہیمی (علیہ السلام) ہے۔ یہ ہے بکرا مارکٹ چلنے کا پہلا مرحلہ۔

دوسرا مرحلہ :
پھر محلے اور شہر والوں کو دینِ حنیف یعنی ایک اللہ کی بندگی کی دعوت دینا۔ اور اس بات کیلئے تیار رہنا کہ آپ کو سزائے موت بھی دی جاسکتی ہے۔ آپ کو قدم قدم پر قانون کا خوف، گھر اور شہر سے نکال دیئے جانے کا خوف، بچوں کے مستقبل کا خوف راستہ روکیں گے۔ لیکن اگر آپ جانور کی قربانی دینے پر بضد ہیں تو یہ سب آپ کونہ صرف برداشت کرنا ہے بلکہ اسکا مقابلہ کرنا ہے۔ ضرورت پڑے تو گھر، محلہ، شہر اور ملک بھی چھوڑنا ہے۔ یہ ہے بکرا مارکٹ کے راستے کا دوسرا مرحلہ۔

تیسرا مرحلہ:
اب اولاد رکاوٹ بنے گی۔یہ سب سے اہم مرحلہ ہے۔ انسان اولاد کی محبت میں سب کچھ کرسکتاہے۔ اگر ہم سوتے ہوئے اپنے اپنے اعمال کا احتساب کریں تو پتہ چلے گا کہ ہمارے 90% بداعمالیاں صرف اس اولاد کے اچھے مستقبل کی خاطرسرزد ہوئی ہیں جسکی خاطر ہم اللہ اور اسکے رسول(صلی اللہ علیہ وسلم) کا کوئی بھی حکم ٹال سکتے ہیں۔ انکار تو نہیں کرتے لیکن جانتے بوجھتے وہ حکم ٹال کر دل میں یہ نیّت کرلیتے ہیں کہ اللہ معاف کرنے والا ہے۔ بعد میں نماز، روزہ یا کوئی وظیفہ یا درود و سلام پڑھ کر، خیرات زکوٰۃ دے کر، نفل عمرے و حج کرکے یا کسی بزرگ کی درگاہ پر حاضری دے کر یا میلادالنبی خوب دھوم دھام سے مناکر اللہ اور اسکے رسول کو منالیں گے۔انہیں ایسے مولوی اور مشائخ بھی آسانی سے مل جاتے ہیں جو شفاعت اور مغفرت کے ایسے ایسے Shortcut وسیلے فراہم کرتے ہیں کہ علماء بھی دنگ رہ جاتے ہیں۔ شریعت منہ دیکھتی رہ جاتی ہے۔
بکرا خریدنے کا یہ تیسرا مرحلہ بہت سخت ہے۔ اولاد کو اللہ کے حکم کے آگے ذبح کرنا تو درکنارانسان اولاد کو ایک کانٹا بھی چبھے یہ برداشت نہیں کرسکتا۔ اور اگر کوئی عزم کربھی لے تو شیطان آکروہی کہتا ہے جو ابراہیم(علیہ السلام)، اسماعیل(علیہ السلام) اور بی بی ہاجرہ سے کہتا تھا جسے سن کر انہوں نے کنکریاں دے ماریں ۔ آج بھی وہ ایک سچے مسلمان باپ سے کہتاہے " دوسرے سارے احکام تو پورے کرہی رہے ہیں۔ داڑھی رکھی ہے، بیوی پردہ بھی کرہی لیتی ہے۔ نماز ، روزہ، زکوٰۃ سب کچھ تو ادا کرتے ہی ہیں بعض معاملات میں اگر اولاد کی خاطر سمجھوتہ بھی کرنا پڑے تو برائی کیا ہے۔ اللہ تعالیٰ معاف کرنے والا ہے"۔ اُدھر جاکر اولاد کے دل میں یہ وسوسہ ڈالتاہیکہ "تمہارا باپ اپنی مرضی چلانا چاہتاہے چاہے اولاد کا مستقبل تباہ ہوجائے"۔ اور اُدھر بیوی کو جاکر یہ بھڑکاتاہے اور کہتا ہے "تمہارے شوہر کو بس دین معلوم ہے، دنیا کیا معلوم۔ اولاد کیلئے لوگ کیا نہیں کرتے لیکن ایک یہ آدمی ہیکہ غیر ذمہ دار اور لاپروا ہے۔ تم اسکی ایک بات بھی نہ سننا۔ وہی کرنا جو اولاد کیلئے بہتر ہو۔ اگر شوہر ناراض بھی ہوگا تو تھوڑی دیر غصّہ کرے گا اور پھر چپ ہوجائے گا"۔
شیطان کی اس طاقتورچال سے بچ کر نکلنا ہر ایک کے بس کی بات نہیں۔ اگر آپ اس سے نکل سکتے ہیں تو چلئے اب بکرا خریدیئے۔ اور چُھری چلاتے ہوئے دل میں یہ ٹھوس نیّت کیجئے۔

ایک باپ کی نیّت یوں ہوگی:
اے اللہ تیرے حکم کے آگے گھر، مانباپ، شہر اور ملک ہی نہیں اگر اولاد کو بھی چھوڑنا پڑے تو چھوڑ دونگا، تیر ی مرضی کے آگے اگراولاد کو اس بکرے کی طرح قربان بھی کرنا پڑے تو کردونگا ۔ بسم اللہ اللہ اکبر۔۔۔۔

ایک بیٹے یا بیٹی کی نیّت یہ ہوگی:
اے اللہ، تیری رضا کیلئے اپنی جان بھی لٹادینگے ۔ اگر تیرا حکم ہیکہ والد کی فرمانبرداری میں اپنا گلا بھی ذبح کرنے کیلئے پیش کردوتو اسماعیل (علیہ السلام) کی طرح پیش کردینگے ۔
بسم اللہ اللہ اکبر۔۔۔۔۔۔۔

ایک بیوی کی نیّت:
اے اللہ تیری رضا کی خاطر شوہر کی خواہش یا حکم کے آگے سرِ تسلیم خم کردونگی۔ تیرے حکم پر اگر وہ اولاد کو بھی قربان کردینے کا ارادہ کرلے تو میں شیطان کا نہیں اسکا ساتھ دونگی۔
بسم اللہ اللہ اکبر۔۔۔۔۔۔۔

جب یہ قربانی کا گوشت گھر گھر پہنچ جائیگا تو یہ اعلان ہوجائیگا کہ اس آدمی نے عہد کرلیا ہے کہ وہ اللہ کے حکم کے آگے اولاد کو بھی قربان کرسکتاہے۔ جب اولاد کی بھی وہ پروا نہیں کرے گا تو دوسرے کس شمار میں۔ اسلئے اب اس آدمی پر اعتبار کیا جاسکتاہیکہ وہ انصاف کرے گا، کبھی جھوٹ دھوکہ فریب رشوت اور ناجائز کمائی کا سہارا نہیں لے گا۔اگر ہر باپ کا یہ اعلان گھر گھر پہنچے گا تو کیسے ممکن ہے کہ معاشرہ میں برائیاں پنپیں، لوگ اولاد کی خاطر اللہ کی نافرمانی کریں؟
جب یہ گوشت گھر گھر پہنچے گا تو لوگوں کو معلوم ہوجائیگاکہ اس شخص نے اپنے والد کی فرمانبرداری کا اعلان کردیا ہے۔ جس طرح اسکے والد پر اعتبار کیا جاسکتاہے اس پر بھی اعتبار کیاجاسکتاہے۔ جب یہ اعلان گھر گھر ہو توپھر کیسے ممکن ہے کہ اولاد آوارہ نکلے، والدین کا دل دکھائے۔ والدین کے دین اور تہذیب کو چھوڑ کر کسی اور راستے پر نکل پڑے؟لوگ جوڑا جہیز کو جائز سمجھیں، بہویں اپنے شوہروں کو لے کر ساس سسر سے علہٰدہ ہوجائیں اور ان بوڑھوں کی عزتِ نفس کو تکلیف پہنچے؟
جب یہ گوشت دوسری عورتوں تک پہنچے گا تو یہ اعلان ہوجائیگا کہ یہ عورت خدا کے بعد اپنے شوہر کو درجہ دینے والی ہے۔ اسکے ہر حکم پر اپنی جان اور اپنی اولاد کو بھی قربان کرسکتی ہے۔ اگر بیوی ابرا ہیم (علیہ السلام) کی اہلیہ حضرت بی بی ہاجرہ (علیہا السلام) کے نقشِ قدم پر ہوکہ جب ابراہیم(علیہ السلام) نے انہیں مکہ میں جبکہ مکہ تعمیر بھی نہیں ہوا تھا ایسی جگہ تنہا چھوڑا اور واپس پلٹے تو وہ ایک بیوی کے صبر اور اللہ کی اطاعت کا عظیم ترین امتحان تھا۔ اس عظیم بیوی نے یہ بحث نہ کی کہ کس کے بھروسے چھوڑ کر جارہے ہو، اناج، پانی اور گھر کا انتظام کئے بغیر کسطرح جاسکتے ہو۔ صرف اتنا پوچھا کہ "کیا یہ اللہ کا حکم ہے؟"۔ جواب ہاں میں سننے کے بعد انہوں نے فوری سر جھکادیا۔یہی نہیں بلکہ جتنے سال بعد حضرت ابراہیم (علیہ السلام) آئے تب تک بیٹے اسماعیل (علیہ السلام) بڑے ہوچکے تھے۔ اس دوران ایک بیوی اپنے بیٹے کے کان بھر سکتی تھی کہ دیکھو تمہارا باپ کتنا غیر ذمہ دار ہے، سوتن کے پاس رہ رہا ہے اور تنہا صحرا میں بے یارو مددگار، بے گھر اور بے روزگار چھوڑ کر بچے کی کبھی خیریت لینے کا بھی اسے خیا ل نہ آیا۔ بجائے یہ سب کہنے کہ اس عظیم ماں نے ایسا کیا تربیت کی ہوگی کہ بیٹا ہوش سنبھالنے کے بعد پہلی بار باپ کو دیکھتا ہے اور ذبح ہونے کیلئے اپنا گلا پیش کردیتاہے۔ اسقدر نووارد باپ پر اعتماد اور یقین کہاں سے ایک بیٹے کے دل میں آیا۔ یہ دراصل اس عظیم ماں کی تربیت تھی جس نے شوہر کے غیاب میں بھی اولاد کے ذہن پر باپ کا وہ امیج بنایا کہ اسے یقین ہوگیا کہ ہمارا باپ اللہ کے حکم سے ہٹ کر کچھ نہیں کرتا۔ ہر وہ عورت جس کے نام کی قربانی آج ہوتی ہے اگر وہ بھی بی بی ہاجرہ (علیہا السلام) کی نیّت کرے اور شوہر اور اسکے خدا پر ایسا ہی اعتماد و یقین پیدا کرلے تو پھر کیسے ممکن ہے کوئی بیوی شوہر سے بحث یا حجّت کرے، اسکی مرضی جانتے ہوئے بھی اسکے خلاف کرکے بچوں کو یہ سبق دے کہ گھر میں صرف ماں کی چلتی ہے باپ کی نہیں باپ تھوڑی دیر پکارے گا اور پھر چپ ہوجائگا۔ لہٰذا باپ کی خواہش کو نظر انداز بھی کیاجا سکتا ہے ۔ جس گھر میں بیوی شوہر سے بحث کرنے والی ہو ، شوہر سے اونچی آواز میں غصہ دکھانے والی ہو، ہر بات میں شکایت اور طنز کرنے والی ہو اس گھر میں کبھی برکت نہیں ہوتی، اولاد نافرمان نکلتی ہے۔ اور پھر ان کی اولادیں بھی ان کی نافرمان نکلتی ہیں۔شائد اسی لئے جب حضرت ابراہیم (علیہ السلام) مکہ تشریف لائے اور بہو سے ملے، خیر خیریت پوچھی تو بہو نے بجائے صبر و شکر و قناعت کا جواب دینے کے، شوہر اور حالات کی ناشکری بیان کی۔ طنز و شکایت بیان کرنے لگی۔ حضرت ابراہیم (علیہ السلام) نے بیٹے کو مشورہ دیا کہ چوکھٹ بدل دیں۔ یعنی اس بیوی کو چھوڑ دیں۔ اسماعیل(علیہ السلام) نے ایسا ہی کیا۔ جب اگلی بار ابراہیم (علیہ السلام) مکہ تشریف لائے اور دوسری بہو سے خیر خیریت پوچھی تو انہوں نے اللہ کا شکر ادا کیا اور ہر حال میں قناعت اور شوہر کی فرمانبرداری کا اظہار کیا۔ حضرت ابراہیم(علیہ السلام) نے انہیں دعا دی۔اور آپ جانتے ہیں کہ بی بی ہاجرہ (علیہا السلام) اور ان کی فرمانبردار بہو کی کوکھ سے پیغمبروں کی نسل چلی۔ یہی اللہ تعالیٰ کا انعام ہوتا ہیکہ جب بیویاں ہر معروف میں اپنے شوہر کی بلا چوں و چرا اطاعت کرتی ہیں وہ جن حالات میں رکھیں خوش رہ کر شوہر کو بھی خوش رکھتی ہیں اللہ تعالیٰ ان کے گھروں میں نہ صرف برکتیں نازل فرماتا ہے بلکہ ان کی گودوں سے صالحین پیدا ہوتے ہیں۔

مختصر یہ ہیکہ بکرے کی قربانی تو محض ایک علامت یا Symbol ہے اس قربانی کے جذبے کا جسکے نتیجے میں پورا گھر، معاشرہ اور ملک بدل جاتاہے۔ ایک انقلاب آجاتاہے۔ دنیا خود آگے بڑھ کر ایسے باپ، ایسی اولاد اور ایسی بیوی کو قیادت پیش کرتی ہے۔یہی لوگ سیاست، سماج، معیشت اور تہذیب کے اصلی قائد کہلانے کے لائق ہوتے ہیں۔ اور اگر اس نیّت ابراہیمی(علیہ السلام) اور نیّت اسماعیل (علیہ السلام) اور نیّت ہاجرہ کے بغیر ذبیحے ہوتے رہے تو انقلاب تو کوئی نہیں آئیگا۔ البتہ اس قوم کا سیاسی ، سماجی، معاشی اور تہذیبی وجود آج جتنا بدتر ہے اسکی بدتری میں اور اضافہ ہوتاجائیگا۔ اللہ تعالیٰ ہمیں اس سے محفوظ رکھے۔

آیئے ہم عہد کریں کہ آئندہ سال کے بکرے کی خریدی کی تیاری ہم آج ہی سے شروع کرتے ہیں۔ ان شاء اللہ۔

تحریر بشکریہ : علیم خان فلکی (جدہ)۔

Miss you ...

2011-10-30T13:27:00.001+05:30

جانِ عزیز !!
برائے مہربانی میرے ساتھ رہنے کو واپس آ جاؤ
تم تو پچھلے مہینے (لگتا ہے خفا ہو کر) نہایت تیز رفتاری سے رخصت ہو گئی تھیں
اتنی افراتفری میں چلی گئیں کہ مجھے اپنے منصوبے تم کو بتانے کا موقع ہی نہیں ملا

آئی مِس یو !!

مجھ سے اگر کوئی غلطی ہو گئی ہو تو بہت بہت معافی چاہتا ہوں
میں وعدہ کرتا ہوں کہ اب سے تمہارے ساتھ اچھا رہوں گا

محبت کے ساتھ !!

یہ آم ہے ، دو آم ہیں ، آم دو آم دو ، دو آم دو

2011-10-28T04:39:00.001+05:30

بعض ایسے پھل بھی ہیں جنہیں ہم دیکھ تو سکتے ہیں لیکن کھا نہیں سکتے۔ اس لئے کہ پھلوں تک پہنچنے اور ان پھلوں کو اپنے پیٹ کے اندر پہنچانے کے لئے آدمی کو اپنے بنک بیلنس کا جائزہ لینا پڑتا ہے۔ انسانوں نے پھلوں کی بھی طبقہ واری تقسیم کر رکھی ہے۔ امیروں کے پھل ، غریبوں کے پھل اور متوسط طبقہ کے لئے صبر اور نیکی کا پھل۔
آئیے کچھ پھلوں کا فرداً فرداً ذکر ہو جائے۔ سب سے پہلے ہم "آم" کا ذکر کریں گے۔ اسے ہم لوگوں نے پھلوں کا بادشاہ بنا رکھا ہے۔ آم خالص ہندوستانی پھل ہے اسلئے اس کی بیشمار قسمیں ہیں۔ عورت اور سانپ کی بھی اتنی قسمیں نہیں ہوتیں جتنی کہ آم کی ہوتی ہیں۔ امیر اور غریب ، مزدور اور سرمایہ دار ، شاعر اور فنکار ، افسر اور ماتحت ، غرض کہ ہر کوئی اس پھل کا رسیا ہے۔
آموں کے کئی نام ہوتے ہیں۔ بعض نام اتنے خوبصورت ہوتے ہیں کہ ان پر تخلص کا گمان ہوتا ہے۔ انسانوں کی طرح آموں کی صورت اور سیرت میں زمین آسمان کا فرق ہوتا ہے۔ آم کی صورت جتنی اچھی ہوگی اس کی سیرت اتنا ہی دھوکا دے گی۔

کچھ لوگوں کا شوق آم کھانا ہوتا ہے اور کچھ لوگوں کا شوق دوسروں کو آم کھاتے ہوئے دیکھنا ہوتا ہے۔ ہمارا شمار موخرالذکر انسانوں کے زمرے میں آتا ہے۔ بلکہ ہمارا تو خیال یہ ہے کہ آم کھانے میں اتنا مزہ نہیں آتا جتنا کہ کسی کو آم کھاتے ہوئے دیکھنے میں آتا ہے۔ آدمی جب آم کھاتا ہے تو اس کی شکل دیکھنے سے تعلق رکھتی ہے۔ خوبرو سے خوبرو آدمی بھی جب آم کھاتا ہے تو بدصورت دکھائی دینے لگتا ہے۔ آدمی ہر موقع کی تصویر کھنچواتا ہے لیکن ہم نے کسی کو آج تک آم کھاتے وقت تصویر کھنچواتے ہوئے نہیں دیکھا۔ اس کی وجہ یہ ہے کہ آم کی ساخت ہی کچھ ایسی ہوتی ہے کہ اسے کھانے کے لئے آدمی کو اپنی شکل بگاڑنی پڑتی ہے۔ آم جتنا بڑا ہوگا آدمی کی شکل اتنی ہی بگڑے گی۔ اگر آم بڑا نہ ہو اور اس کے ذائقہ میں کھٹائی شامل ہو تو یہ ذائقہ آدمی کے چہرے پر عیاں ہو جاتا ہے۔ یوں لگتا ہے جیسے آدمی آم نہ کھا رہا ہو ، ارنڈی کا تیل پی رہا ہو۔

کچھ لوگ زندگی کے بارے میں اتنی معلومات نہیں رکھتے جتنی کہ آموں کے بارے میں رکھتے ہیں۔ ہمارے ایک دوست جب بھی آم کھلاتے ہیں تو ہر آم کی خصوصیت پہلے ہی بتا دیتے ہیں۔ اس کا شجرہ بھی بیان فرما دیتے ہیں۔ آم تو چھوٹا ہوتا ہے لیکن اس کا تعارف بڑا ہوتا ہے یعنی ڈاڑھی سے مونچھیں بڑی ہوتی ہیں۔ چنانچہ جب بھی ہم ان کے ساتھ آم کھاتے ہیں تو پیٹ آموں سے اور دماغ معلومات سے بھر جاتا ہے۔

آموں کو آم کے باغ میں کھانے کا جو لطف آتا ہے ، وہ ڈائیننگ ٹیبل پر کھانے میں نہیں آتا۔ جب ہم بچے تھے تو آم کے باغ میں ہی آم کھایا کرتے تھے ، باغ کسی اور کا ہوتا تھا لیکن آم ہمارے ہوتے تھے۔ مطلوبہ آم کو تاک کر اس طرح پتھر مارتے تھے کہ آم سیدھے نیچے آ رہتا تھا۔ یہ بچپن کا ریاض ہی ہے کہ آج تک ہمارا نشانہ خطا نہیں ہوتا۔
آم کی سب سے بڑی خوبی یہ ہے کہ اس کے باعث ہمارے اہل وطن میں وطن پرستی کا جذبہ پیدا ہوتا ہے۔ ہمارے ایک دوست پچھلے چار برس سے امریکہ میں رہتے ہیں۔ آم کے ہر موسم میں وہ ہمیں خط لکھ کر اپنے وطن کو شدت سے یاد کرتے ہیں۔ ان کا کہنا ہے کہ اگر آم جیسا پھل ہندوستان میں پیدا نہ ہوتا تو انہیں اپنا وطن ہرگز یاد نہ آتا۔ پچھلے سال ہم نے اپنے ایک دوست کے ذریعے ان کی خدمت میں 6 آم بھیجے تھے۔ موصوف نے ہمیں شکریہ کے 6 خط لکھے اور اپنے وطن کو شدت سے یاد کیا۔

(کچھ پھلوں کے بارے میں :: مجتبیٰ حسین)

سر سید احمد خان - یوم پیدائش : 17 اکتوبر

2011-10-17T23:00:00.000+05:30

سرسید احمد خان

یوم پیدائش : 17 اکتوبر 1817ء
یوم وفات : 27 مارچ 1898ء

اکبر الہ آبادی
ہماری باتیں ہی باتیں ہیں سید کام کرتا تھا
نہ بھولو فرق جو ہے فرق کہنے والے کرنے والے میں
کوئی کچھ بھی کہے پر میں تو یہ کہتا ہوں اے اکبر
خدا بخشے بہت سی خوبیاں تھیں مرنے والے میں

مولوی نذیر احمد
خردمندوں کی صف میں سب موخر تھے وہ اول تھا
غرض اسلامیوں کی فوج کا لیڈر تھا جنرل تھا
اب اس کے بعد لشکر ہے مگر افسر نہیں کوئی
بھٹکتا پھر رہا ہے قافلہ رہبر نہیں کوئی

صبا اکبرآبادی
تہذیب اور اخلاق سکھانے والا
سورج کی طرح سے جگمگانے والا
خیرہ ہوئیں ارباب وطن کی آنکھیں
اس طرح سے آیا تھا وہ آنے والا

***
روزنامہ انقلاب ، ممبئی میں اس موقع پر شائع شدہ چند مفید مضامین ۔۔۔

کسی سنگ دل کے در پہ مرا سر نہ جھک سکے گا

2011-10-12T18:34:00.003+05:30

اردو دنیا کے مشہور انقلابی شاعر حبیب جالب (پاکستان) نے اپنے وقت کے ڈکٹیٹر کی آنکھوں میں آنکھیں ڈال کر کہا تھا :

کسی سنگ دل کے در پہ مرا سر نہ جھک سکے گا
مرا سر نہیں رہے گا ، مجھے اس کا غم نہیں ہے !

اور اسی شعر کی تفسیر آج کل ہندوستان میں گجرات حکومت اور بالخصوص نریندر مودی کے خلاف "سنجیو بھٹ" بنے ہوئے ہیں۔

مودی کو روانہ کردہ اپنے بےباکانہ خط کے آخر میں سنجیو بھٹ نے بھوشن سونم کی نظم کا یہ بند نقل کیا تھا :

میرے پاس اصول ہیں ، اقتدار نہیں
تمہارے پاس اقتدار ہے، اصول نہیں
تم تم ہو اور میں میں ہوں
مصالحت ممکن نہیں
اس لئے ہو جائے جنگ کا آغاز

سنجیو بھٹ (Sanjiv Bhatt) کون ہیں؟
اپنے فیس بک پروفائل کے تعارف میں انہوں نے لکھا ہے :

صرف ہنگامہ کھڑا کرنا میرا مقصد نہیں
ساری کوشش ہے کہ یہ صورت بدلنی چاہئے
میرے سینے میں نہیں تو ترے سینے میں سہی
ہو کہیں بھی آگ لیکن آگ جلنی چاہئے !

یہ وہ آگ نہیں جو گجرات فسادات کی طرح انسان کو صرف اسلئے جلا کر بھسم کر ڈالتی ہے اس کا نام "مسلمان" ہوتا ہے ۔۔۔ بلکہ یہ وہ آگ ہے جس کی تپش کے سہارے انسان عدل و انصاف کی طلب میں مسلسل سرگرم ہوتا ہے۔

47 سالہ سنجیو بھٹ ، احمدآباد (گجرات) کے رہائشی ، ممبئی آئی۔آئی۔ٹی کے پوسٹ گریجویٹ اور 1988ء بیچ کے آئی۔پی۔ایس (انڈین پولیس سروس) آفیسر ہیں۔
سنجیو بھٹ ان افسران میں شامل ہیں جنہوں نے گجرات کے وزیر اعلیٰ نریندر مودی کے ظلم و جبر اور استبداد کے خلاف آواز اٹھائی ہے۔ انہوں نے ظلم و جبر کے سامنے گھٹنے ٹیکنے سے ببانگ دہل انکار کر دیا ہے اور اصولوں کی لڑائی لڑنے کا پختہ ارادرہ کر چکے ہیں۔
گذشتہ دنوں جب احمدآباد کے پرنسپل ڈسٹرکٹ جچ نے سنجیو بھٹ کے سامنے جب یہ تجویز رکھی کہ اگر وہ صرف تین چار گھنٹے کے لئے پولیس کی تحویل میں جانے پر رضامند ہو جائیں تو اسی شام انہیں ضمانت پر رہا کیا جا سکتا ہے۔ اس تجویز کے جواب میں سنجیو بھٹ نے کہا کہ وہ جیل میں رہنا پسند کریں گے لیکن ضمانت کے لئے سرکاری دلالوں کی شرطیں منظور نہیں کریں گے۔

واضح رہے کہ 14/اپریل/2011 کو سنجیو بھٹ نے سپریم کورٹ میں ایک حلف نامہ داخل کرتے ہوئے گجرات کی مودی انتظامیہ کے خلاف ٹھوس ثبوت پیش کئے تھے۔ سنجیو بھٹ کے مطابق 2002ء میں گودھرا سانحہ کے بعد گجرات میں مسلمانوں کا جو قتل عام کیا گیا ، اسے اس وقت کے وزیر اعلیٰ نریندر مودی کی مکمل حمایت اور سرپرستی حاصل تھی۔
سنجیو بھٹ لکھتے ہیں کہ :

گودھرا سانحہ کے بعد 27/فبروری 2002ء کو وزیر اعلیٰ مودی کی طرف سے طلب کی گئی ایک اعلیٰ سطحی میٹنگ میں مودی نے انتظامیہ اور پولیس افسران سے کہا تھا کہ وہ مسلمانوں کے خلاف فسادیوں کے انتقام کی آگ سرد ہونے دیں اور کوئی مداخلت نہ کریں۔

جس میٹنگ میں مودی نے یہ بات کہی تھی اس میں سنجیو بھٹ محکمہ خفیہ کے ایک اعلیٰ افسر کے طور پر از خود موجود تھے۔ حالانکہ بعد میں مودی کے دلالوں نے یہ ثابت کرنے کی کوشش کی کہ سنجیو بھٹ اس میٹنگ میں موجود ہی نہیں تھے۔ جس پر سنجیو بھٹ نے اپنے ایک ماتحت کانسٹبل ڈی۔کے۔پنت کی گواہی بھی بطور ثبوت سپریم کورٹ میں جمع کروائی۔
سنجیو بھٹ کا مکمل حلف نامہ تہلکہ ڈاٹ کام نے اپنی ویب سائیٹ پر پیش کر دیا ہے ، جس کی پی۔ڈی۔ایف فائل یہاں سے ڈاؤن لوڈ کی جا سکتی ہے:
Text of Sanjiv Bhatt's affidavit in the Supreme Court regarding involvement of Modi in Godhra

بعد ازاں گجرات حکومت نے اپنے مکروہ منصوبے کے تحت مذکورہ کانسٹبل ڈی۔کے۔پنت کو اپنے زیراثر کرتے ہوئے اس کے ذریعہ ایک ایف۔آئی۔آر درج کروائی کہ سنجیو بھٹ نے دھمکیوں کے سہارے ایک "غلط" حلف نامے پر اس کی دستخط حاصل کی ہے۔ اور پھر اسی ایف۔آئی۔آر کی بنیاد پر ایک فرض شناس اور حق پرست افسر کو گرفتار کر لیا گیا اور جو تادم تحریر مودی حکومت کے زیرحراست ہے۔
تازہ ترین اطلاعات کے مطابق سنجیو بھٹ کے خلاف کاروائی مودی حکومت کو خاصی مہنگی پڑ رہی ہے جبکہ سنجیو بھٹ کی تائید میں ملک کے انصاف پسند ، حق نواز اور سنجیدہ طبقہ کی تعداد میں روز بروز اضافہ ہوتا جا رہا ہے۔

ہم سنجیو بھٹ کی ہمت و جراءت کو سلام کرتے ہیں۔

معصوم مرادآبادی کے سیاسی تجزیے سے خاطر خواہ استفادہ کیساتھ۔ (روزنامہ 'اعتماد' 9/اکتوبر/2011)

ہونٹوں سے چھو لو تم ، میرا گیت امر کر دو :: الوداع جگجیت سنگھ

2011-10-10T12:23:00.001+05:30

اپنی مرضی سے کہاں اپنے سفر کے ہم ہیں
رخ ہواؤں کا جدھر کا ہے ادھر کے ہم ہیں
وقت کے ساتھ مٹی کا سفر صدیوں سے
کس کو معلوم کہاں کے ہیں کدھر کے ہم ہیں

اپنے وقت کا ایک طویل اور خوش نصیب دنیاوی سفر گذار کر غزل کا بادشاہ بالآخر مٹی کے سفر کی سمت چل پڑا۔

سری گنگا نگر ، راجستھان میں 8/فبروری 1941ء کو پیدا ہونے والے جگجیت سنگھ نے، آج 10/اکتوبر 2011ء صبح 8 بجے (مقامی ہندوستانی وقت) باندرہ ممبئی کے لیلاوتی ہسپتال میں اپنی زندگی کی آخری سانسیں لیں۔ برین ہیمرج کا شکار ہونے پر چند دن قبل ہی انہیں ہسپتال میں داخل کیا گیا تھا۔

غزل بادشاہ (The Ghazal King) کا عوامی لقب پانے والے جگجیت سنگھ نے 2003ء میں حکومت ہند کی جانب سے باوقار "پدما بھوشن" کا خطاب بھی حاصل کیا تھا۔ کہا جاتا ہے کہ عوامی مزاج میں رچ بس کر انہوں نے غزل کو عوامی مقبولیت کی معراج پر پہنچانے میں ایک بڑا کردار ادا کیا ہے۔ مرزا غالب ، قتیل شفائی ، فراق گورکھپوری اور ندا فاضلی ، سدرشن فاخر جیسے شعراء کے کلام کو انہوں نے اپنی سریلی آواز کے سہارے دنیا کے کونے کونے میں پہنچایا۔
ان کی غزلوں کے البم ۔۔۔ مراسم ، چہرہ در چہرہ (Face to Face) ، آئینہ ، دل کہیں ہوش کہیں ، تلاش میں (In Search) ۔۔۔ آج بھی اپنی فروختگی کا ریکارڈ رکھتے ہیں۔ ان کے آڈیو/ویڈیو البموں کی مکمل تفصیل وکی پیڈیا پر یہاں ملاحظہ کی جا سکتی ہے۔

ایسی بیشمار غزلیں ہیں جنہوں نے جگجیت سنگھ کو شہرت کے بام عروج پر پہنچایا ، جن میں چند ایک یہ ہیں :

تم اتنا جو مسکرا رہے ہو
کیا غم ہے جس کو چھپا رہے ہو

کل چودھویں کی رات تھی
شب بھر رہا چرچا ترا

یہ دولت بھی لے لو ، یہ شہرت بھی لے لو
بھلے چھین لو مجھ سے مری جوانی
مگر مجھ کو لوٹا دو بچپن کا ساون
وہ کاغذ کی کشتی وہ بارش کا پانی

ہوش والوں کو خبر کیا
بےخودی کیا چیز ہے

تم کو دیکھا تو یہ خیال آیا
زندگی دھوپ تم گھنا سایا

ہونٹوں سے چھو لو تم
میرا گیت امر کر دو

مری زندگی کسی اور کی ، مرے نام کا کوئی اور ہے
میرا نقش ہے سرِ آئینہ ، پسِ آئینہ کوئی اور ہے

شام سے آنکھ میں نمی سی ہے
آج پھر آپ کی کمی سی ہے

جاتے جاتے وہ مجھے اچھی نشانی دے گیا
عمر بھر دہراؤں گا ایسی کہانی دے گیا

آنجہانی جگجیت سنگھ کے پسماندگان میں اب صرف ان کی اہلیہ چترا سنگھ موجود ہیں جو کہ خود بھی ایک مشہور غزل گلوکارہ مانی جاتی ہیں اور جن کے ہمراہ جگجیت سنگھ نے کئی معروف و مقبول غزل البم پیش کئے تھے۔ ان کے اکلوتے فرزند وویک سنگھ جولائی 1990ء کے ایک سڑک حادثے میں بعمر 21 سال جاں بحق ہو گئے تھے۔

نواب آف کرکٹ : منصور علی خان پٹودی کا انتقال

2011-09-22T21:43:00.002+05:30

کرکٹ نواب منصور علی خان پٹودی المعروف ٹائیگر پٹودی کا آج دہلی میں تقریباً چھ بجے شام (ہندوستانی مقامی وقت) سر گنگا رام ہسپتال میں بعمر 70 سال انتقال ہو گیا۔
انا للہ وانا الیہ راجعون

انہیں ایک ماہ قبل پھیپھڑوں کی بیماری کے سبب ہسپتال میں داخل کرایا گیا تھا ، سر گنگا رام ہسپتال کے ماہرین ان کے بہترین علاج کی کوششوں میں اپنی تمام تر صلاحیتیں بروئے کار لائے جا رہے تھے اس کے باوجود وہ قریب ایک ماہ سے آئی۔سی۔یو میں ہی داخل تھے اور ہر دن ان کی طبیعت میں مزید بگاڑ کے آثار پیدا ہو رہے تھے اور بالآخر آج انہوں نے داعی اجل کو لبیک کہا۔

ٹائیگر پٹودی کا شمار کرکٹ کے بہترین ہندوستانی کپتانوں میں ہوتا ہے۔ انہوں نے ہندوستان کے لئے 46 کرکٹ ٹسٹ کھیلے۔ 2793 رن ان کے کھاتے میں شمار کئے گئے ہیں جس میں ان کا اعلیٰ ترین اسکور 203 بھی شامل ہے۔ علاوہ ازیں 6 سنچریاں اور 16 نصف سنچریاں ان کے کرکٹ ریکارڈ میں موجود ہیں۔
سن 2004ء تک ٹائیگر پٹودی کو ہندوستان کا ایسا کرکٹ کپتان مانا جاتا رہا ہے جنہیں نہایت کم عمری میں ہندوستانی کرکٹ کپتان کے عہدے پر فائز کیا گیا تھا۔ انہوں نے 40 ٹسٹ میچوں میں ہندوستانی ٹیم کی کپتانی کا فرض نبھایا اور ایک حادثے میں اپنی ایک آنکھ کو کھو دینے کے باوجود ان کی کپتانی کے کیرئیر کو نہایت کامیاب قرار دیا گیا ہے۔ انہوں نے بحیثیت کپتان جملہ 9 میچوں میں ہندوستان کو کامیابی دلائی۔

منصور علی خان پٹودی کے والد افتخار علی خاں پٹودی بھی ٹسٹ کرکٹ میں ہندوستان اور انگلینڈ کی نمائیندگی کر چکے ہیں۔ اینگلو انڈین کرکٹ کے فروغ میں پٹودی خاندان کی بہترین خدمات کو خراج عقیدت کی خاطر "پٹودی ٹرافی" کا سن 2007ء میں اجرا کیا گیا اور اسی سال سے ہندوستان اور انگلینڈ کے درمیان مسابقانہ کرکٹ میچوں کا انعقاد کیا جا رہا ہے۔
واضح رہے کہ ہندوستانی حکومت نے سن 1971ء میں شاہی اقتدار کے خاتمے کا اعلان کیا تھا اور اس وقت منصور علی خان، پٹودی شاہی خاندان کے نویں نواب کے طور پر مشہور تھے۔

نواب منصور علی خان پٹودی کے پسماندگان میں ان کی اہلیہ بیگم عائشہ سلطانہ (شرمیلا ٹھاکر ، جو ہندوستانی فلم انڈسٹری کی ماضی کی معروف و مقبول اداکارہ "شرمیلا ٹیگور" کے نام سے معروف ہیں) ، اداکار سیف علی خان اور دو لڑکیاں سوہا علی خان اور صبا علی خان شامل ہیں۔

البیرونی کی 'کتاب الہند' (اردو ترجمہ)۔

2011-09-21T18:55:00.003+05:30

کتاب و سنت آن لائن لائیبریری پر ہندوستان سے متعلق ایک تاریخی علمی کتاب نظر سے گزری۔

عنوان کتاب : کتاب الہند
مصنف : ابو ریحان البیرونی
پی۔ڈی۔ایف صفحات : 328
فائل سائز : قریب 7 میگا بائٹس
ڈاؤن لوڈ لنک : کتاب و سنت لائبریری - کتاب الہند

پوری کتاب کا مطالعہ تو ممکن نہ ہو سکا۔ البتہ مختلف مفید باب اور صفحات کے مطالعے کے بعد یہ ضرور کہنا چاہوں گا کہ ، اگر کوئی قاری اس کتاب کے ذریعے موجودہ ہندوستان سے متعلق معلومات حاصل کرنے کا خواہشمند ہو تو اسے مایوسی ہی ہاتھ آئے گی۔
کتاب کا اندازِ تحریر بھی دور حاضر کی سلیس اردو میں نہیں بلکہ قدیم اردو سے متاثر ہے۔ ہندوؤں کے قدیم حالات اور عقائد کو گوکہ تفصیل سے ضرور بیان کیا گیا ہے مگر کتاب کے تبصرے میں مبصر کا یہ کہنا کہ ۔۔۔

اس کتاب کے مطالعے سے اس بات کو سمجھنے میں مدد ملے گی کہ ہندوؤں کو دعوت دین دینے کے حوالے سے کہاں کہاں خامیاں موجود ہیں اور کن ذرائع کو ملحوظ رکھ کر ہم ہندو مذہب سے تعلق رکھنے والے لوگوں کو مائل بہ اسلام کر سکتے ہیں۔

یکسر مبالغہ آمیز لگتا ہے۔
سوال یہ ہے کہ قریب ایک ہزار سالہ پرانے دور کے حالات کو آج کے حالات پر منطبق کر کے بھلا ہندوؤں کو مائل بہ اسلام کیسے کیا جا سکتا ہے؟
اور یہ کہنا بھی بہت مشکل ہے کہ آج کے ہندو کے حالات اور عقائد بعینہ وہی ہیں جو البیرونی کے زمانے میں پائے جاتے تھے۔ ہندوستان میں رہنے والے ہم جیسے عام مسلمان بھی اتنی بات ضرور جانتے ہیں کہ ہر دو دہے یا چوتھائی صدی کے دوران ہندوؤں کے سماج ، حالات اور طرزِ معاشرت میں کچھ نہ کچھ تبدیلیاں آ جاتی ہیں ونیز اس مذہب کے ماننے والے اتنے طبقوں اور اتنے خطوں میں بٹے ہوئے ہیں کہ شمالی ہند اور جنوبی ہند کے ہندوؤں کے رسم و رواج ، عبادت گاہیں ، زبان ، تہوار ، تہذیب میں تک نمایاں فرق محسوس ہوتا ہے۔ بت پرستی ضرور مشترک ہے لیکن ۔۔۔ ہر خطہ کا ہندو اپنے اپنے چہیتے "بھگوان" کی پرستش میں مصروف ہے۔ جیسا کہ
شمالی ہند : وشنو دیوی ، شیو / ہری
جنوبی ہند : شیوا ، جگناتھ ، وینکٹیشورا ، لکشمی
مغربی ہند : گنیش ، کرشنا ، ساوتری
مشرقی ہند : درگا ، سرسوتی
پھر زبان کی مثال لیں تو بہ مشکل چند فیصد ہندو (اور وہ بھی بزرگ طبقہ کی اکثریت) پورے انڈیا میں ایسے ہوں گے جنہیں سنسکرت زبان سے بخوبی واقفیت ہوگی۔ حالانکہ اس کتاب کے باب اول کے دوسرے پیراگراف میں لکھا ہے کہ :

ہمارے اور ہندوؤں کے درمیان مغائرت یعنی دوری ہے جس کے بہت سے اسباب ہیں۔ اس دوری کا پہلا سبب زبان کا اختلاف ہے ۔۔۔ اگر کوئی شخص اس مغائرت کو دور کرنے کے لیے یہ زبان (سنسکرت) سیکھنا بھی چاہے تو آسانی سے نہیں سیکھ سکتا۔

اول بات تو یہی ہے کہ آج کے جدید ہندوستان کا ماڈرن ہندو خود بھی یہ مشکل سنسکرت زبان سیکھنا نہیں چاہتا۔ کجا یہ کہ دوسروں کو سیکھنے کہا جائے۔ دوسری اہم بات یہ کہ ہندوستان اتنا بڑا ملک ہے کہ ہر خطے کا ہندو ایک ہی زبان (بطور مثال غیر سنسکرت آمیز آسان ہندی زبان سمجھ لیں) بولے گا ، یہ کہنا بھی مشکل ہے۔
شمالی ہند کے علاقہ جات میں عام فہم ہندی کے ساتھ اردو اور کسی حد تک آسامی اور پنجابی کا چلن ہے۔ جنوبی ہند کی زبانیں تو تلگو ، تامل ، کنڑا اور ملیالم ہیں۔ مشرق میں بنگالی ، میتھلی ، نیپالی اور اڑیا کا زور تو مغرب میں مراٹھی ، کونکنی ، گجراتی وغیرہ کا چلن ہے۔

آزادئ ہند کی تحریکوں کے دوران اور اسکے بعد کے جدید ہندو مت میں تبدیلیاں تو بنگال کے رام موہن رائے (1772-1833) کی تحریک سے پیدا ہونا شروع ہو گئی تھیں۔ پھر رام کرشنا پرما ہنسا (1836-1886) ، بنکم چندرا چٹوپادھیائے (1894-1838) ، سوامی وویکانندا (1863-1902) ، لالہ لجپت رائے (1865-1928) ، بال گنگا دھر تلک (1856-1920) کی اصلاحی تحریکوں سے قدیم ہندو مت مخلتف کروٹیں لیتا رہا تو گاندھی اور امبیڈکر تک آتے آتے گویا ایک نیا مذہب اختیار کر گیا۔ اور موجودہ دور میں تو بی۔جے۔پی - آر۔ایس۔ایس گٹھ جوڑ کی "ہندو توا تہذیب" سے واقف ہوئے بغیر ہندو ازم کی تازہ ترین حالت و نوعیت کی جڑوں تک پہنچنا مشکل ہے۔

اب ان سب حقائق کے پیش نظر یہ کہنا بجا ہوگا کہ البیرونی کی کتاب کے اس اردو ترجمے سے قدیم ترین ہندو مت کی تاریخ ، تہذہب ، عقائد اور حالات و واقعات سے ضرور واقفیت حاصل ہو سکتی ہے لیکن اس کتاب کے سہارے موجودہ دور کے ہندوؤں کو اسلام کی طرف راغب کرنے کی کوششیں نہایت مشکل ہیں۔

حسرت اس غنچہ پہ جو بن کھلے مرجھائے

2011-09-17T16:43:00.001+05:30

انا للہ وانا الیہ راجعون !
ایک بیٹا باپ کی نظروں کے سامنے زندگی کی جنگ ہار گیا۔
گورَو کالرا نے اپنے بلاگ کی اس تحریر میں شائد یہ سچ ہی لکھا ہو کہ جب کوئی باپ اپنے جواں سال بیٹے کیلئے صیغہ ماضی کے استعمال پر مجبور ہو جائے تو گویا وہ اپنی پیری کے عصا کو کھو دیتا ہے!

ہندوستانی قومی کرکٹ ٹیم کے سابق کپتان ، حلقہ مرادآباد (اترپردیش) کے موجودہ رکن پارلیمنٹ اور اہل حیدرآباد کے چہیتے کھلاڑی محمد اظہرالدین کے 19 سالہ فرزند محمد ایاز الدین کل جمعہ (16/ستمبر/2011) کی صبح زخموں سے جانبر نہ ہو سکے اور داعی اجل کو لبیک کہا۔
11/ستمبر کے بھیانک حادثے میں ایازالدین شدید زخمی ہو گئے تھے اور ڈاکٹروں کے مطابق ان کی حالت انتہائی تشویشناک تھی ، ان کے اعضائے رئیسہ تقریباً ناکارہ ہو چکے تھے جس سے علاج میں مدد نہیں مل رہی تھی۔ وہ مسلسل 6 دن سے مصنوی تنفس پر رکھے گئے تھے۔

انتقال کی اطلاع کے ساتھ ہی ریاستی چیف منسٹر کرن کمار ریڈی ، دیگر ریاستی و مرکزی وزراء ، ممتاز سیاسی ، سماجی اور مذہبی قائدین کے علاوہ اظہرالدین کے پرستاروں اور چاہنے والوں کا ہجوم اپولو ہسپتال پر پہنچ گیا۔ تقریباً چار بجے شام میت کو ہسپتال سے اظہرالدین کے مکان واقع بنجارہ ہلز پر منتقل کیا گیا۔
صدر مجلس اتحاد المسلمین اسد الدین اویسی نے ذرائع ابلاغ کے نمائیندوں سے درخواست کی کہ چونکہ اظہرالدین اور ان کے ارکان خاندان کیلئے یہ انتہائی اندوہناک خبر ہے لہذا صدمہ کی اس گھڑی میں انہیں غیرضروری سوالات کے ذریعے تکلیف نہ دیں۔

تاریخی مکہ مسجد میں ہزارہا مصلیوں نے نعرۂ تکبیر کی گونج میں جنازہ کو مسجد کے صحن میں اتارا۔ بعد مغرب نماز جنازہ ادا کی گئی۔ ہزاروں سوگواروں کی موجودگی میں اظہرالدین کے آبائی قبرستان واقع درگاہ حضرت بندے علی شاہ (پھسل بنڈہ) میں تدفین عمل میں آئی۔ اظہرالدین ، ان کے بڑے بھائی اور بڑے فرزند اسدالدین نے ایازالدین کی تدفین انجام دی۔

19 سالہ ایازالدین ، محمد اظہرالدین اور ان کی سابقہ اہلیہ نورین کے چھوٹے فرزند تھے۔ سینٹ میری کالج میں بی۔کام سال اول میں زیرتعلیم تھے۔ لیگ کرکٹ میں ان کے شاندار مظاہروں کو دیکھتے ہوئے حیدرآبادی شائقین کرکٹ کو یہ توقع پیدا ہو گئی تھی کہ شائد ایازالدین کو بھی قومی کرکٹ میں جگہ مل جائے۔
خبروں کے مطابق اظہرالدین نے عیدالفطر کے موقع پر بطور عیدی اپنے فرزند کو 13 لاکھ کی سوزوکی انٹرنیشنل بائک (Suzuki GSX-R1000) ان کی خواہش پر دلائی تھی۔ اور کہا جاتا ہے کہ اتوار 11/ستمر کی صبح آؤٹر رنگ روڈ پر گاڑی کی آزمائشی سواری کے دوران ایازالدین 210 کیلومیٹر کی رفتار سے بائیک چلا رہے تھے۔ انتہائی تیزرفتاری کے سبب گاڑی جب بےقابو ہوئی تو اس بھیانک حادثے میں عقبی نشست پر موجود ایازالدین کے پھوپھی زاد بھائی اجمل الرحمٰن موقع پر ہی ہلاک ہو گئے جبکہ ایازالدین 6 دن تک موت و زیست کی کشمکش میں مبتلا رہے تھے۔

نامور سابق ہندوستانی کرکٹ کپتان اظہرالدین کے فرزند حادثے کا شکار

2011-09-11T12:06:00.003+05:30

ابھی ابھی وصول ہوئیں خبروں کے مطابق ۔۔۔
ہندوستانی کرکٹ کے سابق اور نامور کپتان محمد اظہرالدین کے دوسرے لڑکے محمد ایاز الدین کا آج ایک سڑک حادثے میں شدید زخمی ہو گئے۔
آؤٹر رنگ روڈ ، پپالہ گوڑہ گیٹ کے قریب سوزوکی انٹرنیشل بائیک پر ریس کرتے ہوئے ایاز الدین اپنے دوست اجوال کے ساتھ اچانک حادثے کا شکار ہو گئے اور ٹی۔وی چینلوں کی خبر کے مطابق جائے وقوع پر ہی دونوں کا انتقال ہو گیا۔
ٹی۔وی۔9 بریکنگ نیوز : اظہرالدین کے فرزند ایاز الدین کا انتقال

واضح رہے کہ ایاز الدین مقامی لیگ کرکٹ کے بہترین آل راؤنڈر مانے جاتے رہے ہیں۔

لیکن ۔۔۔۔
اپالو ہسپتال (جہاں دونوں زخمیوں کو شریک کروایا گیا ہے) کے سنیئر کنسلٹنٹ ڈاکٹر پی۔ ونئے کمار نے تصدیق کی ہے کہ دونوں زخمی ابھی حیات ہیں۔ (الحمدللہ)
میڈیا پر اپنا غصہ ظاہر کرتے ہوئے ڈاکٹر صاحب نے اپنے فیس بک پروفائل پر لکھا ہے کہ :

What sort of media do we have today? The boys are still there, though very critical. I am a direct witness as a doctor. I know their condition, which I cannot write here, but they are not gone. Unfortunately all channels are declaring them in competition with each other. No respect to truth, no respect to parents' sentiments. Disgusting. Spoke to two channel chiefs. The answer was: 'All other channels are putting it that way, is 't it? What do you want us to do?' Disgusting, disgusting

ہم کہنے کو آزاد ہیں ۔۔۔

2011-08-15T22:32:00.001+05:30

سنا ہے کہ آج 65 واں یوم آزادی ہند تھا۔
کہتے ہیں کہ آج سے 64 سال قبل ہندوستان نے انگریزوں سے آزادی حاصل کی تھی۔ اب یہ تو ہونا ہی تھا۔ کوئی کب تک کس کس کو غلام بنائے رکھے۔
ویسے 6 دہے گزارنے کے بعد بھی ہند کا مسلمان لگتا ہے کہ جہاں پہلے تھا آج بھی اسی جگہ کھڑا ہے۔ حالانکہ تحریک آزادی میں مسلمانوں کا رول کچھ کم نہیں تھا۔ مگر ۔۔۔
آزاد ہندوستان میں مساواتی ترقی کے ثمرات سے مسلمان اب تک محروم ہے۔ بہت ممکن ہے کہ اس لاچاری و بےبسی میں کچھ ہاتھ خود مسلمانانِ ہند کا ہو مگر زیادہ حصہ بہرحال اس متعصب سیاست کا ہے جو عین آزادی کے دن سے لگی بندھی چلی آ رہی ہے ، پہلے اس کا صرف ایک نام بتایا جاتا تھا ، آج کئی نام ہیں۔

شاید اسی لئے شاعر نذیر نادر نے درد کی لے چھیڑی ہے کہ ۔۔۔۔۔

ہم کہنے کو آزاد ہیں ، آزاد نہیں ہیں
مسکانیں ہیں رخسار پہ ، دلشاد نہیں ہیں

انصاف کے روغن سے ہر اک شے کو سنوارا
غازہ سے محبت کے ترے رخ کو نکھارا
رونق تجھے دی ایسی کہ اقطاع جہاں نے
چڑیا تجھے سونے کی فقط کہہ کے پکارا

آبادیاں کیا ہم سے بھی آباد نہیں ہیں
ہم کہنے کو آزاد ہیں ، آزاد نہیں ہیں

ظالم کے مقابل میں سدا ہم ہی ڈٹے تھے
ملت کو بچانے کے لئے ہم ہی کٹے تھے
دشمن سے کبھی ملک کا سودا نہ کیا تھا
ہم نے ہی تو آزاد کے الفاظ رٹے تھے

آزادی دلا کے بھی کیا برباد نہیں ہیں؟
ہم کہنے کو آزاد ہیں ، آزاد نہیں ہیں

مجرم کو کھلا چھوڑا ہے کیسا ہے تماشا
بےکس کا گلہ گھونٹا ہے کیسا ہے تماشا
قانون کے متوالوں نے سر جوڑ کے بےشک
قانون کو خود توڑا ہے کیسا ہے تماشا

تیار وہ سننے کو بھی فریاد نہیں ہیں
ہم کہنے کو آزاد ہیں ، آزاد نہیں ہیں

سچوں کی گرفتاری بہت مہنگی پڑے گی
مظلوم کی یہ آہ بھی جب حد سے بڑھے گی
لوٹا گیا گھر بار یہاں جن کا بھی نادر
ظالم کے ہی سر ان کی وبا آ کے پڑے گی

مظلوم ہیں ہم ہند میں ، جلاد نہیں ہیں
ہم کہنے کو آزاد ہیں ، آزاد نہیں ہیں !!

***
خیر۔ درد اپنی جگہ ، خوشی اپنی جگہ ۔۔۔
تمام اہل وطن کو یوم آزادئ ہند مبارک ہو !!

مملکت خداداد پاکستان - حنا ربانی - نوجوانی ناتجربہ کاری

2011-07-28T18:56:00.003+05:30

ہمارے محلہ کے پاشا بھائی فرماتے ہیں کہ ۔۔۔۔۔۔
وہ کیا فرماتے ہیں کہ ذرا دکنی الفاظ ہیں اور ذرا قابل اعتراض ہیں ۔۔۔ لہذا فصیح اردو میں یوں پڑھ لیں کہ ۔۔۔

"یار ! یہ پاکستان والوں کو کیا ہوا ، ایک خوبصورت ، نازک اندام مگر ناتجربہ کار خاتون کو اتنے بڑے اور اہم عہدے پر فائز کر دیا۔"

موصوف کا اشارہ حنا ربانی کھر کی طرف تھا جو کہ مملکت خداداد پاکستان کی وزارتِ خارجہ کی آجکل سربراہی کر رہی ہیں۔
پاشا بھائی تو خیر نچلے طبقے کے عوام سے تعلق رکھتے ہیں، انکے خیال کی تو اہمیت ہی کیا۔ مگر حیرت یہ ہے کہ روزنامہ "سیاست" جیسے معروف اخبار میں برسوں سے سیاسی تجزیاتی کالم تحریر کرنے والے رشید الدین صاحب بھی کچھ ایسی ہی بات لکھ گئے۔
ملاحظہ فرمائیں۔ لکھتے ہیں ۔۔۔۔۔

ویسے بھی بعض ممالک میں ایک عجیب روایت چل پڑی ہے۔ دنیا سے بہتر تعلقات اور ملک کے مفادات کے تحفظ کیلئے وزارت خارجہ کا قلمدان خواتین کو دیا جا رہا ہے۔ امریکہ میں کونڈا لیزا رائیس کے بعد ہلاری کلنٹن اہم عہدے پر فائز کی گئیں اور انہوں نے اپنی صلاحیتوں کا لوہا منوایا بھی ہے۔
امریکہ کی نقل کرتے ہوئے پاکستان نے 34 سالہ حنا ربانی کھر کو ملک کا وزیر خارجہ مقرر کیا۔ پاکستان نے سوچا ہوگا کہ اس کی خارجہ پالیسی جب امریکہ کی منظورہ ہے تو پھر کیوں نہ ہلاری کی ساتھی کے طور پر ایک خاتون کو وزیر خارجہ مقرر کیا جائے؟ ویسے بھی پاکستان کو خارجہ پالیسی میں زیادہ تر امریکہ پر ہی انحصار کرنا پڑتا ہے۔ وزارت خارجہ کیلئے عام طور پر تجربہ کار افراد کا انتخاب کیا جاتا ہے جو سفارتی امور سے واقف ہوں اور بہتر انداز میں دنیا کے سامنے اپنے ملک کی ترجمانی کر سکیں۔
پاکستان نے آخر کس تجربے کی بنیاد پر ایک نوجوان خاتون کو اس قدر اہم ذمہ داری سونپ دی؟ یہ امریکہ کی نقل ہے یا پھر زرداری کلچر؟
بحوالہ : روزنامہ سیاست ، سنڈے ایڈیشن ، 24/جولائی 2011ء

لگتا ہے ہمارے دوست اور سیاسی تجزیہ نگار رشید الدین بھائی کسی کی تیر نظر کے گھائل ہو گئے ہیں۔
حضور ! آئی۔اے۔ایس میں منتخب ہو کر جو افراد ملک کے پالیسی ساز اداروں میں پہنچتے ہیں وہ "نوجوان" ہی تو ہوتے ہیں۔ نوجوانی کو "ناتجربہ کاری" باور نہیں کرانا چاہئے۔
ہند کے معروف صحافی نکھل چکرورتی نے ایک مرتبہ لکھا تھا کہ ۔۔۔

اندرا گاندھی بین الاقوامی امور کی سیاست میں کم عمری میں ہی داخل ہو چکی تھیں۔
علاوہ ازیں نہرو کے وزارت عظمیٰ کے دوران تین مورتی ہاؤس میں اندرا گاندھی ہی سرکاری میزبان کی حیثیت سے ریاستی حکمرانوں کا خیال رکھا کرتی تھیں۔

اسی طرح ذوالفقار علی بھٹو کے دور میں مرحومہ بےنظیر بھٹو بھی کم عمری میں ہی بین الاقوامی سیاست میں اپنی پہچان بنانے لگ گئی تھیں۔

کہا جا سکتا ہے کہ مذکورہ بالا دونوں خواتین کے پس پشت ایک مضبوط سیاسی خاندان اور سیاسی نظریات کا سہارا تھا۔ لیکن غور کیجئے کہ ایک خامی یہ بھی تھی کہ اس وقت نہ آج جیسی جدید تکنالوجی دستیاب تھی اور نہ ذرائع ابلاغ کی آسانی اور لامحدود سہولیات۔
اور آج اگر انٹرنیٹ اور موبائل کے جدید ترین ابلاغی دور میں ایک 20 سالہ نوجوان بھی بین الاقوامی امور سے واقف ہونے کیساتھ ساتھ ویب سائٹس ، بلاگز اور سوشل نیٹ ورکنگ سائیٹس کے ذریعے سیاسی سماجی معاشی تکنیکی تبصرہ و تجزیہ کرنے کے قابل ہو سکتا ہے تو 34 سالہ خاتون کیوں کر وزارت خارجہ کی ذمہ داری نبھانے کے قابل نہیں ہو سکتی ؟

کہنے کی ساری بات یہ ہے کہ دراصل ہمارے دوست رشیدالدین بھائی نے روشن خیال مسلمانوں کے ڈر سے اصل بات وہ نہیں کہی جو درحقیقت کہنا چاہتے تھے۔ اس کی طرف اشارہ البتہ ضرور کیا ہے ، جیسا کہ ایک جملہ یوں لکھا :
اسلامی اور مملکتِ خداداد کا دعویٰ کرنے والے اس ملک کے حال پر دنیا ہنس رہی ہے۔

سیدھی سی بات یہ ہے کہ عورت کی سربراہی کا اسلام قائل نہیں ہے۔ متواتر مستند روایات سے یہ بات ثابت ہے کہ نبی کریم صلی اللہ علیہ وسلم نے فرمایا ہے کہ (مفہوم) : وہ قوم ہرگز فلاح نہیں پائے گی جس نے اپنے معاملات عورت کے سپرد کر دیے ہوں (بخاری)۔

مگر چونکہ رشید الدین بھائی صاحب کو اور خود "سیاست" اخبار کو صحافت کے گدلے سمندر میں رہنا بسنا ہے جو ذرا روشن خیال دنیا ہے اور گلوبل ولیج مزاج کی صحافت کا مطالعہ بھی ذرا وسیع الذہن اور روشن خیال افراد فرمایا کرتے ہیں جو اسلام کو دورِ حاضر کے مطابق mould کرنے کے حامی ہیں ۔۔۔۔ لہذا کیا برا ہے اگر "خاتون کی سربراہی" کو نشانہ بنانے کے لئے "اسلامی روایات" کا سہارا لینے کے بجائے "نوجوانی یا ناتجربہ کاری" جیسی اصطلاحات نتھ کی لونگ کی طرح ناک میں ٹانک دی جائیں !!

ویسے یہاں یہ کہنے کو یارا نہیں کہ ہمارے مفکرِ ملت یعنی کہ علامہ اقبال رحمۃ اللہ علیہ بھی روشن خیالی سے متاثر اور اس کے حامی تھے مگر جب بات اسلامی مزاج اور روایات کی آ جائے تو وہ کسی قسم کا سمجھوتا کرنے کے قائل بھی نہیں تھے۔
یقین نہ ہو تو افکارِ اقبال سے یہ بند ملاحظہ فرماتے جائیں ۔۔۔۔۔

نے پردہ نہ تعلیم نئی ہو کہ پرانی
نسوانیتِ زن کا نگہباں ہے فقط مرد
جس قوم نے اس زندہ حقیقت کو نہ پایا
اس قوم کا خورشید بہت جلد ہوا زرد

نامور ہندوستانی صحافی ساجد رشید کا انتقال

2011-07-12T17:13:00.004+05:30

اخبار "صحافت" ممبئی کے ایسوسی ایٹ ایڈیٹر ، سہ ماہی "نیا ورق" کے مدیر اور نامور صحافی ، سماجی مصلح اور دانشور ساجد رشید کل 11/جولائی/2011ء کو ممبئی کے پرنس علی خان ہسپتال میں انتقال کر گئے۔ انا للہ وانا الیہ راجعون
انہیں اوپن ہارٹ سرجری کی خاطر ہسپتال میں داخل کیا گیا تھا مگر آپریشن کے بعد وہ جانبر نہ ہو سکے اور 60 برس کی عمر میں داعی اجل کو لبیک کہا۔

کمیونسٹ نظریات کے حامل ساجد رشید مختلف اردو / ہندی روزناموں سے وابستہ تھے۔ روزنامہ "صحافت" سے قبل وہ "اردو ٹائمز" کی ادارت سے کوئی دس برس منسلک رہے۔ اپنے بعض متنازعہ خیالات اور تحریروں کے باعث انہوں نے بدنامی بھی سمیٹی اور ایک مرتبہ ان پر حملہ بھی کیا گیا تھا۔ ممبئی کے اسمبلی الکشن میں ایک دفعہ انہیں شکست کا سامنا بھی کرنا پڑا تھا۔

ساہتیہ اکیڈمی ایوارڈ یافتہ ساجد رشید ، مہارشٹرا اردو اکیڈمی کے چئرپرسن تھے۔ ان کے افسانوں کے مجموعوں میں "نخلستان میں کھلنے والی کھڑکی" ، "ریت گھڑی" ، "ایک چھوٹا سا جہنم" شامل ہیں۔ ان کے مقبول کالم "زندگی نامہ" کو بھی کتابی شکل میں پیش کیا جا چکا ہے۔
پاکستانی روزنامہ "جنگ" میں بھی ان کے کالم شائع ہوتے رہے ہیں۔ بی۔بی۔سی کے مبصرین کے پینل میں وہ بھی شامل تھے۔ کارٹونسٹ کی حیثیت سے انہوں نے انگریزی اور گجراتی جرائد میں بھی کام کیا ہے۔
ان کی گراں قدر صحافتی و ادبی خدمات کے اعتراف میں انہیں کئی انعامات و اعزازات سے نوازا گیا۔

بھیونڈی اور مالیگاؤں میں آج (12/جولائی/2011) شام ساجد رشید کو خراج عقیدت پیش کرنے کیلئے صحافتی حلقوں کی جانب سے ایک تعزیتی نشست کا اہتمام کیا گیا ہے۔

روزنامہ صحافت (12/جولائی/2011) کی تفصیلی خبر یہاں ملاحظہ فرمائیں۔

بہادر یار جنگ کے دو خط محمد علی جناح کے نام

2011-07-06T17:40:00.006+05:30

سابق ریاست حیدرآباد دکن کے نامور قائد بہادر یار جنگ (رحمۃ اللہ علیہ) کی حیات و کارناموں پر مبنی ویب سائیٹ کا قیام عمل میں آ چکا ہے۔ یہاں ملاحظہ فرمائیں :

بہادر یار جنگ - Bahadur Yar Jung

غیر منقسم ہندوستان میں شائد ہی کوئی ایسا عاقل وبالغ شخص ہوگا جس نے بہادر یار جنگ کا نام نہ سنا ہو۔ وہ لوگ جو ان کے سیاسی خیالات سے متفق نہیں تھے وہ بھی ان کی شعلہ بیانی کے قائل اور عاشق تھے۔ اور اس لئے انہیں لسان الامت کے لقب سے بھی نوازا گیا تھا۔ علاوہ ازیں جناب محمد علی جناح کے دستِ راست ہونے کی وجہ سے انہیں قائد ملت اور ریاست حیدرآباد میں ان کی غیر معمولی شہرت اور اہمیت کے مد نظر کچھ لوگ انہیں آفتابِ دکن بھی کہتے اور سمجھتے تھے۔

اس میں کوئی شک نہیں کہ آج کی نوجوان نسل بہادر یار جنگ کے نام اور کام سے بیشتر ناآشنا ہے۔ اس کی پہلی وجہ یہ ہوسکتی ہے کہ بہادر یار جنگ کا انتقال خاصی نوعمری میں ہو گیا اور آزاد ہندوستان یا پھر پاکستان میں ایک اہم رہنما کی حیثیت سے انہیں جو کردار نبھانا تھا وہ اس سے محروم رہ گئے۔ اور 1930ء سے لے کر نواب صاحب کے سال وفات 1944ء تک کوئی ایسی سیاسی سرگرمیاں نہیں تھیں جن کا تعلق مسلمانوں سے ہو اور نواب صاحب ان سے منسلک نہ ہوں۔ حیدرآباد دکن سے لے کر صوبہ سرحد تک کی بہت سی سیاسی گتھیوں کو سلجھانے میں بہادر یار جنگ پیش پیش رہے تھے۔

اسی ویب سائیٹ پر بہادر یار جنگ کے مشہور و مقبول خطوط کا ایک ضخیم مجموعہ بھی موجود ہے، جن کے ذریعے ایک دور ، ایک تہذیب اور ایک تاریخ کا مطالعہ کیا جا سکتا ہے۔ ذیل میں خطوط کے اسی زخیرے سے دو خط ملاحظہ فرمائیں جو نواب صاحب نے قائد پاکستان محمد علی جناح کو تحریر کئے تھے۔

محترم قائد اعظم
السلام علیکم ورحمۃ اللہ
سب سے پہلے اس زبردست کامیابی کے لیے میری دلی مبارکباد قبول فرمائیے جو مجلس عاملہ کے گذشتہ اجلاس میں آپ کی بےمثل اور خداداد قیادت کی وجہ سے ہوئی ہے۔ نہ صرف آپ ملت اسلامیہ کو ایک تاریخی فتح عطا فرمانے کا باعث ہوئے بلکہ ایک ایسی شکست حکومتِ برطانیہ کو دی جس کی مثال گذشتہ سیاسی کشمکش میں نہیں ملتی۔ خدا آپ کو صحت و عافیت کے ساتھ مسلمانانِ ہند کی قیادت کے لیے دیر تک سلامت رکھے۔
آپ کا مخلص
محمد بہادر خاں

مسٹر محمد علی جناح باراٹ لا
لٹل گیس روڈ ، ملابار ہل ، بمبئی
مائی ڈیر مسٹر جناح
امید کہ آپ دہلی سے کامیابی کے ساتھ گھر لوٹے ہوں گے۔ ہندوستان کے طول و عرض میں مسلم لیگ کی کامیابی پر دلی مبارکباد قبول کیجئے۔ میری حالت ایک ایسے باز کی ہے جس کو بلبل کی طرح پنجرے میں بند کر دیا گیا ہو اور جس پر فضائے بسیط ممنوع کر دی گئی ہو۔ حیدرآباد کی تنگ زمین میرے طائر جذبات کے لیے فی الحقیقت ایک قفس سے کم نہیں ہے۔ جی میں آتی ہے کہ تیلیاں توڑ کر باہر نکل پڑوں لیکن حیدرآباد کے اتنے حقوق مجھ پر ہیں کہ وہاں کے مسلمانوں کو اس عالمِ کشمکش میں چھوڑ دینا احسان فراموشی سے کم نہ ہوگا۔ اس لیے مجبور ہوں اور کوشش کر رہا ہوں کہ وہی کام جو آپ کی قیادت میں براعظم ہند میں ہو رہا ہے میری ناچیز مساعی سے سرزمین دکن میں ہو۔ میری تمام دعائیں اور بہترین توقعات آپ کے ساتھ ہیں۔ خدا آپ کو اچھا رکھے اور مسلمانوں کو آپ کے پہچاننے کی توفیق عطا کرے۔
یہ خط میسور کے چار مسلم نوجوانوں کے ہاتھوں بھیج رہا ہوں جن کو ریاست میسور دنیا کی سیاحت کے لیے روانہ کر رہی ہے تاکہ وہاں کی صنعتی ترقیوں کا مطالعہ کریں اور میسور کی صنعتوں کو متعارف کریں۔ ان کو بڑی تمنا تھی کہ آپ سے نیاز کا شرف حاصل کریں۔ مجھے امید ہے کہ آپ ان سے مل کر خوش ہوں گے اور ان کی ہمت افزائی فرمائیں گے۔
آئنگار کمیٹی میں، جو حیدرآباد کی دستوری اصلاح کے لیے ہی بٹھائی گئی ہے مجلس اتحاد المسلمین کا بیان داخل ہو چکا ہے جس کو آپ کی ہدایت کے عین مطابق مرتب کرنے کی کوشش کی گئی ہے۔ یہاں کی ہندو اسٹینڈنگ کمیٹی نے صدر اعظم سے ملازمتوں میں ہندوؤں کے حصے سے متعلق جو درخواست کی ہے وہ آپ کی نظر سے گزری ہوگی۔ ہماری حکومت کی موجودہ کمزور پالیسی نے ہندوؤں کے مطالبات کو زیادہ شدید کر دیا ہے اور آپ جانتے ہیں کہ وہ مطالبہ کرنے میں حقِ صداقت سے ہٹ جانے بلکہ نظرانداز کر دینے کو جائز سمجھتے ہیں۔ میں حیران ہوں کہ حیدرآباد کے مستقبل کو کس طرح مسلمانوں کے لیے قابل اطمینان بنایا جا سکتا ہے۔
ایک فارسی شعر مع ترجمہ نیچے لکھ رہا ہوں۔
ہوا مخالف و شب تار وبحر طوفاں خیز
گستہ لنگر کشتی و ناخدا خفت است
(خدا حافظ)
4۔فبروری 1337ف
(مطابق 7 ۔ جنوری 1938ء)

سعودی عرب : خروج و عودہ ویزا (Exit - ReEntry) والوں کو فائنل ایگزٹ ؟

2011-06-22T11:40:00.001+05:30

پچھلے ایک آدھ دن سے ایک ای-میل گردش میں ہے جس کے مطابق ۔۔۔۔
سعودی عرب کے جو خارجی باشندے ، خروج و عودہ ویزا (Exit - ReEntry) پر اپنے وطن جا رہے ہیں ، انہیں ائرپورٹ پر "فائنل ایگزٹ" کی مہر سے فارغ کیا جا رہا ہے۔
ای-میل میں بتایا گیا ہے کہ کیرالہ (انڈیا) کے دو باشندوں کے پاس خروج و عودہ ویزا ہونے کے باوجود ان کے پاسپورٹ پر "فائنل ایگزٹ" کی مہر لگا دی گئی۔
ای۔میل میں یہ "انکشاف" بھی کیا گیا کہ چونکہ ان کا تعلق "سرخ کٹیگری" والی کمپنی سے رہا ہے (مختلف کٹیگریز سے متعلق تفصیلی خبر یاسر عمران مرزا کے بلاگ پر یہاں ملاحظہ فرمائیں) اور انہوں نے مملکت میں چھ سال سے زائد عرصہ گزار دیا ہے لہذا ائرپورٹ پر انہیں "خروج" لگا دیا گیا۔

یہ افواہ کس قدر جھوٹی اور جعلی ہے ، اس کا اندازہ مملکت میں ایک دو سال گزارنے والے کو بھی بآسانی ہو جاتا ہے۔
کسی بھی خارجی باشندے کے پاسپورٹ پر "فائنل ایگزٹ" کی مہر یونہی آسانی سے لگائی نہیں جاتی بلکہ یہ ایک طویل کاروائی ہوتی ہے۔

دمام پاسپورٹ ڈپارٹمنٹ کے ایک اعلیٰ عہدیدار نے اس "افواہ" کو یکسر ردّ کرتے ہوئے اسے بعید الفہم بھی بتایا ہے۔ معروف انگریزی اخبار "عرب نیوز " سے گفتگو کرتے ہوئے انہوں نے بتایا کہ :

ائرپورٹ پر امیگریشن ڈپارٹمنٹ کو ایسا حق دیا جانا ناقابل قیاس بات ہے۔ یہ ناممکن ہے۔ کسی بھی خارجی باشندے کو متعلقہ رسمی کاروائیوں سے گزارے بغیر "ہمیشہ کے لیے خروج (Final Exit)" پر روانہ نہیں کیا جاتا۔
"ہمیشہ کے لیے خروج" کی مہر لگانے سے قبل جو دستاویزات درکار ہوتی ہیں ان میں ۔۔۔
بنک کا کلئیرنس سرٹیفیکٹ
سرکاری محکموں (ٹریفک ڈپارٹمنٹ وغیرہ) کا کلئیرنس سرٹیفیکٹ
متعلقہ کمپنی کی طرف سے کلئیرنس سرٹیفیکٹ کہ اس کے ملازم پر کوئی قانونی کیس ثابت نہیں ہے
کسی کو "ہمیشہ کے لیے خروج" پر روانہ کرنا کوئی معمولی بات نہیں ہے۔ فرض کریں کہ ائرپورٹ پر ایسا کر بھی دیا جائے تو بےشمار مسائل اٹھ کھڑے ہو جائیں گے۔ اگر اس شخص کے اہل خانہ مملکت میں موجود ہوں تو ان کی ذمہ داری کس کے سر جائے گی؟ جس فلیٹ میں خارجی باشندہ رہا ہو اس کی ذمہ داری کون اٹھائے گا؟ اپنی سروس کے اختتام پر خارجی باشندہ اپنی کمپنی سے جن فوائد کا حقدار بنتا ہے وہ کون وصول کرے گا؟
یہ یقیناً ایک غیراخلاقی اور غیرانسانی حرکت ہوگی۔
یہ بھی واضح رہے کہ اگر کوئی کمپنی اپنے کسی ملازم کو "ہمیشہ کے لیے خروج (Final Exit)" پر بھیجتی ہے تو اس کے لیے لازم ہے کہ وہ اس ملازم کو اپنے کسی عہدیدار کے ہمراہ ائرپورٹ روانہ کرے اور ملازم کا پاسپورٹ اسی عہدیدار کے قبضہ میں دیا جاتا ہے۔

لہذا اتنی ساری وضاحت کے بعد ، مملکت سعودیہ کے غیرمقیمین کو اس ضمن میں پریشان ہونے کی ضرورت نہیں ہے۔ اس پروپگنڈہ ای-میل کو مزید آگے بڑھا کر افواہ کو پھیلانے کے جرم کا حصہ نہ بنیں۔

بحوالہ :

Arab News - Passport officials quash 'final exit' rumors

اردو زبان اور موجودہ ذرائع ابلاغ

2011-06-20T13:41:00.001+05:30

ہماری قوم اردو بولنے کے نہیں، بھولنے کے عمل سے گزر رہی ہے، ہمیں اپنے مستقبل کو حال سے بچانا ہوگا

اس حقیقت سے انکار نہیں کیا جا سکتا کہ زبان، دون نسلوں کے درمیان سب سے مضبوط رشتہ اور سب سے بڑا سرمایہ ہے۔
زبان نطق و بیان ہے، ایمان و ایقان ہے، قواعد کی ابجد اور تمام علوم کی ماں ہے۔
زبانوں کا عروج و زوال قوموں کا عروج و زوال ہے۔
زبان کسی قوم کی سب سے بڑی پہچان ہے۔

جب ہم اردو زبان کی بات کرتے ہیں تو اندازہ ہوتا ہے کہ نصف صدی قبل تک زبان اپنی ذات میں اخلاقیات کی درس گاہ کا درجہ رکھتی تھی، اس کے دائرۂ اظہار میں آنے والی ہر قدر اور ہر جہت اپنی مبادیات کا اظہار بڑی وضع داری سے کیا کرتی تھی۔ زبان زد ہو جانے پر رویے تک اپنی شناخت بدل لیا کرتے تھے۔ اس صورتِ حال کو سماج کی علمی اور ادبی حیثیت نے بھی کافی سہارا دے رکھا تھا۔ معاشرے میں ادب سے دلچسپی اور اس کے زیر اثر بولی جانے والی زبان کا اہتمام و انصرام ذہنی طور پر ایک اجتماعی شعوری حیثیت رکھتا تھا۔ لیکن گزشتہ چند دہائیوں سے لے کر آج تک اردو زبان کے روز مرہ استعمال اور محاورے میں تیزی سے تبدیلی ہوتی نظر آتی ہے۔
بیسویں صدی کی ساتویں دہائی (1970ء) کے اواخر میں بول چال میں پھڈا، ٹھکیا اور پنگا جیسے الفاظ کثرت سے سنائی دینے لگے، نیز خواتین کی آپس میں گفتگو میں تخاطب کے لیے "یار" کا لفظ عام ہوا۔
اس کے علاوہ برا ماننا کے بجائے برا منانا اور "میرا نہیں خیال" جیسے اظہار سامنے آئے۔ یہ تبدیلی مثبت کم اور منفی زیادہ ہے۔ لیکن اب دانستہ طور پر اردو زبان کی بساط ہی لپیٹ دینے کی کوششیں کی جا رہی ہیں۔

زبانوں میں ترک و اختیار کا عمل ہمیشہ جاری ہے۔ اسی طرح زبانیں پھلتی پھولتی اور فروغ پاتی ہیں لیکن اردو وہ مظلوم زبان ہے کہ جس کا جب، جہاں اور جیسے جی چاہا، اسے بدترین طور پر استعمال کر سکتا ہے۔ زبانوں میں الفاظ کی قدرتی آمد و رفت کے ساتھ کسی زبان کا محاورہ اور روز مرہ بول چال بدلنے لگے تو پھر "خبر لیجیے دہن بگڑا" کے زمرے میں آجاتا ہے۔ یہ تبدیلی کسی زبان کے خاتمے تبدیلی ہے، جس کی اصلاح ہر ذی شعور معاشرے کی ذمہ داری ہے۔

فی زمانہ ہمارا مزاج جس ابتری اور ابتدال کا شکار ہے اس کے نتیجے میں عام آدمی علمی اور ادبی کتابوں سے اس حد تک کنارہ کش ہو چکا ہے کہ گھروں میں ان کا وجود تک برداشت نہیں کیا جاتا، لہٰذا ان کتابوں کے ذریعے انتظام و التزام سے لکھی ہوئی زبان نے بھی اس سے منہ موڑ لیا ہے اور شائستگی و شیرینی اس سے غائب ہو تی جا رہی ہے۔
زبان کے سلسلے میں برتی جانے والی شعوری اور غیر شعوری آسانیوں کی وجہ سے ایک ایسی لسانی فضا تیار ہو چکی ہے جس کے منفی اثرات دور رس خرابیوں کی شکل میں ظاہر ہونے لگے ہیں۔
ابن انشاء نے جوش ملیح آبادی کے لیے کہا تھا کہ :
"اردو زبان جوش صاحب کے گھر کی لونڈی ہے وہ اس کے ساتھ سلوک بھی ویسا ہی کرتے ہیں"۔
اب صورتِ حال یہ ہے کہ اردو زبان صرف جوش صاحب جیسی جیّد ادبی شخصیت کی نہیں بلکہ ہماشما کی لونڈی بنی ہوئی ہے اور وہ اس کے ساتھ سلوک بھی ویسا ہی کر رہے ہیں۔ اس عمل کا سہرا ذرائع ابلاغ کے سر بندھتا ہے کیونکہ زبان کی ترویج و اشاعت کی جتنی ذمہ داری ذرائع ابلاغ پر عائد ہوتی ہے شاید ہی کسی اور شعبے پر ہوتی ہو۔ خاص طور پر برقی ذرائع ابلاغ اس کے زیادہ ذمہ دار ہیں۔

سوال یہ ہے کہ تبدیل کیے جانے والے الفاظ کو آسان اور مشکل سمجھنے کا پیمانہ کیا ہے؟ یہ بالکل اسی طرح ہے جیسے کھلونوں سے کھیلتے ہوئے کسی بچے کو اس کے خوبصورت کھلونے چھین کر بد صورت اور تکلیف دہ کھلونے یہ کہہ کر پکڑا دیئے جائیں کہ یہ زیادہ اچھے ہیں۔ عوام کا ذہن ذرائع ابلاغ کے آگے بالکل بچوں کے ذہن کی طرح ہوتا ہے۔ جس لفظ کی ٹی وی اور اخبار بار بار تکرار کرتے ہیں وہی ان کی زبانوں پر چڑھ جاتا ہے۔ یہی انہیں پسند بھی آنے لگتا ہے۔ زبان کے محاورے اور روز مرہ کے بگاڑ کی چند مثالیں ملاحظہ فرمائیں:
واقفیت یا معلومات کی جگہ جانکاری،
کسی معاملے کی وجہ سے پریشانی کے بجائے کسی بات کو لے کر پریشان ہونا،
منسلک جیسے خوبصورت لفظ کی جگہ جڑا ہوا یا جڑی ہوئی،
آپس کے تعلقات کی جگہ آپسی تعلقات ،
تبدیلی کی جگہ بدلاؤ،
اچھی طرح کی جگہ اچھے سے،
قدم اٹھایا جاتا ہے اور اقدام کیا جاتا ہے ، لیکن ہمارے یہاں سب ہی اقدام اٹھا رہے ہیں۔
لفظ عوام اور لالچ جو اب تک صیغۂ مذکر میں تھے، اپنی جنس تبدیل کر چکے ہیں،
کیا چل رہا ہے یا معلوم چلا، یا فلاں کے دماغ میں کیا چل رہا ہے ۔۔۔ سن کر ایسا محسوس ہوتا ہے کہ بولنے والوں کا دماغ چل گیا ہے ۔

زبانیں ، بولی سے زبان بننے کی طرف سفر کرتی ہیں لیکن یوں لگتا ہے کہ اردو اپنے سفر میں جس فصاحت و بلاغت سے سرفراز ہوئی تھی ، اس کے بولنے والے خود اس مقام سے محروم کر کے اسے محض ایک عامیانہ بولی کا درجہ دینے میں خوش ہیں۔
تلفظ بگڑ رہا ہے، الفاظ و محاورات اپنی معنویت کھو رہے ہیں ، ان کی لغوی، ادبی اور صوتی جہتیں تپلٹ ہو کر رہ گئی ہیں۔

لمحۂ فکریہ یہ ہے کہ اگر بے لگام معاشرے کی ترجیحات ابتذال، گراوٹ اور لایعنیت ہو جائیں تو کیا ذرائع ابلاغ بھی شعوری اور لاشعوری طور پر ان منفی رجحانات کی ترویج و اشاعت کا کام زبان کے بگاڑ کی صورت میں انجام دیں گے؟
اب جب کہ ہماری قوم اردو بولنے کے نہیں، بھولنے کے عمل سے گزر رہی ہے ہمیں اپنے مستقبل کو حال سے بچانا ہوگا، ورنہ ہم صرف ماضی ہی میں سانس لے سکیں گے۔

شاید ہم یہ حقیقت بھول چکے ہیں کہ جس قوم کی زبان نہیں رہتی وہ قوم بھی نہیں رہتی۔

***

مضمون نگار : شاہدہ تبسم (بشکریہ روزنامہ "انقلاب" ممبئی)

پاکستانی رینجرز کی طرف سے عام آدمی کا قتل یا ۔۔۔۔؟؟

2011-06-18T05:19:00.004+05:30

پہلے یہ خبر دیکھئے۔
حیدرآباد (دکن) کے مقبول مسلم قائد پر قاتلانہ حملہ

اس کی مختصر کہانی کچھ یوں ہے کہ ۔۔۔۔

حیدرآباد کی واحد مسلم سیاسی جماعت "مجلس اتحاد المسلمین" کے ریاستی اسمبلی فلور لیڈر اکبر الدین اویسی پر لینڈ مافیا کی طرف سے قاتلانہ حملہ کیا گیا۔
میدانِ صحافت میں اس مسلم سیاسی جماعت کی نمائیندگی ان کا اپنا اردو اخبار "اعتماد" کیا کرتا ہے اور عوام میں یہی سمجھا جاتا ہے کہ تین قدیم اور مشہور اردو اخبارات سیاست ، منصف اور رہنمائے دکن کے صحتمندانہ مقابلے میں یہ اخبار منظر عام پر آیا ہے۔
تو اس حملہ کی ایڈیٹ کی ہوئی ویڈیو کی تشہیر کی گئی اور تینوں اخبارات کی جانب سے حملہ آور (جس کو موقع پر سیکوریٹی پرسنل نے گولی مار کر ہلاک کر دیا تھا) کو شہید قرار دیا گیا اور ایک "معصوم" کی جان لینے کا ڈھنڈورا پیٹا گیا۔
بعد میں جب "اصل ویڈیو" سامنے آئی تب سارے شہر کو معلوم ہوا کہ اسی "معصوم" نے آگے بڑھ کر نہتے فلور لیڈر پر اپنے خنجر سے پےدرپے وار کئے اور جان لینے کی کوشش کی جس پر سیکوریٹی کے آدمی نے حملہ آور کو کھینچ کر ہٹانا چاہا مگر مسلسل وار ہوتے دیکھ کر اس نے بالآخر گولی چلا کر حملہ آور کو ہلاک کر دیا۔

یہ پوری حقیقت یوٹیوب کی اس اصل ویڈیو میں دیکھی جا سکتی ہے۔

۔۔۔
اب آئیے حالیہ پاکستانی سانحہ کی طرف۔
پاکستان ، ہندوستان ، سعودی عرب اور یوروپ و امریکہ کے آن لائن اخبارات سے ہمیں بس یہی معلوم ہوا کہ پاکستانی رینجرز نے ایک عام آدمی (17 سالہ معصوم نوجوان سرفراز) کو بےسبب گولی مار کر ہلاک کر دیا !!
اس خبر کو اتنا پھیلایا گیا اور ویڈیو (ایڈٹ کی ہوئی ؟؟) اور تصویر کی اس قدر اشاعت ہوئی کہ عام آدمی میڈیا کے زیر اثر وہی کچھ سمجھنے لگ گیا جو اسے میڈیا نے بتایا اور جتایا۔
اور حسب عادت و روایت پاکستان کی بگڑتی ہوئی لا اینڈ آرڈر صورتحال پر ہر جانب کی صحافت کے مضامین سامنے آنے لگے۔

دبئی میں مقیم خلیج ٹائمز کے نامور صحافی اعجاز ذکا سید کا بھی ایک مضمون اسی ضمن میں عرب نیوز (16/جون/2011) میں شائع ہوا ہے :
A walk in the park in Pakistan

ابھی دو دن قبل فیس بک پر اس سانحے سے متعلق مکمل ویڈیو نظر سے گزری۔ آپ بھی یہاں ملاحظہ فرمائیں ۔۔۔
Conspiracy Revealed Against Pakistan Armed Forces (Rangers) !!!

میں اعجاز صاحب کے دیانتدارانہ صحافتی جذبے ، انسانیت نوازی اور جذباتیت کو جھٹلانا نہیں چاہتا لیکن ۔۔۔۔ یہ بات بھی عجیب لگتی ہے کہ ایک سانحہ (یا ایک دیدہ دانستہ قتل ہی سہی) کی بنا پر کیا ایک پورے ملک ، ایک قوم یا ایک حکومتی ادارے کو نشانِ ملامت بنانا درست ہے؟
اس طرح تو گجرات کے المناک سانحے پر مودی کی "ریاستی دہشت گردی" کے ضمن میں جملہ ہندوستانی پولیس کے "ظالم" ہونے کا بھی جواز نکل آتا ہے۔
میں ایک اور واقعہ اس ضمن میں یاد دلانا چاہوں گا۔

حیدرآباد (دکن) میں مولانا نصیر الدین صاحب کو گجرات پولیس نے دوبارہ گرفتار کیا تھا اور غالباً 2004ء میں آندھرا پردیش ڈائرکٹر جنرل پولیس آفس کے سامنے انہیں ان کی جماعت کے نوجوان کارندوں نے گھیرے میں لے لیا اور گجرات پولیس کے مقابل آ گئے۔ ڈی۔ایس۔پی نے اپنا ریوالور نکال کر وارننگ دی کہ یہ سرکاری معاملہ ہے اور اگر کسی نے مداخلت کی تو وہ گولی چلا دے گا۔ تب سعیدآباد کا ایک نوجوان سامنے آیا اور مولانا کو پولیس کے شکنجے سے چھڑانے کی کوشش کرتے ہوئے بولا کہ : ہمت ہے تو چلاؤ گولی۔
کیا ہوا؟
ڈی۔ایس۔پی نے اسی وقت نوجوان کے سینے پر گولی چلا ڈالی۔ اور ہسپتال کو لے جاتے ہوئے راستے میں وہ نوجوان مجاہد سلیم فوت ہو گیا۔
کون غلط تھا اور کون صحیح ؟ اس کا سوال نہیں۔ بلکہ سوال یہ ہے کہ ۔۔۔۔۔
کیا حکومتی اہلکاروں کی وارننگ کے باوجود بھی عوام احتجاجاً حکم نہ مانیں تو پولیس کو کوئی ایکشن نہیں لینا چاہئے؟
یہ درست ہے کہ فرائض کی مداخلت میں عام آدمی کو گولی مار دینے کا حکم نہیں دی جاتا۔ لیکن پولیس کے ایک آدمی یا ایک گروپ کی حرکت کیا اس بات کا جواز بنتی ہے کہ پورے ہی نظام کو تنقید کا نشانہ بنا دیا جائے؟

پولیس یا فوج یا دیگر حساس ادارے اگر اپنے فرائض کی تکمیل میں انسانی جانوں کا خیال کئے بغیر سختی برتتے ہیں تو کیا یہ خلاف انسانیت عمل کہلائے گا؟
اگر فسادات کے دوران کوئی اعلیٰ حکومتی عہدیدار "شوٹ آن سائیٹ" کا حکم جاری کرے تو کیا وہ حکم انسانیت کے دائرے سے باہر قرار دیا جائے گا؟

یہ بالکل درست ہے کہ اس وقت پاکستان کی مجموعی صورتحال انتہائی نازک ہے ۔۔۔ لیکن ، پاکستانی رینجرز کی اس کاروائی پر ہمارے سامنے فی الوقت میڈیا کا صرف ایک رخ ہے ، ویسے ہی جیسا کہ اسامہ بن لادن کی ہلاکت پر مغربی میڈیا کا شور شرابہ ہوا تھا ۔۔۔۔
اور ایک ہی رخ کے سہارے "انسانیت نوازی" کے نام پر کسی کو مطعون کرنا قابل تعریف بات بہرحال نہیں ہو سکتی۔ اور نہ ہی یہ قرین انصاف ہے کہ پاکستانی رینجرز کے اس عمل کو اسرائیل اور امریکہ کی دہشت گردی کے مماثل قرار دیا جائے۔

عزت کی خاطر قتل کے خلاف سپریم کورٹ کا تاریخ ساز فیصلہ

2011-06-02T20:24:00.003+05:30

ہے موجزن اک قلزم خوں ، کاش! یہی ہو
آتا ہے ابھی دیکھئے کیا کیا میرے آگے

مرزا غالب کا مذکورہ بالا شعر دہراتے ہوئے سپریم کورٹ ہند کے جسٹس مارکنڈے کاٹجو اور جسٹس گیان سودھا مشرا نے "عزت کی خاطر قتل" کے ایک مقدمہ کا تاریخ ساز فیصلہ سنایا ہے۔

مکمل فیصلے کی نقل ، انگریزی میں : یہاں

واضح رہے کہ غالب کے مندرجہ بالا شعر کا مطلب یہ ہے کہ ۔۔۔
سمندر میں فی الحال جو خون سے بھری طوفانی لہریں نظر آ رہی ہیں ، کاش ! بربادی یہیں تک محدود ہو ، کیونکہ کسی کو کچھ نہیں معلوم کہ مستقبل میں اس سے زیادہ نہ جانے کیا کیا دیکھنا پڑ جائے؟

عزت کی خاطر قتل جیسے جرم کی وارداتیں زیادہ تر شمالی ہند کی ریاستیں بطور خاص پنجاب ، ہریانہ ، راجستھان اور اترپردیش میں پیش آتی رہی ہیں۔
"عزت کی خاطر قتل (honour killings)" کا ایک واقعہ دہلی میں آج سے 5 سال قبل (مئی 2006ء) پیش آیا تھا۔
ایک شخص بھگوان داس کی شادی شدہ بیٹی اپنے شوہر کو چھوڑ کر اپنے ایک رشتہ دار کے ساتھ رہنے لگی تھی۔ بیٹی کا یہ فیصلہ بھگوان داس کو اتنا توہین آمیز لگا تھا کہ اس نے اپنی "عزت کی خاطر" بجلی کے تار سے اپنی بیٹی کا گلا کاٹ کر اسے قتل کر دیا۔
دہلی کے سشن کورٹ نے اس غیر انسانی جرم کے لئے بھگوان داس کو "عمر قید" کی سزا سنائی۔

عمر قید کی سزا سے بچنے کے لئے بھگوان داس نے سپریم کورٹ کے دروازے پر دستک دی۔
مگر ۔۔۔۔
ہندوستان کے سپریم کورٹ نے 9/مئی/2011ء کو تاریخ ساز فیصلہ سناتے ہوئے کہا کہ :
"عزت کی خاطر قتل" کے واقعات ملک کے لئے بدنما داغ ہیں اور ایسے گھناؤنے ، غیر انسانی اور زمین دارانہ ذہنیت والے جرم کے لئے "سزائے موت" دی جانی چاہئے۔ ایسے قتل خاص الخاص (rarest of rare) زمرے میں آتے ہیں۔

معروف صحافی شاہد اے۔ چودھری اس فیصلے پر تبصرہ کرتے ہوئے لکھتے ہیں کہ :

اگرچیکہ پہلی نظر میں عزت کی خاطر قتل کو "خاص الخاص (rarest of rare)" جرم ماننا عجیب معلوم ہوتا ہے کیونکہ جو جرم بہت عام ہو گیا ہے ، اسے rare کیسے کہا جا سکتا ہے؟
لیکن اس فیصلے کا باریکی سے جائزہ لینے کے بعد واضح ہو جاتا ہے کہ سپریم کورٹ نے "عزت کی خاطر قتل کرنے" کو اعداد و شمار سے باہر رکھ کر ٹھیک کیا ہے۔
اگر پھانسی کی سزا کو برقرار رکھنے کا مقصد مجرمانہ رجحان کے حامل افراد کو خبردار کرنا ہے کہ وہ جرم سے دور رہیں ۔۔۔ تو ۔۔۔
عزت کی خاطر قتل یقیناً ان جرائم کے زمرے میں آتا ہے جس پر فوراً روک لگانے کی ضرورت ہے۔
اس لئے یہ یقیناً rarest of rare جرم ہے !

پنچایتیں تو ضعیف الاعتقاد ذہنیت کے ساتھ کام کرتی ہیں اور اس جدید دور میں بھی دو محبت کرنے والے دلوں کو ملنے نہیں دیتیں اور اس کے لئے قتل جیسا جرم بھی کرنے کو تیار رہتی ہیں۔ اس لئے دستور کے وقار کو برقرار رکھنے کی ضرورت ہے۔ اور یہ اسی وقت ممکن ہے جب پنچایتوں کو سخت پیغام دیا جائے۔ لہذا سپریم کورٹ کا فیصلہ لائق خیر مقدم ہے۔

درون ہند - اردو ادب اپنے تلبیسی دور میں ۔۔۔

2011-05-24T18:48:00.008+05:30

بشکریہ : اداریہ - ماہنامہ "تحریر نو (ممبئی)" [مارچ / 2011ء] - ظہیر انصاری

اردو ادب اپنے انتہائی Falsehood دور (تلبیسی دور) سے گذر رہا ہے ۔ اس کے ادیبوں اور شاعروں کی خوش گمانیاں حد درجہ بڑھی ہوئی ہیں ۔ یہ خود کو بہت بڑا سپر اسٹار سمجھنے لگے ہیں۔ احساس بر تری کے شکار یہ ادیب اور شاعر اپنے آگے کسی کو کچھ سمجھنے یا ماننے کو تیار نہیں۔یہ اپنی شہرت کے لئے نت نئے حربے استعمال توکرتے ہی ہیں اس شہرت کو بھنانے کے لئے بھی نئی نئی چالیں چلتے رہتے ہیں ۔
ہمارے کچھ قارئین یہ پوچھتے رہتے تھے کہ سلسلہ وار ناول"گرداب" جس کی تین قسطیں "تحریر نو" میں لگا تار چھپیں ، کیوں نہیں آ رہا ہے ، تو مجھے جواب دینا نہیں بن پڑ رہا تھا ۔ میں یہ کہتا رہا کہ اگلے شمارے میں آئے گا ۔۔۔ اگلے شمارے میں آئے گا ۔ جب حد ہو گئی تو اس کے مصنف شموئل احمد سے پوچھا کہ " جب آپ اگلی قسطیں نہیں بھجوا رہے ہیں تو کیوں نہ میں 'نوٹ' لگا دوں کہ کسی وجہ سے ناول کی اگلی قسطیں شائع نہیں ہوں گی"۔
"آپ کیوں نوٹ لگائیں گے ۔ ایسا ہی چلنے دیجئے ۔ لوگوں کا تجسس بر قرار رہے گا"۔ یہ ان کا جواب تھا۔
جب میں نے انھیں یا د دلایا کہ آپ نے وعدہ کیا تھا کہ آپ مکمل ناول جلد بھیج دیں گے ۔ اب آپ اپنے وعدے سے مکر رہے ہیں ۔ پھر وہ چراغ پا ہو گئے ۔
" آپ کو معلوم نہیں کہ آپ کس سے بات کر رہے ہیں؟ میں کسی اور کام میں مصروف ہوں ۔ مجھے ہندی والے ایک لاکھ روپیہ دے رہے ہیں ۔ آپ دیں گے کیا؟" ۔
یہ ان کا سخت جواب تھا۔ اکثر اردو والے یہی کہتے ہیں کہ آپ کو معلوم نہیں آپ کس سے بات کر رہے ہیں۔ دوسری زبان کا کوئی ادیب ایسی علت میں مبتلا نہیں ہے۔

ہوا یہ کہ انھی دنوں واجدہ تبسم کا انتقال ہوا تھا ۔ جس کی خبر "صحافت" ممبئی میں چھپی تھی ۔ فاضل رپورٹر کے مطابق ستّر کی دہائی میں " شمع " والے واجدہ تبسم کو فی افسانہ دو ہزار روپے دیتے تھے اور پانچ اقساط کی رقم پیشگی ادا کردیتے تھے ۔ یہ پڑھنا تھا کہ شموئل احمد کا دماغ خراب ہو گیا اور وہ شخص جو آئے دن فون کیا کرتا تھا تا کہ ان کا افسانہ / قسط وار ناول "تحریر نو" میں چھپ سکے اچانک مادی پرست ہو گیا ۔ انھیں نروان ہوا کہ ان کے ناول کی وجہ سے تحریر نو کی ریڈر شپ بڑھ گئی ہے کیوں نہ روپے کا ڈیمانڈ کیا جائے ۔ چوتھی قسط کے لئے جب میں نے فون کیا تھاغالباً چھ ماہ پہلے تو شموئل احمد صاحب نے ریاکارانہ طور پر یہ جواب دیا تھا کہ میں بالراست Lap Top پر لکھتا ہوں ۔ فائل کرپٹ ہو گئی ۔ retrieve کر کے بھیجتا ہوں ۔ لیکن ہوا یہ کہ آہستہ آہستہ ان کا ہارڈ ڈسک (بمعنی دماغ) کرپٹ ہونا شروع ہو گیا جو شاید ممکن نہیں کہ اب retrieve ہو سکے ۔

قارئین "تحریر نو" اس تفصیل کو برائے نوٹ سمجھیں ۔ گرداب کی اگلی قسط کیا اب کوئی بھی چیز شموئل صاحب کی نہیں چھپے گی ۔ انھوں نے اس ethics سے انحراف کیا ہے جسے انھیں نہیں کرنا چاہئے ۔ بنیادی زبان اردو ہی ہے جس سے انھوں نے اپنی شہرت کی عمارت کھڑی کی ہے ۔ اب ہندی کا رنگ و روغن پیش کر کے آخرتِ اردو نہ گنوائیں کہ یہ کس قدر حماقت ہے کہ اردو کا جو حال ہے اس کی درستی میں صاحبِ قلم حضرات اپنا تعاون نہ پیش کر کے الٹا کچھ ڈیمانڈ کریں ۔ انھیں ضرور اپنا معاوضہ طلب کرنا چاہئے لیکن ان اداروں سے جو خودہی محنتانہ دیتے ہیں اور یہ انھیں معلوم بھی ہے کہ وہ ادارے کون کون سے ہیں ؟ شموئل احمد یہ نہ بھولیں کہ لاکھ وہ ہندی میں چھپیں لیکن کہلائیں گے اردو کے رائٹر ہی۔

کچھ لوگ یہ کہہ سکتے ہیں کہ شموئل احمد کی اس حرکت پر اداریہ لکھنے کی کیا ضرورت ہے لیکن ہمیں کہنے دیجیئے کہ وہ جس hype اور تجسس کے غبارے میں ہوا بھرنا چاہتے ہیں اس ہوا کو ہوا کرنا ہی ہمارا مقصد ہے۔ ہم یہ دعوے کے ساتھ کہہ سکتے ہیں کہ انہوں نے نہ صرف ہمیں گمراہ کیا بلکہ تمام قارئین سے بد دیانتی کی ہے۔ ان کا ناول نہ صرف ادھورا ہے بلکہ ابھی ابتدائی مراحل سے بھی کوسوں دور ہے۔ قارئین کرام یاد کریں کہ کس قدر چالاکی سے شموئل احمد نے پہلی قسط "افسانے"عنوان کے تحت چھپوایا تھا۔ بعد میں وہ قسط وار ناول کے طور پر چھپنے لگا۔ کیا ایک (خود ساختہ بڑے) رائٹر کو یہ سب زیب دیتا ہے، اور کیا یہ حربے استعمال کرنا ضروری ہیں؟

ادب میں Falsehood کی دوسری مثال ہمارے راشد انور راشد ہیں ۔ انھیں بھی بڑا شاعر ہونے کا obsession ہو گیا ہے ۔ "افکارِ مدیران ہند" نمبر ملنے پر فون کیا کہ آپ نے خورشید طلب پر مضمون کیوں شائع کیا ہے جب کہ مجھ پر مضمون شائع کرنے سے آپ نے انکار کر دیا ۔ میرا جواب تیار تھا کہ :
وہ اس لئے کہ خورشید طلب پر مضمون عشرت ظفر صاحب نے براہ راست بھیجا تھا جب کہ آپ نے اپنی شاعری پر مضمون ڈاکٹر احمد امتیازسے لکھوا کر ( ہو سکتا ہے کہ لکھ کر بھی ) آپ نے خود بھیجا ہے ۔
اس تلخ جواب سے وہ تلملا اٹھے ۔ ان کا sms آیا کہ آپ مجھے رسالہ مت بھیجیں ۔

راشد انور راشد "تحریر نو" کے خریدار ہیں۔ اس خریداری کو قبول کرنے کی بھی کہانی بڑی دل چسپ ہے۔ ایک روز فون پر کہنے لگے کہ آپ کا رسالہ مل نہیں رہا ہے۔
میرا جواب : "میں نے بھیجنا بند کر دیا ہے، کیوں کہ آپ خریدار نہیں ہیں، اور مفت میں ہم کب تک بھیجیں"۔
"ارے بھائی میں تو پچاسوں رسالوں کا خریدار ہوں، میں سمجھ رہا تھاکہ یہ تو ہمارا رسالہ ہے ، جب تک میں روپئے نہ بھیجوں اب آپ رسالہ مت بھیجئے گا ۔۔۔" یہ ان کا جواب تھا۔
تب جا کر 525 روپئے بینک میں جمع کروائے۔ اب خریدار ہیں اور sms کر کے کہتے ہیں کہ رسالہ مت بھیجئے۔ مطلب آپ قارئین سمجھ سکتے ہیں۔ صرف اور صرف pressure ڈالنا ہے اور کچھ نہیں۔ راشد انور راشد اتنے بڑے شاعر ہو گئے ہیں کہ ان پر مضمون آئے۔ یہ خود ستائش ہے۔ بقول شخصے :
"یہ ویسے بچے ہیں جو اپنی ماں کی پیٹ میں پورے نو مہینے بھی رہنا نہیں چاہتے"۔
یہ چاہتے ہیں کہ جتنی جلدی ہو شہرت، دولت اور عزت gain کر لیں۔ راشد انور راشد سے ہم یہ کہنا چاہتے ہیں کہ اتنی بھی جلدی کیا ہے ، آپ کو recognition ملنا ہو گا تو مل ہی جائے گا۔

قارئین کرام سے میں یہ کہنا چاہتا ہوں کہ ۔۔۔
آخر یہ ہمارے ادباء و شعراء کو ہوکیا گیا ہے ؟
یہ اپنے میں اس قدر مست کیوں ہیں ؟
صرف اپنی ہی چیزیں چھپوانا اور پڑھنا اور پڑھوانا کیوں چاہتے ہیں ؟
کیوں یہ صبر کا دامن تھامنا نہیں چاہتے ؟
یہ رویہ اردو ادب کو لے ڈوبے گا ۔ یہی وجہ ہے کہ ویسی شخصیتیں ناپید ہو گئی ہیں جو اگلے دنوں میں ہوا کرتی تھیں۔ Larger than life image والی کوئی شخصیت ہمیں دور دور تک دکھائی نہیں دیتی۔ اس صورت حال پر ہمیں غور کرنے کی ضرورت ہے ۔

گھر سے مسجد ہے بہت دور چلو یوں کر لیں - ندا فاضلی کا احتساب

2011-05-23T16:59:00.001+05:30

گھر سے مسجد ہے بہت دور چلو یوں کر لیں
کسی روتے ہوئے بچے کو ہنسایا جائے

ندا فاضلی کے اس شعر کو انسان دوستی کا مظہر کہا جاتا ہے اور اس شعر پر وہ بیشتر مشاعروں میں کافی داد بھی پا چکے ہیں۔

لیکن ۔۔۔۔
ندا فاضلی ہی کے ہم عصر شاعر شکیل اعظمی نے اس شعر پر نقد کرتے ہوئے کہا ہے کہ :
یہ شعر انسان دوستی کا استعارہ نہیں بلکہ محض ایک اہم اور بنیادی مذہبی فریضے سے انکار کی حیلہ تراشی ہے۔ سب سے پہلی بات تو یہ کہ دوسرے مصرعہ کا پہلا لفظ "کسی" غور طلب ہے۔ یعنی ایسا نہیں ہے کہ متکلم مسجد کیلئے نکلا ہو اور راستے میں اسے ایک روتا ہوا بچہ مل گیا ہو جسے ہنسانے کو وہ نماز پر ترجیح دے رہا ہو ، بلکہ یہاں یہ معمولی سا لفظ ("کسی") بتا رہا ہے کہ فی الحال کوئی روتا ہوا بچہ وہاں موجود ہی نہیں ہے لہذا وہ کسی روتے ہوئے بچے کی تلاش میں ہے۔

معروف ادیب اور مدیر سہ ماہی "اثبات" اشعر نجمی ، ندا فاضلی کے اس شعر پر نقد کو آگے بڑھاتے ہوئے کہتے ہیں :
اب اگر کوئی یہ کہے کہ کسی شعر کو پرکھنے کے لئے مذہبی معیار نہیں بلکہ ادبی معیار کی ضرورت ہوتی ہے تو پھر میں یہ عرض کرنا چاہوں گا کہ : اگر شاعر نے اپنا شعر مذہبی بنیادوں پر ایستادہ کیا ہے تو پھر اس کے استعاراتی یا فنی نظام سے پہلے اس کا محاکمہ بھی انہی مذہبی نظام کی بنیادوں پر کیا جائے گا۔
چونکہ شعر مذکور کا متکلم بچے کے ہنسانے کو مسجد جانے پر ترجیح دے رہا ہے تو پھر اس کی نیت کا محاسبہ بھی ضروری ہو جاتا ہے کہ وہ واقعی مسجد جانا چاہتا ہے یا اس کی دوری کے بہانے اس کا نعم البدل پیش کر کے محض اپنی انسان دوستی کا ڈھنڈورا پیٹنا چاہتا ہے؟؟

ندا فاضلی کا ایک اور شعر دیکھیں :
بچہ بولا دیکھ کر مسجد عالی شان
اللہ تیرے ایک کو اتنا بڑا مکان

یہ کیسے مان لیا جائے کہ ندا فاضلی کو مسجد کے متعلق یہ علم نہیں کہ لغوی معنی میں یہ اللہ کا مکان نہیں بلکہ عبادت گاہ ہے اور مسجد کو اللہ کا گھر کنایتاً بولا جاتا ہے۔ اس کے باوجود اگر ندا فاضلی اللہ میاں کو one room kitchen میں ہی محصور کرنے کے خواہش مند ہیں تو انہیں اس کا جواز بھی پیش کرنا چاہئے تھا۔ انہیں یہ بتانا چاہئے تھا کہ آخر وہ مسجد پر مفلوک الحالی برستا کیوں دیکھنا چاہتے ہیں؟
اقبال نے اسی موضوع کو جب چھوا تو وہاں تشکیک کا پہلو بالکل نہیں تھا بلکہ انہوں نے "مذہبی منافقت" پر کاری ضرب لگائی ۔۔۔
مسجد تو بنا لی شب بھر میں ایماں کی حرارت والوں نے
من اپنا پرانی پاپی ہے برسوں میں نمازی بن نہ سکا

اقبال کے اس شعر میں تضحیک نہیں طنز ہے جس میں اصلاح معاشرہ کی واضح جھلک موجود ہے۔ انہوں نے مسجد کے وجود پر سوالیہ نشان لگانے کے بجائے "ضعف ایمان" کو نشان زد کیا۔
اس کے برخلاف ندا فاضلی مسجد کو ہی شک بھری نگاہ سے دیکھنا شروع کر دیتے ہیں اور بچے کی زبان سے اپنے من کی بات کہہ جاتے ہیں۔

ان مثالوں سے واضح ہے کہ "انسان دوستی" جیسی اصطلاحیں ، درحقیقت اپنے مخصوص افکار کی تشہیر کے لئے اور اپنے مقابل افکار کو زیر کرنے کے لئے استعمال میں لائی جاتی ہیں۔

اٹھ اٹھ کے مسجدوں سے نمازی چلے گئے
دہشت گردوں کے ہاتھ میں اسلام رہ گیا

میں اس شعر پر ندا فاضلی کو مبارکباد دینا چاہوں گا کہ آج تک جو بات اتنا کھل کر بالا صاحب ٹھاکرے ، پروین توگڑیا ، نریندر مودی اور جارج بش بھی نہ کہہ پائے ، انہوں نے کہہ کر اس میں اولیت حاصل کر لی ہے۔
لیکن یہاں میں ان سے صرف اتنا دریافت کرنا چاہوں گا کہ حیدرآباد ، مالیگاؤں ، عراق ، افغانستان ، فلسطین وغیرہ کے متعلق ان کا کیا موقف ہے؟
یہ جو ہر روز نئے نئے انکشافات ہو رہے ہیں کہ فلاں دہشت گردی کے معاملے میں مسلمانوں کے بجائے کسی اور قوم کے مذہبی اور سیاسی رہنماؤں کے ہاتھ تھے ، یا پھر وہ معصوم مسلم نوجوان جنہیں دہشت گر بنا کر جیلوں میں سڑایا جا رہا ہے ، یا پھر وہ بابو بجرنگی جو عدالت سے ضمانت پا کر کھلے عام گجرات کی نسل کشی پر فخریہ بیان دے رہا ہے ، یا وہ شری کرشنا کمیشن جس کی رپورٹ پر دھول کی ایک موٹی تہہ جم چکی ہے ۔۔۔۔ لیکن اب تک نہ تو اس پر کوئی کاروائی ہوئی اور نہ اس کی کوئی امید ہے۔ یا پھر توہین رسالت کی گلوبلائیزیشن ، عراق میں 17 لاکھ عام شہریوں کا قتل عام ، فلسطین میں اسرائیلی فوجوں کا قہر ، افغانستان میں امن اور انسان دوستی کے نام پر عورتوں ، بوڑھوں اور بچوں کا قتل عام وغیرہ وغیرہ سے کیا ندا فاضلی واقعی بےخبر ہیں؟
مجھے نہیں پتا کہ وہ روزانہ کون سا اخبار پڑھتے ہیں یا کون سا نیوز چینل دیکھتے ہیں ، اس سے کوئی فرق بھی نہیں پڑتا کیونکہ ایک عام شخص بھی ان حقائق سے واقف ہے۔
میرے خیال میں ندا فاضلی ہی بتا سکتے ہیں کہ ان دہشت گروں میں کتنوں کا تعلق اسلام سے ہے اور کتنوں کی ڈاڑھیاں ہیں؟ مجھے نہایت افسوس کے ساتھ یہ کہنا پڑ رہا ہے کہ ندا فاضلی کے محولہ بالا افکار نہ صرف حقائق سے مکمل بےخبری کا ثبوت ہیں بلکہ دانشورانہ بددیانتی سے بھی عبارت ہیں جنہیں وہ محض زور بیاں کے بل پر اپنے قارئین و سامعین سے داد وصول کرنے کے لئے پیش کرتے رہے ہیں۔

اس مقام پر اگر کوئی شخص یہ نتیجہ نکالتا ہے تو شائد غلط نہ ہوگا کہ "انسان دوستی" اور "انسانی دردمندی" ندا فاضلی اور ان کے ہم خیالوں کا ایمان نہیں بلکہ ان کے لئے یہ صرف ایسے ادبی تقاضے ہیں جن کی بنیاد پر وہ محض ان کا تاثر پیدا کرنے کی کوشش کرتے ہیں ، جبکہ وہ دانستہ یا غیر دانستہ طور پر لوگوں کی مقدس وابستگیوں ، ان کے عقائد اور ان کے مذہبی جذبات وغیرہ جیسی چیزوں کا مذاق اڑاتے رہے ہیں جو بقول وارث علوی ، یہ بتانے کے لئے کافی ہے کہ :
انسانی دردمندی کا چشمہ اگر سوکھ جائے تو آدرش اور اخلاق سفاکیوں کی نقاب بن جاتے ہیں۔

کلچر ، جس میں مذہب کا کردار خواہ کتنا ہی چھوٹا اور معمولی کیوں نہ ہو ، قابل احترام ہے کہ وہ لوگوں کو حیات کا قرینہ بخشتا ہے۔ اور اتنا تو خیر ندا فاضلی تسلیم کرتے ہی ہوں گے کہ کسی بھی کلچر کو گزند پہنچانے اور تباہ کرنے کی کوشش انسانیت کے خلاف ہولناک جرم ہے۔

کچھ رد و بدل و اضافہ کیساتھ ، بشکریہ : اداریہ سہ ماہی "اثبات"۔

پانچ ریاستوں کے اسمبلی انتخابات (2011) نتائج

2011-05-15T18:32:00.001+05:30

ہندوستان کی پانچ ریاستوں (مغربی بنگال ، تامل ناڈو ، کیرالہ ، آسام اور پوڈوچیری) میں منعقدہ حالیہ اسمبلی انتخابات کے نتائج جمعہ 13/مئی کی شام سامنے آ چکے ہیں۔ یہ نتائج سیاسی سطح پر زبردست تبدیلی کے نقیب ثابت ہوئے ہیں۔
کانگریس کے لئے یہ انتخابات اس وجہ سے اہمیت کے حامل تھے کہ بدعنوانیوں کے الزامات سامنے آنے کے بعد پہلی مرتبہ "یو پی اے" کو عوام کا سامنا کرنا پڑا۔ اس کے باوجود 4 کلیدی ریاستوں میں سے تین (کیرالہ ، آسام اور مغربی بنگال) میں کانگریس نے شاندار مظاہرہ کیا ہے۔ اور ان انتخابی نتائج سے کانگریس کو نیا حوصلہ ملا ہے۔
حالانکہ آندھرا پردیش کے دو اہم حلقوں میں کانگریس کو شرمناک شکست ہوئی جہاں سابق چیف منسٹر وائی ایس راج شیکھر کے فرزند اور اہلیہ نے اپنی نئی جماعت کے پرچم تلے شاندار کامیابی حاصل کی۔

مغربی بنگال :
جملہ نشستیں : 294
ترنمول کانگریس = 184
بایاں بازو (دونوں کمیونسٹ جماعتیں) = 42
کانگریس = 42
دیگر = مابقی

گذشتہ 34 برسوں سے جاری بائیں بازو محاذ کی بلا وقفہ حکمرانی (ورلڈ ریکارڈ !!) ختم ہو گئی۔
وزیر ریلوے اور صد ترنمول کانگریس ممتا بنرجی نے بائیں بازو کو اس کے گڑھ میں گھٹنے ٹیکنے پر مجبور کر دیا۔
مغربی بنگال میں کمیونسٹ جماعتوں (بایاں بازو) کے بدترین مظاہرہ کا اندازہ اس بات سے لگایا جا سکتا ہے کہ خود موجودہ وزیر اعلیٰ بدھا دیب بھٹا چارجی جنوبی کولکاتا کے حلقہ جادھو پور سے قریب 17 ہزار ووٹوں کی کمی سے شکست کھا گئے۔

تامل ناڈو :
جملہ نشستیں : 234
اے آئی ڈی ایم کے (جئے للیتا) = 150
ڈی ایم کے (کروناندھی) = 23
بایاں بازو = 19
کانگریس = 5
دیگر = مابقی
"آل انڈیا ان ڈی ایم کے" کی سربراہ جیہ للیتا تیسری مرتبہ چیف منسٹر کی حیثیت سے حلف اٹھائیں گی۔ 2G اسپکٹرم اسکام کی وجہ سے ڈی ایم کے کو شرمناک شکست کا سامنا کرنا پڑا ہے۔

کیرالہ :
جملہ نشستیں : 140
کمیونسٹ پارٹی = 13
کمیونسٹ پارٹی (مارکسٹ) = 45
کانگریس = 38
مسلم لیگ = 20
دیگر = مابقی
کمیونسٹ پارٹی کو مسلمانوں کے ساتھ ساتھ عیسائیوں کی برہمی کا سامنا کرنا پڑا ہے۔ اس کے مقابلے میں کانگریس اتحاد یو-ڈی-ایف کو 72 نشستیں حاصل ہوئی ہیں۔

آسام :
جملہ نشستیں : 126
کانگریس = 78
آسام گنا پریشد = 10
آل انڈیا ڈیموکرٹک فرنٹ = 18
دیگر = مابقی
کانگریس کو مسلسل تیسری مرتبہ کامیابی ملی ہے۔ ترون گوگوئی دوبارہ چیف منسٹر کی حیثیت سے حلف لینے کی تیاری میں ہیں۔

پوڈوچیری :
کانگریس = 7
اے آئی ڈی ایم کے (جئے للیتا) = 5
دیگر = مابقی

***
ہند کے مسلمانوں کی باشعوری کا ایک اظہار ۔۔۔۔۔۔۔۔

کیرالہ :
کیرالہ میں پہلی مرتبہ مسلم لیگ کے 20 ارکان منتخب ہوئے ہیں۔ کانگریس کی زیر قیادت یونائیٹیڈ ڈیموکریٹک فرنٹ کو کیرالہ میں اقتدار حاصل ہوا ہے تو مسلم لیگ اس محاذ میں دوسری بڑی جماعت بن کر ابھری ہے۔ اس محاذ کو 72 نشستیں حاصل ہوئیں جن میں کانگریس کے 38 اور مسلم لیگ کے 20 ارکان شامل ہیں۔
مسلم لیگ نے پہلی بار بطور ریکارڈ 24 حلقوں سے اپنے امیدوار کھڑے کئے تھے۔
جماعت اسلامی نے یو ڈی ایف (یونائیٹیڈ ڈیموکریٹک فرنٹ) کی مخالفت میں ایل ڈی ایف کے امیدواروں کی تائید کا اعلان کیا تھا لیکن ریاست کے تمام مسلم رائے دہندوں نے جماعت کے موقف کو یکسر مسترد کر دیا۔
یاد رہے کہ مرکزی حکومت میں کانگریس کی زیر قیادت یو۔پی۔اے میں مسلم لیگ بھی ایک حلیف جماعت کے طور پر شامل ہے۔

مغربی بنگال :
مغربی بنگال کی 294 رکنی اسمبلی میں اس دفعہ کے انتخابات میں 60 مسلم ارکان منتخب ہوئے ہیں۔
ترنمول کانگریس - 29
سی پی ایم - 13
کانگریس - 12
دیگر - 6

اسامہ بن لادن کی موت - یکطرفہ حقائق کی بنیاد پر فیصلہ

2011-05-10T17:52:00.001+05:30

انصاف کا تقاضا اس وقت تک پورا نہیں ہو سکتا ، جب تک کسی معاملے میں فریقین کی بات سنی نہ جائے، انہیں اظہارِ حقیقت کا موقع نہ دیا جائے اور ملزم کیلئے صفائی پیش کرنے کی گنجائش نہ رکھی جائے۔
یہ اسلامی نقطۂ نظر بھی ہے اور انصاف کا تقاضا بھی۔

سیدنا علی رضی اللہ عنہ سے مروی ہے کہ رسول اللہ صلی اللہ علیہ وسلم نے ارشاد فرمایا :
إذا تقاضى إليك رجلان ، فلا تقض للأول ، حتى تسمع كلام الآخر
جب تمہارے پاس دو اشخاص کا معاملہ آئے تو جب تک دوسرے کی بات نہ سن لو ، پہلے کے حق میں فیصلہ نہ کرو۔
ترمذی ، کتاب الاحکام ، باب ماجاء فی القاضی

ہر مہذب حکومت اور سماج میں اس بات کو تسلیم کیا گیا ہے کہ فریقین کی بات سننے کے بعد ہی فیصلہ کیا جائے۔
یکطرفہ فیصلہ کا سب سے بڑا نقصان یہ ہوتا ہے کہ ملزم کو صفائی کا موقع نہیں ملتا اور وہ فیصلہ ہرگز انصاف کے مطابق نہیں ہو سکتا ، جس میں فریق مخالف کو صفائی کا موقع نہ دیا جائے۔ اسلام کی نظر میں یہ معاملہ اتنا اہم ہے کہ حضرت عمر (رضی اللہ عنہ) اور حضرت علی (رضی اللہ عنہ) جیسے خلفاء راشدین کو بھی عدالت نے دعویٰ کے ثبوت کیلئے تنہا اس کے استغاثہ کو کافی نہیں سمجھا، اصول کے مطابق عدالت کی کاروائی چلائی گئی اور اپنے مدعا پر ان سے گواہان بھی طلب کئے۔ یہاں تک کہ ایک مقدمہ میں حضرت علی (رضی اللہ عنہ) کے حق میں حضرت حسن (رضی اللہ عنہ) کی گواہی اس وجہ سے رد کر دی گئی اور دعویٰ خارج کر دیا گیا کہ وہ ان کے صاحبزادے ہیں ، اور باپ کے حق میں بیٹے کی شہادت معتبر نہیں۔
فقہاء اسلام نے اس اصول کی ایسی پابندی کی ہے کہ امام ابوحنیفہ (رحمۃ اللہ علیہ) کے نزدیک مدعی علیہ کی موجودگی کے بغیر نہ مقدمہ کی سماعت کی جا سکتی ہے اور نہ فیصلہ کیا جا سکتا ہے۔ دوسرے فقہاء کے نزدیک اگر مدعی علیہ لاپتہ ہو یا صفائی کا بار بار موقع دئے جانے کے باوجود حاضر نہ ہوتا ہو تب تو اس کی موجودگی کے بغیر فیصلہ کرنے کی گنجائش ہے ، ورنہ مدعی علیہ کی حاضری کے بغیر کسی مقدمہ کی سنوائی اور اس کا فیصلہ درست نہیں۔

ہونا تو یہ چاہئے تھا کہ بین الاقوامی عدالت میں اس مقدمہ پر بحث ہوتی ، اسامہ بن لادن اور ان کے رفقاء کو وضاحت کا حق دیا جاتا اور اگر ان کا جرم ثابت ہو جاتا تو انہیں قرار واقعی سزا دی جاتی لیکن افسوس کہ ایسا نہیں ہوا بلکہ امریکہ نے بین الاقوامی منظوری کے بغیر بطور خود افغانستان پر حملہ کیا ، ایک منظم حکومت کو بےدخل کر دیا اور لاکھوں انسانوں کا خون بہایا ، نیر 11/ستمبر کے واقعہ کے سلسلے میں یہودیوں کے کردار سے متعلق جو شہادتیں پیش کی گئیں ، ان کو بالکل نظرانداز کر دیا گیا۔

اس واقعہ کا دوسرا پہلو یہ ہے کہ مجرم کو ہر شخص اپنے طور پر سزا دینے کا حق نہیں رکھتا ، اگر اس طرح کی اجازت دے دی جائے تو سماج میں امن درہم برہم ہو جائے گا اور زورآور افراد کمزوروں کو اپنے لئے لقمۂ تر بنا لیں گے۔ اسلام کا تصور یہ ہے کہ سخت جسمانی سزائیں دینے کا حق سربراہ حکومت کو ہے اور کوئی شخص قانون کو اپنے ہاتھ میں نہیں لے سکتا ۔۔۔۔۔
۔۔۔۔ حقیقت یہ ہے کہ تمام ممالک کو امریکہ کے اس رویہ کے خلاف احتجاج کرنا چاہئے۔

اس واقعہ میں تیسرا قابل توجہ پہلو یہ ہے کہ اسامہ بن لادن کی لاش لینے کو نہ پاکستان تیار ہوا اور نہ کسی اور مسلم ملک نے اس پر آمادگی ظاہر کی ، یہ بہت ہی قابل افسوس بات ہے۔ ایک مسلمان چاہے کچھ بھی ہو ، اس کے اور دوسرے مسلمانوں کے درمیان اخوت کا رشتہ باقی رہتا ہے اور اس رشتہ کے تقاضوں میں سے یہ ہے کہ اس پر نماز جنازہ پڑھی جائے اور اس کی تدفین عمل میں آئے ، شریعت نے اسے فرض کفایہ قرار دیا ہے ۔۔۔۔۔۔۔۔

بہرحال اب تک یہ بات پایۂ ثبوت کو نہیں پہنچی ہے کہ اسامہ بن لادن 11/ستمبر کے واقعہ میں ملوث تھے۔ امریکہ کا نقطۂ نظر یہ رہا ہے کہ وہ جو کچھ کہہ رہا ہے ، لوگ اسے بےچوں چرا تسلیم کر لیں ، یہ ایسی منطق ہے کہ اگر اقوام عالم ایک قضیہ یا ایک شخص کے معاملہ میں اس طرز عمل کو تسلیم کر لیں تو پھر کسی طاقتور ملک یا گروہ کا ہاتھ تھامنا اور ان کو ظلم و ناانصافی سے باز رکھنا مشکل ہو جائے گا۔ دنیا میں فوجی طاقت کے ذریعہ امن و امان قائم نہیں ہو سکتا۔ بلکہ انصاف کے ذریعہ امن و امان قائم ہو سکتا ہے ، اگر انصاف کے الگ الگ پیمانے ہوں اور طاقتور کو سچا اور کمزور کو جھوٹا اور مجرم سمجھا جانے لگے تو پھر انسانوں کی یہ دنیا درندوں کی دنیا بن جائے گی۔ اسلئے حقیقت یہ ہے کہ اس مسئلہ پر اصولِ انصاف اور انسانی تقاضوں کی روشنی میں غور کرنے کی ضرورت ہے۔
اللہ تعالیٰ عالم اسلام اور ملت اسلامیہ کو شعور عطا فرمائے کہ وہ صلیبی اور صیہونی طاقتوں کی دور رس سازشوں کو سمجھیں اور انہیں اس بات کی توفیق عطا ہو کہ وہ اپنے آپ کو ان کے مقابلہ کے لائق بنائیں اور پوری دنیا میں انصاف کے علمبردار بنیں۔

بشکریہ :
مولانا خالد سیف اللہ رحمانی حفظہ اللہ
(سرپرست اعلیٰ المعہد العالی الاسلامی ، حیدرآباد۔ انڈیا )
بحوالہ : روزنامہ "انقلاب" ممبئی۔ 6/مئی/2011

مجلس کے اسمبلی قائد اکبر اویسی پر قاتلانہ حملہ

2011-04-30T17:24:00.002+05:30

آج صبح ساڑھے گیارہ بجے کی اطلاع کے مطابق ، حیدرآباد (دکن) کی واحد مسلم سیاسی جماعت (آل انڈیا مجلس اتحاد المسلمین) کے اسمبلی قائد ، 39 سالہ جناب اکبر الدین اویسی پر فائرنگ اور چاقو کے ذریعے قاتلانہ حملہ کیا گیا ہے۔ ان کے جسم سے دو گولیاں نکالی گئی ہیں۔ اس وقت حالت خطرے سے باہر بتائی جاتی ہے۔

اس سانحہ کے بعد سے حیدرآباد میں خاصی کشیدگی پیدا ہو گئی ہے۔ ایڈیشنل انسپکٹر جنرل محترمہ انورادھا نے مجلس کے برہم نوجوان کارکنان کو دلاسا دیتے ہوئے کہا ہے کہ اکبر اویسی کی حالت خطرے سے باہر ہے اور وہ تیزی سے صحتیاب ہو رہے ہیں۔ چیف منسٹر کرن کمار ریڈی بھی اپنی کابینہ سے اس صورتحال کا جائزہ لینے کے بعد اویسی ہسپتال پہنچ گئے ہیں۔

اکبر الدین اویسی حیدرآباد ہی نہیں بلکہ ریاست آندھرا پردیش کے مسلمانوں کے مسائل کی یکسوئی کیلئے مشہور و مقبول حرکیاتی قائد کے طور پر جانے جاتے ہیں۔

موصولہ خبروں کے مطابق ، محمد پہلوان اور اس کے کارندوں نے زمین کے تنازعے کو بنیاد بناتے ہوئے یہ حملہ کیا ہے۔ اکبرالدین اویسی نے مقبوضہ زمین کو قبضہ سے چھڑا کر متعلقہ عہدیداروں کے حوالے کر دیا تھا کہ غریب حقداروں کو واپس کر دی جائیں۔

The Hindu - Akbaruddin Owaisi critical after Hyderabad attack
The Economic Times - MIM leader Akbaruddin Owaisi injured in attack, Hyderabad tense

ستیہ سائی بابا - موت سے کس کو رستگاری ہے

2011-04-26T11:38:00.002+05:30

ستیہ سائی بابا (اصل نام : ستیہ نارائینا راجو ، پیدائش : 23/نومبر 1926ء)
وہ روحانی قائد جسے تقدس کے اعلیٰ درجہ پر کرشمہ بتایا اور جتایا گیا اور جسے ہندوؤں کے ایک طبقہ نے "بھگوان" کا بھی درجہ دیا اور جس کی زمین و جائیداد کا اندازہ چالیس کروڑ کی مملکت بتائی جاتی ہے ۔۔۔۔
وہ شخص بھی آخر کار اچاریہ رجنیش کی طرح اس فانی دنیا سے 84 سال کی عمر گزار کر 24/اپریل 2011ء کو وداع ہو گیا۔

ہندوستانی ریاست آندھرا پردیش کا ایک مقام ہے پٹاپرتی (Puttaparti) جہاں ستیہ سائی بابا کی مملکت قائم ہے۔ بتایا جاتا ہے کہ آنجہانی کے قائم کردہ چیریٹیبل ٹرسٹ میں دنیا بھر سے کئی بلین ڈالر کا عطیہ دیا جاتا ہے۔
سائی بابا کے معتقدین دنیا بھر میں پھیلے ہوئے ہیں اور کہا جاتا ہے کہ 126 ممالک میں آنجہانی کے نام پر آشرم قائم ہیں۔ آپ کے معتقدین میں جہاں نامور سیاسی شخصیات (اٹل بہاری واجپائی) کے نام لئے جاتے ہیں وہیں فلمی اداکار ، عالمی معیار کے کھلاڑی (سچن ٹنڈولکر) اور صنعتکار بھی شامل ہیں۔

ہندوستانی ٹی وی چینلوں نے اس موقع سے فائدہ اٹھاتے ہوئے اتوار ہی سے نان اسٹاپ کویریج دینا شروع کر دیا ہے۔ ماضی میں ستیہ سائی بابا کے "معجزات" سے متعلق کئی اسکینڈلز منظر عام پر آئے تھے۔ ناقدین نے ان پر کئی رکیک الزامات بھی لگائے۔

انسانیت کی خدمت اور فلاحی کاموں میں آنجہانی کی ذاتی دلچسپی اور سرگرمی کا ایک ثبوت 1950ء میں پٹاپرتی میں قائم کیا گیا "پرشانتی نلائم" آشرم ہے جس کی مالیت آج 9 بلین امریکی ڈالر بتائی جاتی ہے اور جہاں دنیا بھر کے معتقدین کے عطیوں کی مدد سے 1972ء میں "ستیہ سائی مرکزی ٹرسٹ" کا قیام بھی عمل میں آیا تھا۔ اسی ٹرسٹ کے زیر اثر ایک وسیع و عریض ہسپتال ، ایک یونیورسٹی اور لاتعداد اسکول قائم ہیں۔

ریاست مہارشٹرا کا ایک علاقہ "شرڈی" بھی ہندوؤں کے ایک اور روحانی قائد "سائی بابا" کے حوالے سے مشہور ہے جنہیں "شرڈی کے سائی بابا" کہا جاتا ہے اور جن کا انتقال 1918ء میں ہوا۔ 1940ء میں 14 سال کی عمر میں "ستیہ سائی بابا" نے دعویٰ کیا کہ وہ "اوتار" ہیں اور "شرڈی کے سائی بابا" کا دوسرا جنم ہیں۔

ستیہ سائی بابا نے شادی نہیں کی اور نہ ہی ان کا کوئی جانشین موجود ہے۔ ہرچند کہ ان کے خلاف بیشمار الزامات عائد کئے گئے ، حتیٰ کہ بی بی سی ٹیلیوژن نے 2004ء میں "خفیہ سوامی" کے عنوان سے ان کے خلاف ایک انٹرویو بھی پیش کیا تھا ، اس کے باوجود ان کے خلاف کوئی کریمنل کیس ریکارڈ نہیں کیا گیا۔ 1993ء میں ان کے بیڈروم میں ان پر قاتلانہ حملہ بھی ہوا تھا جس میں ان کا پرسنل اسسٹنٹ اور 6 خاتون معتقدین شامل تھے اور جو سب مارے گئے۔ اس واقعے کی تفصیلات کبھی منظر عام پر نہ آ سکیں۔

آندھرا پردیش چیف منسٹر کرن کمار ریڈی ، وزیراعظم ہند من موہن سنگھ اور دیگر معروف سیاسی و سماجی شخصیات نے ستیہ سائی بابا کے انتقال پر تعزیتی پیغامات ارسال کئے ہیں۔ آندھرا پردیش کے ضلع اننت پور میں (جہاں آنجہانی کا آشرم واقع ہے) ، سرکاری سطح پر تعطیل کا اعلان کیا گیا ہے۔ ونیز ریاستی حکومت نے 4 روزہ سرکاری سوگ کا اعلان بھی کیا ہے۔

لیبیا اور معمر قذافی - ایک مختلف نقطۂ نظر

2011-04-20T14:29:00.001+05:30

لیبیا اور لیبیا کے قائد کرنل معمر قذافی کے متعلق آج تک میڈیا کے ذریعے جتنا کچھ پڑھتے آئے ہیں ، اکثر اوقات یہی لگتا ہے کہ کہیں یہ سب یکطرفہ تو نہیں؟ کیونکہ آجکل میڈیا پر جن قوتوں کا قبضہ ہے یہ بتانے کی ضرورت نہیں۔ تیونس اور مصر کے حالات کو لے کر اس عوامی بغاوت کی "تھیوری" کو میڈیا نے سعودی عرب پر بھی منطبق کرنے کی جو مذموم کوشش کی تھی اسکے متعلق جاننے والے جانتے ہیں یہ سوائے پروپگنڈہ بازی کے اور کچھ نہیں!

پچھلے دنوں حیدرآباد کی ایک خاتون (پروفیسر سیدہ فاطمہ منزلت) ، جو پیشہ کے لحاظ سے تدریس کے میدان سے وابستہ ہیں اور لیبیا کی ایک جامعہ میں کوئی تین سال سے باٹنی پروفیسر کی حیثیت سے خدمات انجام دے رہی ہیں ، نے لیبیا کے متعلق اپنے تاثرات سے نوازا۔
مکمل مضمون روزنامہ منصف (17 اپریل 2011) میں یہاں ملاحظہ کیا جا سکتا ہے۔
کچھ اقتباسات ۔۔۔۔۔۔۔۔۔۔۔۔۔۔۔۔۔۔۔۔

مصراتہ یونیورسٹی پر جب میرا تقرر ہوا تو میں قدرے پریشان تھی کہ میں اور میری دس سالہ لڑکی اس صحرا میں کیسے تنہا رہیں گے؟ لیکن جب میں لیبیا پہنچی تو مجھے ہر آنے والے لمحہ میں اطمینان اور سکون کا احساس ہونے لگا کیونکہ یہاں کے لوگ نہایت خوش خلق ، ملنسار ، قول و فعل کے سچے اور پابند عہد نظر آئے۔

لیبیا میں تھیٹر نہیں ہیں۔ یہاں مغربی اشیاء کی کوئی دکان نہیں۔ میکڈونالڈ وغیرہ ریسٹورنٹس بھی نہیں ہیں۔ یہاں عربی جامعات بہت ہیں۔ یہاں کے لوگ انگریزی سے نفرت کرتے ہیں مگر ضرورتاً سیکھنا چاہتے ہیں۔ ۔۔۔۔۔ کوئی باجے گاجے ، دھوم دھڑاکا نہیں ، پرسکون فضائیں۔ صرف زیتون ، کھجور ، انجیر ، سنگترہ کے درخت کافی بڑے اور بکثرت ہوتے ہیں۔
نہایت شریف النفس ، عبادت گزار ، ہمدرد بااخلاق لوگ۔ یہاں پر جنسی دست درازی کا کوئی واقعہ نہیں ہوتا اور نہ ہی چوری و ڈاکہ۔ خواتین سے چھیڑ چھاڑ کے واقعات دیکھنے میں تو کیا سننے میں بھی نہیں آتے۔
یہاں کے لوگوں کو تنخواہیں بہت کم ملتی ہیں لیکن وہ اپنے قائد کو بہت چاہتے ہیں ، ان کا نعرہ ہے : " اللہ معمر لیبیا "

بہت سادہ زندگی گزارتے ہیں، آپس میں رنجش ہوتی ہے تو فوراً صلح صفائی کر لیتے ہیں۔ دفتری پالیٹکس ، کسی کو گرانا ، کسی کو اٹھانا وغیرہ کی کوئی بات نہیں۔ لگتا ہے یہاں کے مسلمان اسلامی تعلیمات پر عمل پیرا ہیں۔ اپنی اسٹوڈنٹس کو دیکھتی ہوں تو وہ ایک دوسرے کو حق کی تلقین کرتی رہتی ہیں ، دوسروں کے جذبات کا بہت خیال کرتی ہیں۔

ان سادہ لوح مخلص و ملنسار لوگوں کے درمیان جو بغاوت ہوئی ہے ، لیبیا کے عام شہریوں کا خیال ہے کہ ان کے کچھ لالچی افراد سے مل کر یہودیوں اور عیسائیوں نے یہ سازش رچی ہے ورنہ حقیقی لیبیائی عوام اپنے قائد کے خلاف نہیں ہو سکتے۔ ان کا کہنا ہے کہ معمر قذافی اپنی عمدہ صلاحیتوں کی وجہ سے چالیس سال سے اقتدار پر برقرار ہیں۔ عوام قذافی سے بہت محبت کرتے ہیں۔ پتہ نہیں لیبیا کے سکون کو کس کی نظر لگ گئی؟
عوام اپنے قائد کیلئے جان توڑ کوششیں کر رہے ہیں۔ لیبیا شرافت و پاکیزگی کا گہوارہ ہے۔ آجکل وہاں کے عوام کے لبوں پر یہ الفاظ ہیں :
" يا قائد۔ امانة وحدک۔ کل حب ووفاء۔ "
" ممک بل روح بل دم "

اللہ تعالیٰ ان کو فتح و کامرانی عطا فرمائے (آمین)۔

---
گو کہ یہ فردِ واحد کے تاثرات ہیں جسے لیبیا کی مجموعی صورتحال کا فیصلہ کن جائزہ تو قرار نہیں دیا جا سکتا۔ مگر یہ تاثرات قابل غور اسلئے ہیں کہ تحریر کنندہ نے اس ملک میں رہ بس کر ذاتی طور سے جو کچھ مشاہدہ کیا اسے بیان کیا ہے۔

پھر پسر صاحبِ میراثِ پدر کیوں کر ہو ؟

2011-04-10T11:18:00.001+05:30

علم اللہ تعالیٰ کی عظیم ترین صفت ہے اور یہی صفت اللہ نے انسان کو بھی عطا کی ہے۔ تعلیم نامعلوم سے معلوم کو عملاً حاصل کرنے کا نام ہے۔ تعلیم باہر سے کسی شئے کو انسان کے اندر داخل کرنے کا نام نہیں ہے بلکہ ودیعت کردہ علم کو ماہرین کے ذریعے اپنے اندر سے باہر لانے اور پھر اس کو دوسروں تک پہنچاتے رہنے کا نام ہے اور یہی کمال انسانی ہے۔

کالجوں کی تعلیم کا نتیجہ یہ نکل رہا ہے کہ بچے پڑھ کر سند تو حاصل کر لیتے ہیں لیکن ان کی تربیت کا اہتمام کالجوں میں نہیں ہوتا کیونکہ اکثر اساتذہ میں اخلاق کا فقدان ہے۔ اپنے طلباء کے ساتھ شراب پینے اور جوا کھیلنے کو وہ عیب نہیں سمجھتے۔ گلے میں ہاتھ ڈال کر سگریٹ کے مرغولے اڑاتے پھرنا ان کا محبوب مشغلہ ہے۔ ان میں ذمہ داری اور بڑے پن کا کوئی احساس باقی نہیں رہا ہے۔
ماضی کا استاد باپ برابر مانا جاتا تھا اور آج دوست برابر ہو کر شانہ بہ شانہ چلنے لگا ہے۔ آج اکثر اساتذہ کو اپنی ملازمت میں ترقی اور جوڑ توڑ سے فرصت نہیں ملتی تو طلباء میں اعلیٰ سماجی اقدار ، ادب و تہذیب اور اخلاق و کردار کا احساس کس طرح دلا سکتے ہیں؟ وہ خود کو طلباء کا نگران نہیں سمجھتے اور نہ ہی موجودہ نصاب میں ایمان ، اخلاق و کردار کو سنوارنے ، آدمی کو انسان بنانے ، دردمندی کا احساس دلانے اور قربانی کا جذبہ پیدا کرنے کا کوئی نظام موجود ہے ، آج وہ استاد ہی کہاں جو کبھی پڑھایا کرتے تھے :

دردِ دل کے واسطے پیدا کیا انسان کو
ورنہ طاعت کے لیے کم نہ تھے کر و بیاں

اور علامہ اقبال (رحمۃ اللہ علیہ) کا یہ شعر سمجھنے اور سمجھانے والا کہاں؟

باپ کا علم نہ بیٹے کو اگر ازبر ہو
پھر پسر صاحبِ میراثِ پدر کیوں کر ہو

خلاصہ یہ ہے کہ موجودہ تعلیم میں کج بحثی اور طاقت گفتار کو تیز کر دیا گیا ہے لیکن جہاں تک دل و روح کا معاملہ ہے کمالاتِ علم سے بالکل خالی ہے۔
روح و قلب کی پاکیزگی سے اور علم کے عرفان سے جو وجدان حاصل ہوتا ہے وہ ہمارے آج کے کالجوں اور جامعات میں مفقود ہے۔ آج اسکی تعلیم و تربیت نہیں ہے۔ جب تعلیم نہیں اور تربیت بھی نہیں تو ایسے ماحول میں صرف تعلیم سے انسانیت اور اخلاقیات پیدا نہیں ہوتے۔
ہمارے طلباء ہوں کہ نام نہاد رہنما یا سیاست داں ، ان میں چند تعلیم یافتہ تو ہیں مگر تربیت یافتہ ہرگز نہیں ہیں۔
ماہر تعلیم خواجہ غلام السیدین کہتے ہیں :
تعلیم کی توجہ تین قسم کے علوم کی جانب تھی۔
ایک : وہ جو طلباء کو حصول معاش اور ضروریات زندگی کے لئے تیار کرتے تھے۔
دوسرے : وہ جن کی عقل اور ذہنی تربیت میں معاون ہوتے تھے
اور تیسرے : وہ جو اخلاقی تربیت اور سیرت کی تشکیل میں مدد دیتے تھے۔

اسمبلی ہو کہ پارلیمنٹ ہمارے اکثر و بیشتر ارکان تربیت یافتہ نہیں ہیں۔ ان کا رویہ ، طرز گفتگو ، گندی زبان کا استعمال اور دیگر دلخراش واقعات سے یہ بات بالکل صاف ہے کہ ان کا ذہن مجرمانہ بن گیا ہے ، انہیں بابائے قوم گاندھی جی کے اس دلنواز قول سے کوئی سروکار نہیں کہ :
تعلیم وہی خوب ہے جس میں مذہبی قوت کارفرما ہو۔

دنیا میں جتنے انبیاء ، دانشور ، فلسفی ، رہنما اور صالحین آئے ان کا مقصد روح و قلب کی پاکیزگی تھا۔ آج کے رہنما ، لیڈر اور سیاست دانوں کے قلب میں نہ سوز ہے اور نہ روح میں کوئی احساس ہے اور نہ ہی ان کو کسی مرد صالح کے کسی پیغام کی پرواہ ہے۔

ایسے ہی ناشکرگزار بندوں کیلئے شاعر نے بجا کہا کہ :
ناز ہے طاقتِ گفتار پہ انسانوں کو
بات کرنے کا سلیقہ نہیں نادانوں کو

***
بشکریہ : روزنامہ منصف (2011-03-31) کے مضمون "بات کرنے کا سلیقہ نہیں نادانوں کو : محمد عباس انصاری سکندر" سے۔

سر پہ لال ٹوپی روسی ۔۔۔۔

2011-04-09T17:51:00.000+05:30

اردو زبان میں ٹوپی ، پگڑی اور دستار کی خاصی اہمیت ہے۔ ٹوپی ڈالنا ، پگڑی اچھالنا ، دستار اتارنا ، دھوکہ دینا ، بےعزت کرنا ، افسوس ظاہر کرنا جیسے محاورے شامل ہیں۔
حیدرآباد میں سالار جنگ ڈیوڑھی کے سامنے ٹوپیوں کا بڑا بازار تھا اور انگریزی میں "کیپ مارٹ" کہلاتا تھا۔ اب یہاں صرف شادی کا سامان جیسے مچھردان ، تکیے وغیرہ بکتے ہیں۔ دستار بنانے والے اور رومی ٹوپی بنانے والے کہیں نہیں رہے۔
اگر ہم مغربی ممالک کی تصویریں دیکھیں تو آپ کو سر پر ٹوپیاں نہیں ملیں گی۔ دیگر ممالک میں بالوں والی ٹوپیاں مل جاتی ہیں مگر گاندھی ٹوپی ، رامپوری ٹوپی ، قراقری ٹوپی اور رومی ٹوپی حیدرآباد میں عام تھیں۔ گاندھی ٹوپی آزادی کے بعد خاصی مقبول ہوئی اور اس کی شناخت سیاسی تھی۔ یہ عام طور پر سفید کھادی کی بنی ہوتی تھی۔

آزادی سے پہلے مسلمانوں اور کائستھوں میں دستار ہی استعمال ہوتی تھی۔ تقریبات میں دستار کی خاصی اہمیت تھی۔ یہ آٹھ گز نفیس ترین ململ سے بنائی جاتی ہیں۔ سر پر درمیان میں روٹی کی شکل میں کپڑا ہوتا ہے جس کے اطراف سات پلیٹیں دائرے کی شکل میں ہوتی ہیں ، سامنے تاج کی شکل ہوتی ہے۔ گھر میں تین رنگ کی دستاریں ہوتی تھیں ۔۔۔
سفید - عام استعمال کیلئے
سیاہ - غم کے موقع پر
گلابی - شادیوں کے موقع پر

رومی ٹوپی :
جس نے بھی نظام سابع کو عام لباس میں دیکھا ہے ان کو یاد ہوگا کہ وہ لال رنگ کی ٹوپی جو مخروطی ہوتی تھی اور اس پر ایک پھندنا ہوتا تھا ، پہنا کرتے تھے۔ اس کو ترکی ٹوپی یا پھر رومی ٹوپی کہا جاتا تھا۔ یہ ٹوپیاں اکثر عید بقر عید پر نظر آتی تھیں۔ اب رومی ٹوپیاں تقریباً ناپید ہو گئی ہیں۔

قراقری ٹوپی :
قراقری ٹوپی کشتی نما تو ہوتی تھی مگر ایک مخصوص بھیڑ کے بالوں سے تیار کی جاتی تھی جو گھنگریالے ہوتے ہیں۔ عام طور پر ہندو حضرات کے معمول کی ٹوپی تھی یعنی دفتر میں اس کا بطور خاص استعمال ہوتا تھا، کبھی کبھار تقاریب میں بھی پہن لیتے تھے۔

گاندھی ٹوپی :
پتہ نہیں کیوں کھادی کی بنی کشتی نما ٹوپی گاندھی سے منسوب ہے حالانکہ یہ ٹوپی جواہر لال نہرو نے بہت پہنی ہے اور آخرکار یہ ٹوپی کانگریس سے ہی منسوب ہو کر رہ گئی ہے۔

نمازی ٹوپی :
یہ کروشیا سے عام طور پر بنائی جاتی ہے ، کبھی کبھی کپڑے سے بنی بھی مل جاتی ہیں۔ عموماً گول ہوتی ہیں۔

ایک خاص ٹوپی کا ذکر بھی ضرور کرنا چاہوں گی جو پشواز پر خواتین پہنا کرتی تھیں ، یہ ٹوپی گول یا چوکور ہوتی تھی۔ پیشانی پر ٹیکہ ہوتا اور کارچوب کا کام ہوتا اور اسی میں کالے دھاگے کی چار یا چھ چوٹیاں ہوتی تھیں جن میں کناری کی موباف ہوتی تھی۔

دراصل ہماری تہذیب میں سر ڈھانکنا خاص طور پر داخل ہے۔ عورتیں اپنی ساری کے پلو سے یا پھر چادر دوپٹہ سے سر ڈھکتی ہیں تو مرد پگڑی سے۔ چاہے وہ غم کا موقع ہو یا پھر خوشی کا۔ آج بھی اگر ٹوپی نہ ہو تو مرد سر پر دستی یا پھر ہاتھ ہی رکھ لیتے ہیں۔
جبکہ مغرب میں سر سے ہیٹ اتارا جاتا ہے۔ چاہے بزرگوں سے ملا جا رہا ہو یا کسی غمی کی تقریب میں شرکت کر رہے ہوں ، مرد اپنا ہیٹ اتار دیتے ہیں۔

آج بھی ٹوپی ہماری تہذیب کا حصہ ہے چاہے وہ ہیٹ نما ہو ، کشتی نما ہو یا کپڑے کی نمازی ٹوپی ہو۔ رومی ٹوپی ، قراقری ٹوپی ، پشواز والی ٹوپی وغیرہ ناپید ہیں۔ خرگوش کے بالوں کی ٹوپی آج دیکھنے کو مل جاتی ہے ، باقی سب ٹوپیاں تو اچھالی جا چکی ہیں۔

***
بشکریہ : روزنامہ منصف (2011-03-31) کے کالم "مجھے یاد ہے سب ذرا ذرا : اودیش رانی" سے۔

انڈیا - کرکٹ ورلڈ کپ 2011 چمپئین

2011-04-03T16:00:00.001+05:30

اب زیادہ کیا لکھا جائے، تصویر کافی ہونا چاہئے
اعداد و شمار بھی یار لوگوں نے اکٹھے کر لئے ہیں ادھر ادھر
سیدھی سی بات اور کروڑ روپیوں کی بات
ٹیم انڈیا نے ہر میدان میں اپنی صلاحیتوں کو جتا دیا۔

ٹیم انڈیا کو ہماری طرف سے بھی بہت بہت مبارک ہو۔
(اب یہ نہ ہو کہ اگلے ورلڈ کپ کو پانے پھر دو تین دہائیاں بیت جائیں۔)

ورلڈ کپ کرکٹ 2011 فائنل

2011-04-02T16:42:00.001+05:30

1983ء کرکٹ ورلڈ کپ
جو ہندوستان نے جیتا تھا ویسٹ انڈیز کو شکست دے کر لارڈز کے مشہور میدان پر۔ وہ ہمارے لڑکپن کی بات تھی۔
کوئی 28 سال بعد دوبارہ اس تاریخ کو دہرانے کا موقع مل رہا ہے۔ ویسے 2003ء میں بھی انڈیا نے فائنل میں داخلہ لیا تھا مگر آسٹریلیا سے شکست کھائی۔
اس بار ماہرین و مبصرین کے مطابق ہندوستان کی جیت کے امکانات زیادہ دکھائی دیتے ہیں۔ سچن ٹنڈولکر سے یہ توقع کی جا رہی ہے کہ وہ ورلڈ کپ جیتنے کا اپنا خواب شرمندہ تعبیر کریں گے ، کیونکہ یہی ایک اعزاز ہے جس سے وہ اب تک محروم رہے ہیں۔

ورلڈ کپ مقابلوں میں سری لنکا کے مرلی دھرن کا یہ آخری میچ ہے۔ ان جیسے خطرناک گیندباز کا سامنا کرنے کیلئے انڈیا کے پاس فی الحال قابل لحاظ بیٹنگ لائن اپ نظر آتی ہے۔ امید ہے کہ سہواگ اور ٹنڈولکر اچھی شروعات کریں گے جس سے مڈل آرڈر کو تسلی بخش پلاٹ فارم مل سکے گا۔
ویسے کپتان دھونی نے اپنے ساتھیوں کو خبردار کیا ہے کہ وہ حد سے زیادہ خوش فہمی میں مبتلا نہ رہیں کیونکہ سری لنکا کی ٹیم نے اب تک اس ٹورنمنٹ میں بہترین مظاہرہ کیا ہے۔

خوش آئیند بات یہ ہے کہ اس مرتبہ فائنل کی دونوں ہی ٹیمیں ایشیا سے ہیں اور یہ ورلڈ کپ ایشیائی ٹیم ہی کے حق میں آئے گا۔

آئیے ، چلتے ہیں وانکھیڈے اسٹیڈیم ، ممبئی ۔۔۔۔
تازہ ترین اسکور ہے :
2 وکٹ پر 114 رن ، 27 اوور میں

ورلڈ کپ 2011 فائنل - انڈیا / سری لنکا

ورلڈ کپ 2011 سیمی فائنل - ہند و پاک مقابلہ

2011-03-30T16:58:00.001+05:30

ورلڈ کپ سیمی فائنل | لمحہ بہ لمحہ - اردو میں

ماسٹر بلاسٹر سچن ٹنڈولکر ون ڈے کیرئیر کی اپنی 100 ویں سنچری بنا پائیں گے؟

انڈیا اسکور :
33 اوور
173 رن
4 وکٹ

کریز پر اس وقت ۔۔۔۔۔
ٹنڈولکر - 76 رن (99 گیندیں)
دھونی - 14 رن (21 گیندیں)

ملے سُر میرا تمہارا ۔۔۔ تو سُر بنے ہمارا

2011-03-29T19:13:00.001+05:30

کاؤنٹ ڈاؤن ۔۔۔ ایک دن ۔۔۔
نہیں ۔۔۔۔ صرف 20 گھنٹے

میدانِ کرکٹ (پنجاب کرکٹ اسوسی ایشن اسٹڈیم ، موہالی)
دو روایتی حریف
ہندوستان بمقابلہ پاکستان

دل دل ہندوستان
جیوے جیوے پاکستان
نعرے لگے ہیں ہر طرف چہار سو

ٹنشن ۔۔۔ تشدد ۔۔۔ دہشت گردی
"ٹنشن کہاں نہیں ہے؟ ساری دنیا دہشت گردی کی زد میں۔ اور ہمیں اس کا مقابلہ کرنا ہے۔ انڈیا پاکستان کے درمیان کرکٹ مقابلے جاری رہنا چاہئے۔"
یہ سابق پاکستانی کپتان جاوید میاں داد کا تبصرہ ہے۔ مزید کہا انہوں نے کہ :
"یہ جنگ نہیں۔ کرکٹ ہے دو ٹیموں کے درمیان۔ جن میں سے ایک جیتے گا تو دوسرا ہارے گا۔ کھیل ہندوستان اور پاکستان کے مسائل کو حل کرنے میں مدد دیتا ہے۔"

جدہ (سعودی عرب) کرکٹ اسوسی ایشن کے نائب صدر اعجاز احمد خان کہتے ہیں :
"گو کہ سیاسی سطح پر دونوں ممالک کے درمیان سنگین اختلافات ہیں مگر یہاں سعودی عرب میں دونوں قومیتیں امن و سکون اور ایک دوسرے سے میل ملاپ کے ساتھ رہتی ہیں۔ ہم یہاں کے قوانین کا مکمل احترام اور اس کی پاسداری کرتے ہوئے اپنے کام کو پہلی ترجیح دیتے ہیں۔ باقی سب چیزیں بعد میں آتی ہیں۔
ہر ہندستانی کی خواہش ہے کہ ہندوستان فتح حاصل کرے اور تمام کھلاڑی اپنا بہترین کھیل پیش کریں اور بالکل اسی طرح پاکستانیوں کے بھی خیالات اپنی قومی ٹیم کے متعلق ہیں۔ اچھے کھیل کی تائید اور حوصلہ افزائی کی جانی چاہئے چاہے وہ کسی بھی فریق کی جانب سے ہو۔"

مملکت سعودیہ میں بدھ کا دن گویا تہوار کا دن (Clash of Titans) ثابت ہوگا جب دو دیوپیکر روایتی حریف میدانِ موہالی میں خم ٹھونک کر اتریں گے۔ ہر چند کہ بدھ کام کا دن ہے پھر بھی کرکٹ کے بےشمار شیدائیان نے اپنے اپنے دفاتر سے چھٹی لے رکھی ہے۔

ہماری تو جناب یہی خواہش اور تمنا ہے کہ فتح کسی کی بھی ہو ، کھیل کو کھیل ہی کی روح سے دیکھا اور برتا جائے اور سیاسی و مذہبی معاملات کو اس سیمی فائنل کی فتح و شکست سے نہ جوڑا جائے۔ ویسے بھی فائنل میں جو بھی ٹیم پہنچے گی ، اس کا تعلق "برصغیر (sub-continent)" سے ہی ہوگا۔

اسی لئے تو ہمارا کہنا ہے :

ملے سُر میرا تمہارا ۔۔۔ تو سُر بنے ہمارا

شیخ عبدالرحمٰن السدیس ہندوستان میں - عظمت صحابہ کانفرنس

2011-03-29T12:29:00.002+05:30

امام کعبہ اور عرب دنیا کے مشہور قاری شیخ عبدالرحمٰن السدیس ان دنوں ہندوستان کے دورے پر ہیں۔

شیخ عبدالرحمٰن السدیس نے کل دارالحکومت دہلی میں جماعت اسلامی ہند کے یوتھ ونگ ایس آئی او (اسٹوڈنٹس اسلامک آرگنائزیشن) کے ہیڈکوارٹر کا سنگ بنیاد رکھا اور ایس آئی او کے ارکان اور ہندوستان بھر سے آئے ہوئے علماء کرام و زعمائے ملت سے بھی خطاب کیا۔
انہوں نے ہندوستانی معاشرہ میں انجام دئے جانے والے ایس آئی او کے رول اور اس کی خدمات کی ستائش کی اور تنظیم کی سرگرمیوں پر اظہار مسرت کرتے ہوئے مبارکباد بھی پیش کی۔

جمعیت العلماء ہند کی جانب سے "عظمت صحابہ" کے زیرعنوان ایک کانفرنس بھی منعقد کی گئی تھی جس کی صدارت کرتے ہوئے شیخ السدیس نے کہا کہ صحابہ کرام (رضوان اللہ عنہم اجمعین) کی سیرت کو اجاگر کرنے کے لئے ایک علیحدہ ٹی وی چینل کا قیام عمل میں لایا جانا چاہئے اور اس کے ذریعے اسلامی طرز زندگی کو روشناس کرایا جانا چاہئے۔
اپنے عربی خطاب میں شیخ السدیس نے ان اصول و اقدار کی اہمیت پر زور دیا جن کا اظہار صحابہ کرام (رضوان اللہ عنہم اجمعین) کی زندگیوں میں ہوا کرتا تھا۔

صحابہ کرام (رضوان اللہ عنہم اجمعین) کی جماعت قیامت تک کے لئے انبیاء کے بعد سب سے بہترین گروہ ہے۔ ہر مسلمان کیلئے ان کی محبت اور دل سے عظمت لازمی ہے۔ نص قرآن اور احادیث رسول (صلی اللہ علیہ وسلم) سے صحابہ کرام (رضوان اللہ عنہم اجمعین) کی عظمت ثابت ہے۔ چنانچہ نفاق کی علامتوں میں سے ایک علامت یہ بھی ہے کہ صحابہ کرام (رضوان اللہ عنہم اجمعین) سے بغض رکھا جائے۔

امام مالک ، امام احمد ، حافظ ابن حجر عسقلانی اور امام ابن تیمیہ (رحمہم اللہ عنہم) اور متعدد ائمہ و محدثین رحمہم اللہ عنہم نے صحابہ کی جو تعریف فرمائی ہے اس کے مطابق وہ افراد جنہوں نے ایمان کی حالت میں رسول اللہ صلی اللہ علیہ وسلم سے ملاقات کی ، آپ (صلی اللہ علیہ وسلم) کا دیدار کیا یا آپ (صلی اللہ علیہ وسلم) کے الفاظ کی سماعت کی اور حالتِ اسلام میں ان کی وفات ہوئی ، وہ "صحابہ" ہیں۔
ان میں افضل اصحابِ بدر ہیں ، پھر ان کے درجات ہیں۔

بیعت رضوان کا تذکرہ کرتے ہوئے شیخ السدیس نے کہا کہ جنہوں نے صلح حدیبیہ کے موقع پر رسول اللہ صلی اللہ علیہ وسلم کے ہاتھ پر بیعت کی تھی قرآن میں ان کا تذکرہ موجود ہے۔
حضرت ابو بکر، حضرت عمر ، حضرت عثمان اور حضرت علی (رضی اللہ عنہم) سے متعلق الگ الگ احادیث پیش کرتے ہوئے شیخ نے ان کے مقام و مرتبہ کی فضیلت بتائی اور کہا کہ صحابہ سے محبت گویا نفاق سے براءت ہے ، تمام صحابہ جنتی ہیں ، اللہ کی انہیں رضا حاصل رہی اور وہ اللہ سے راضی تھے۔ حب رسول (صلی اللہ علیہ وسلم) سے ان کے دل سرشار تھے۔ اللہ نے ان کے قلوب کو ایمان سے منور کیا تھا اور گناہوں سے کدورت عطا کی تھی۔

مسلم والدین پر زور دیتے ہوئے شیخ نے کہا کہ وہ اپنے بچوں کو صحابہ کرام (رضوان اللہ عنہم اجمعین) کی سیرت سے واقف کرائیں۔ ان کی زندگی میں انہی اصول و اقدار کو زندہ کریں۔ نئی نسل کو اسلامی تربیت دینا اشد ضروری ہے۔

شیخ نے عصری تکنالوجی کے مثبت استعمال کا مشورہ دیتے ہوئے کہا کہ تبلیغ دین کیلئے اسلامی تعلیمات کو عام کرنے ٹی وی چینل ، انٹرنیٹ اور الکٹرانک میڈیا کا استعمال کیا جانا چاہئے۔ جس طرح کہ صحابہ کرام (رضوان اللہ عنہم اجمعین) نے نبوی تعلیمات کو عام کرنے کیلئے اپنے دور کے حساب سے جدوجہد کی تھی۔

جمعیت العلماء ہند کے قائد مولانا ارشد مدنی کی جانب سے شیخ السدیس کے خطاب کا اردو ترجمہ پیش کیا گیا۔
جمعیت العلماء ہند کے دیگر قائدین نے بھی صحابہ کرام کی عظمت پر تقاریر کیں۔ عظمت صحابہ سے متعلق ایک اعلامیہ بھی جاری کیا گیا اور مسلمانوں سے اس پر عمل آوری کی خواہش کی گئی۔

وکی لیکس دستاویزات اور ہند - امریکی تعلقات

2011-03-22T14:21:00.002+05:30

ہند امریکی تعلقات پر وکی لیکس کے رازوں کے دستاویزات کا ایک عرصہ سے انتظار تھا۔
معروف و معتبر انگریزی اخبار "دی ہندو" نے ان وکی لیکس دستاویزات کے افشاء کی صحافتی ذمہ داری سنبھال لی ہے جو 60 لاکھ الفاظ پر مشتمل ہیں۔ جو موضوعات زیر بحث آئے ، وہ کچھ یوں ہیں : سفارت کاری ، سیاست ، معاشیات ، سماجیات ، تہذیب اور ہوشمندی وغیرہ
ہندوستان کے تعلقات دوسرے ملکوں سے کیسے ہوں اور کس طرح انہیں موڑا جائے ، اس کا بھی تذکرہ موجود ہے۔ روس ، یورپین یونین ، مشرقی ایشیا ، اسرائیل ، فلسطین ، ایران اور تمام دیگر ممالک سے تعلقات کو کس طرح رکھا جائے کہ ہندوستان اور امریکہ کے مفادات میں ایک لکشمن ریکھا کھینچی جائے؟

وکی لیکس کے ان افشاء پر متضاد آراء ہیں۔
اس کے پیچھے مغرب کی طاقتور یہودی لابی کے ہونے کا امکان ظاہر کیا جا رہا ہے۔
عالم اسلام میں آجکل جمہوریت کی جو لہر چل پڑی ہے اس کے پیچھے بھی انہی دستاویزات کا اثر بتایا جاتا ہے۔ عرب ڈکٹیٹروں کے راز انہی دستاویزات کے ذریعے منظر عام پر آئے۔
بعض تبصرہ نگاروں کا تو یہ بھی کہنا ہے کہ ضرورت کے مطابق خود امریکہ ایسے رازوں سے پردہ اٹھاتا ہے جس کا مقصد اس کے اپنے مفادات ہوتے ہیں۔ ان تمام وجوہات کے باوجود صحافت کی ذمہ داری ہے کہ وہ اس کی تمام تر حقیقت عوام کے سامنے پیش کرے تاکہ عوام خود فیصلہ کر لیں کہ سچ کیا ہے؟

ایم۔کے۔نارائینا کی بحیثیت قومی سلامتی مشیر کے انتخاب پر امریکی ایمبسی کا تبصرہ تھا کہ : یہ کیرالہ کا مافیا ہے جو وزیراعظم ہند کے دفتر پر کنٹرول کرتا ہے۔ ایم۔کے۔نارائینا وزیر اعظم من موہن سنگھ کے اکثر فیصلوں سے کھل کر اختلاف بھی کرتے ہیں۔ وزیر اعظم پاکستان سے گفتگو کے خواہاں تھے تاکہ تعلقات کو سدھارا جائے مگر اس موضوع پر تعاون دینے کے بجائے ایم۔کے۔نارائینا نے اس کی کھل کر مخالفت کی اور وزیراعظم کو یکا و تنہا کر دیا۔ حتیٰ کہ خود کانگریس پارٹی نے خاموشی اختیار کی۔

منی شنکر ایر ہندوستان کیلئے ایران کو اہم سمجھتے تھے اور امریکہ کی ایران پالیسی کے مخالف تھے جس کا خمیازہ انہیں یہ بھگتنا پڑا کہ ہندوستانی سیاست سے ان کا پتہ یکدم صاف کر دیا گیا اور امریکہ کے تائیدی "مرلی دیورا" کا انتخاب عمل میں آیا۔
ایران کے مسئلہ پر ہندوستان اور امریکہ کے درمیان اختلاف اب بھی موجود ہے گو کہ ہندوستان کی طرف سے ایران مخالف IAEA ووٹ کے سبب ایران سے تعلقات کشیدہ ہوئے اور ہند پاک ایران گیس لائن کا معاہدہ بھی تعطل کا شکار ہوا ہے۔

وکی لیکس کی ان دستاویزات سے پتہ چلتا ہے کہ بین الاقوامی سیاست میں امریکی دباؤ کس حد تک ہوتا ہے؟ امریکہ اپنے مفادات کے تحفظ کیلئے اور افغانستان میں کامیابی کیلئے ہند و پاک تعلقات کو سدھارنا چاہتا ہے اور ہندوستان دہشت گردی کی اس لڑائی میں اپنے مفادات کا تحفظ کرنا چاہتا ہے۔

وزیراعظم من موہن سنگھ کو کمزور بتا کر جو فائدہ امریکہ اٹھانا چاہتا ہے اسکا مقابلہ ہندوستانی سفارتکاروں نے بڑی ہنرمندی سے کیا ہے اور ہندوستان کے مفادات کا تحفظ کیا ہے۔ ان دستاویزات سے ہندوستان کے اس موقف کا بھی اظہار ہوتا ہے کہ بین الاقوامی سیاست میں وہ پھونک پھونک کر قدم رکھنا چاہتا ہے ، مجبوریوں اور مفادات کے درمیان سفارت کاری اور سیاست کے بدلتے ہوئے انداز میں اپنی شناخت کو برقرار رکھنے کے ہنر سے ہندوستان خوب واقف ہے۔
آگے آگے دیکھئے ہوتا ہے کیا !!

---
اقبال احمد انجینئر کے مضمون "وکی لیکس : ہند امریکہ کے تعلقات اور لچکدار رویہ کس حد تک" سے مرتب کردہ۔ اصل مضمون (اشاعت: روزنامہ منصف ، 20-مارچ 2011ء) یہاں مطالعہ فرمائیں۔

جاپان کی تباہی -- سبق کون سا ؟

2011-03-21T11:34:00.001+05:30

وہ جاپان ، جو اب سے 65 سال قبل امریکہ کے ایٹم بموں کی مار سہہ چکا تھا ، اس بار اس ایٹمی عذاب کا شکار ہوا جو اس نے اپنی ترقی اور توانائی کے حصول کیلئے پیدا کیا تھا۔ اب جاپان ایک بار پھر ایٹمی قہر کے زیر سایہ جی رہا ہے۔

سونی ، نایک ، ٹویوٹا ، کینن اور نسان جیسی عالمی پیمانے کی کمپنیوں والا ایشیا کا پہلا معاشی ٹائگر ، آج ان لوگوں کی آماجگاہ بنا ہوا ہے جن کا سارا مال و متاع صرف ایک منٹ کے زلزلہ اور سونامی میں لٹ گیا۔
گاؤں کے گاؤں ، قصبے کے قصبے روئے زمین سے یوں مٹ گئے جیسے ان کا کبھی وجود ہی نہ تھا۔

قرآن کریم کی متعدد آیات میں قیامت کی جو منظر کشی کی گئی ہے ، اس کی ایک جھلک جیسے نظروں کے سامنے ہو۔

اللہ جاپان اور اس کے جفا کش باشندوں پر رحم کرے۔

مقام عبرت ہے کہ جاپان کی ترقی جاپانیوں کے کسی کام نہ آئی۔ ثابت ہوا کہ ٹیکنالوجی کی ساری ترقی اس وقت انسان کے کسی کام نہیں آتی ، جس وقت اسے اس کی سب سے زیادہ ضرورت ہوتی ہے۔

اس سونامی میں صرف مال و متاع ہی نہیں بہا ، یہ خودفریبی بھی بہہ گئی کہ انسان نے قدرت کو مسخر کر لیا ہے۔
انسان تو قدرت کی طاقت کے سامنے اب پہلے سے بھی زیادہ بےبس نظر آ رہا ہے۔ یہ بات اپنی تمام تر قوت کے ساتھ ثابت ہو گئی کہ ٹیکنالوجی اور معیشت کی ترقی بہتر مستقبل کی کوئی ضمانت نہیں ہے۔
ایک منٹ کے ایک حادثے نے اس ملک کو زمین پر لا کھڑا کیا جو آسمان کی رفعتوں کو چھو رہا تھا۔ آج جاپان کا اسٹاک اکسچینج ملبہ کے ڈھیر تلے دب چکا ہے۔ وہ تجوریاں خالی پڑی ہیں جو کل تک آدھی دنیا خرید سکتی تھیں۔

جاپان میں آئی ہوئی تباہی بہت چشم کشا ہے ، بشرطیکہ اس سے سبق لیا جائے۔

---
حسن کمال کے مضمون "جاپان کی ترقی کسی کام نہ آئی" سے اقتباس۔ مکمل مضمون (اشاعت: روزنامہ اعتماد ، 20-مارچ 2011ء) یہاں مطالعہ فرمائیں۔

رکن پارلیمنٹ بیرسٹر اویسی :: پاکستان کے دورہ سے متعلق تاثرات

2011-02-06T02:22:00.005+05:30

ہندوستانی ارکان پارلیمنٹ کا 7 رکنی وفد ، پاکستان انسٹی ٹیوٹ آف لجیسلیٹیو ڈیولپمنٹ اینڈ ٹرانسپرنسی (PILDAT) کی دعوت پر گذشتہ دنوں پاکستان کے دورہ پر تھا۔ اس وفد میں بیرسٹر اسد الدین اویسی ، رکن پارلیمنٹ حیدرآباد اور صدر کل ہند مجلس اتحاد المسلمین بھی شامل تھے۔ وفد میں بیرسٹر اویسی کے علاوہ یشونت سنہا ، منی شنکر ایر ، شتروگھن سنہا بھی موجود تھے۔
پاکستان میں اپنے ایک ہفتہ کے قیام کے دوران بیرسٹر اسد الدین اویسی کو پاکستان کے جن مسائل و معاملات کے مطالعہ و مشاہدہ کا موقع ملا ، ان کا ایک جائزہ انٹرویو کی شکل میں روزنامہ "اعتماد" (30-جنوری-2011ء) میں شائع ہوا ہے۔ کچھ اہم سوالات ذیل میں ملاحظہ فرمائیں۔

سوال :

کیا یہ بات درست ہے کہ پاکستان کی سوسائیٹی منقسم ہے؟

جواب :

ہمارے اسلام آباد پہنچنے سے ایک دن قبل گورنر پنجاب سلمان تاثیر کو ممتاز قادری نے گولی مار دی تھی۔ اسلام آباد میں اس واقعہ کی خبریں انگریزی اور اردو اخبارات میں جلی سرخیوں میں شائع ہوئیں۔ تمام انگریزی اخبارات نے اس واقعہ کی مذمت کی اور اس کی شدت سے مخالفت کی جبکہ وہاں کے تمام اردو اخبارات نے اس واقعہ کی تائید میں خبریں شائع کیں اور ممتاز قادری کی ستائش کی۔ میں سمجھتا ہوں کہ میڈیا عوام کی عکاسی کرتا ہے۔ ظاہر بات ہے جب میڈیا منقسم ہے تو پھر سوسائیٹی بھی منقسم ہے۔ ہم سے بات چیت کیلئے جو 23 ارکان پارلیمنٹ آئے تھے ان میں کئی قابل ترین ہیں ، بیشتر امریکہ اور برطانیہ کی بڑی بڑی یونیورسٹیز کے فارغ التحصیل ہیں۔ بات چیت سے مجھے ایسا محسوس ہوا کہ ان کی اکثریت عام آدمی کے احساسات کی ترجمانی نہیں کر رہی۔ جبکہ وہاں ایسے ارکان بھی موجود تھے جو زیادہ تر عوامی مفاد کی باتیں کر رہے تھے۔ گفت و شنید سے تو یہ محسوس ہوا کہ پاکستان کے ارکان پارلیمنٹ غیر معمومی تعلیم یافتہ اور قابل ہیں۔

سوال :

مختلف مذہبی گروہوں میں باہمی تعلقات کیسے ہیں؟

جواب :

اس سوال کا جواب دینے سے قبل میں آپ کو یہ بتانا چاہوں گا کہ پلڈاٹ اجلاس کے پہلے دن جب لنچ ہوا تو پاکستان کے ایک رکن پارلیمنٹ جو چہرے اور لباس سے بڑے مذہبی آدمی لگ رہے تھے وہ میرے قریب آئے ، انہوں نے مجھ سے سوال کیا :
اویسی صاحب ، آپ کا مسلک کیا ہے؟
مجھے حیرت ہوئی ، میں نے ان سے الٹا سوال کیا کہ آپ کا ملک اسلامی ہے تو پھر مسلک کا سوال کیوں؟ تو انہوں نے کہا: آپ الٹا مجھ سے سوال کر رہے ہیں۔ پھر میں نے کہا : میرا مسلک عشق اور محبت کا ہے۔ وہ مسکرا کر خاموش ہو گئے۔
میں نے کراچی میں ناموسِ رسالت () کا ایک بڑا جلوس دیکھا، اس جلوس میں ہزاروں افراد شریک تھے۔ معلوم ہوا کہ تمام مکاتبِ فکر کے لوگ اس میں شامل تھے۔ لیکن یہ بھی حقیقت ہے کہ وہاں مذہبی گروپس میں شدید اختلافات بھی پائے جاتے ہیں۔ آئے دن ہم اخبارات میں پڑھتے ہیں کہ فلاں گروپ نے فلاں پر حملے کر دئے ، فلاں نے فلاں پر گولیاں چلا دیں۔

سوال :

کیا پاکستان میں عام آدمی یا پھر بیرونی آدمی خود کو غیر محفوظ محسوس کرتا ہے؟

جواب :

نہیں ایسا محسوس تو نہیں ہوا۔ وہاں لوگوں سے بات چیت کریں تو آپ کو بھی محسوس ہوگا کہ وہ کسی بھی قسم کے خوف و خطر کے بغیر رہتے ہیں۔ کراچی اور لاہور کی بہ نسبت اسلام آباد میں مجھے سیکوریٹی بہت زیادہ نظر آئی۔ جہاں تک بیرونی افراد کا سوال ہے تو وہاں سیکوریٹی بہت زیادہ تھی۔ مجھے میریٹ ہوٹل میں کوئی خطرہ محسوس نہیں ہوا اور نہ ہی میرے ساتھی وفد کے ارکان کو۔ وہاں اس بات کا پتہ چلا کہ جتنی بھی تشدد پسند تنظیمیں ہیں ان کا گڑھ پنجاب ہے۔ یہ تنظیمیں عوام میں کچھ حد تک مقبول بھی ہیں۔ یہ بھی کہا جاتا ہے کہ یہ تنظیمیں بڑے پیمانے پر چیریٹیبل کام کرتی ہیں۔

سوال :

کیا پاکستان کے موجودہ حالات ہندوستان پر اثرانداز ہو سکتے ہیں؟

جواب :

میں ایسا مانتا ہوں کہ پاکستان کی غیریقینی صورتحال ہندوستان کے لئے ایک سنگین خطرہ ہے۔ اگر آپ کے پڑوس میں بھیانک آگ لگی ہو اور آپ اپنے مکان میں دنیا کا جدید اور طاقتور ترین ائرکنڈیشن لگا لیں تو آپ کو ٹھنڈک تب تک نہیں مل سکتی جب تک پڑوس میں لگی آگ ختم نہ ہو جائے۔
ایک خوشحال پاکستان ، ہندوستان کے لئے بہتر ہوگا۔ اگر پاکستان میں تباہی ہوتی رہے گی تو ہم کیسے سکوں سے رہیں گے؟ ویسے پڑوسی تو تبدیل نہیں کر سکتے۔

***

بشکریہ : روزنامہ اعتماد ، اتوار ایڈیشن ، 30-جنوری-2011ء

نامور مزاحیہ شاعر طالب خوندمیری کا انتقال

2011-01-17T00:32:00.002+05:30

اردو حلقوں میں یہ خبر نہایت افسوس کے ساتھ سنی جائے گی کہ طنز و مزاح کے نامور شاعر طالب خوندمیری کا آج بروز اتوار 16-جنوری-2011ء دوپہر ڈھائی بجے انتقال ہو گیا۔
اناللہ وانا الیہ راجعون

سید عبدالکریم مرحوم کے فرزند سید محمود طالب خوندمیری (پیدائش : 14-فبروری-1938ء) کا شمار حیدرآباد دکن (انڈیا) کے ممتاز آرکیٹکٹس میں ہوتا تھا۔ انہوں نے خود کی قائم کردہ آرکیٹکچرل فرم کے ذریعے بیشمار مساجد کی منفرد اسلامی طرز کی ڈیزائیننگ کی تھی۔
مرحوم طالب خوندمیری ، زندہ دلانِ حیدرآباد کے 20 سال سے زائد عرصے تک معتمد عمومی برقرار رہے۔ مزاحیہ ماہنامہ "شگوفہ" (حیدرآباد) کی مجلس ادارت کے وہ فعال رکن تھے۔ طنزیہ و مزاحیہ کلام پر مبنی ان کا ایک مجموعہ بعنوان "سخن کے پردے میں" منظر عام پر آ چکا ہے۔

طالب خوندمیری کی نمازِ جنازہ کل بروز پیر 17-جنوری-2011ء کو بعد نماز عشاء چنچل گوڑہ (حیدرآباد) میں مقرر ہے۔ مرحوم کے پسماندگان میں اہلیہ کے علاوہ تین فرزند اور تین دختران شامل ہیں۔

طالب خوندمیری گو کہ سنجیدہ شاعری بھی کرتے رہے مگر انہیں طنزیہ اور مزاحیہ شاعری کے سبب زیادہ مقبولیت حاصل ہوئی۔ طنز و مزاح سے لبریز ان کے کلام سے جہاں قاری/سامع کے لبوں پر مسکراہٹ نمودار ہوتی ہے تو وہیں پلکیں بھی بھیگ جاتی ہیں۔
طالب خوندمیری ایسے پہلے آرکیٹک مزاح گو شاعر ہیں ، جن کے متعلق معروف مزاح نگار یوسف ناظم (مرحوم) نے فرمایا تھا :

ان کی شاعری میں زاویے ہی زاویے ہیں۔ مزاح کی کمانیں اور طنز کے جھروکے اور مستزاد کا ایک روف گارڈن۔

طالب خوندمیری کی ایک خصوصیت یہ تھی کہ انہوں نے اپنی نظموں میں غالب کے مصرعوں کو نہایت فنکارانہ انداز میں استعمال کیا۔ نظموں کے عنوانات تک یوں رہے ہیں : پامسٹ غالب ، آرکیٹکٹ غالب ، طبیب غالب ، غالب حسینوں کے جھرمٹ میں ۔۔۔۔
"آرکیٹکٹ غالب" اپنے ایک موکل کو یوں مشورہ دیتا ہے :
میں جو کہتا ہوں ڈیکوریشن کروائیے
سبزۂ شاداب کی شطرنجیاں بچھوائیے
چوبِ صندل کی بنی سب کھڑکیاں لگوائیے
گیسوئے پرپیچ و خم کی چلمنیں ڈلوائیے

شاعرِ مشرق کے "شکوہ" کی طرز پر طالب خوندمیری نے بھی ایک "شکوہ" مسدس کی ہئیت میں تحریر کیا ہے جس میں اردو زبان اپنے وطن سے بھرپور طنزیہ انداز میں شکوہ کرتی نظر آتی ہے ۔۔۔۔۔۔ :
محفلِ خورد و کلاں میں صفتِ جام پھری
لے کے آسان قواعد سحر و شام پھری
لکھنؤ دلی و پنجاب تا آسام پھری
کیا کبھی کام سے اپنے کہیں ناکام پھری
شہر تو شہر ہیں قریے بھی نہ چھوڑے میں نے
دور دیہات میں دوڑا دئے گھوڑے میں نے

افسوس کہ طنز و مزاح کا ایک مقبول و روشن باب ختم ہو گیا۔ طالب خوندمیری نے ایک مرتبہ اپنے معبودِ حقیقی کی بارگاہ میں عرض کیا تھا :
تو نے آنکھوں میں ندامت بھی مری دیکھی ہے
اس کے آگے مرے معبود تری مرضی ہے !!

اللہ تعالیٰ انہیں غریقِ رحمت کرے اور لواحقین کو صبر جمیل سے نوازے ، آمین۔

اخلاق سب سے کرنا تسخیر ہے تو یہ ہے

2011-01-11T13:11:00.001+05:30

نبی کریم صلی اللہ علیہ وعلی آلہ وسلم نے فرمایا ہے کہ ۔۔۔۔
اكمل المؤمنين ايمانا احسنهم خلقا (صحیح ترمذی)
سب سے زیادہ کامل ایمان والے وہ لوگ ہیں جو مسلمانوں میں سب سے زیادہ اچھے اخلاق والے ہیں۔
اور ۔۔۔
اخياركم احاسنكم اخلاقا (حسن ، بیھقی کبریٰ)
تم میں سب سے اچھا وہ ہے جس کے اخلاق سب سے اچھے ہوں۔

اسی طرح ایک اور حدیث کا مضمون ہے کہ ۔۔۔
عن اكثر ما يدخل الناس الجنة ، فقال : " تقوى الله وحسن الخلق " (صحیح ترمذی)
اللہ کا ڈر اور حسن خلق ، وہ عمل ہیں جو انسانوں کے جنت میں جانے کا زیادہ سبب بنیں گے۔

اچھے اخلاق کی پابندی اور برے اخلاق سے اجتناب کے لئے خود قرآن بھی جگہ جگہ تاکید کرتا ہے۔ یہ ہمارے اپنے اچھے اور عمدہ اخلاق ہی ہیں جن کے ذریعے معاشرے میں سدھار لایا جا سکتا ہے ، اپنے ہم مذہبوں کے درمیان اتحاد و اتفاق کی فضا پیدا کی جا سکتی ہے اور غیر مذاہب کے افراد کے دل و دماغ کو تسخیر کیا جا سکتا ہے۔

حسن اخلاق کی ایک عمدہ مثال ابھی کل ہی ہندوستانی میڈیا میں ایک خبر کے ذریعہ سامنے آئی ہے۔

مکہ مسجد دھماکہ ، مالیگاؤں بم دھماکہ ، سمجھوتا ایکسپریس دھماکہ ۔۔۔۔ کیا ہندو دہشت گردوں کی کاروائی تھی؟ اس کے ثبوت میں سوامی اسیم آنند کے انکشافات نے ہندوستانی میڈیا میں گرما گرمی پیدا کر دی ہے۔ سی۔بی۔آئی کی خصوصی عدالت میں ہندو دہشت گرد سوامی اسیم آنند نے اعتراف کیا ہے کہ جیل میں حراست کے دوران وہ اپنے آپ کو بالکلیہ طور پر تبدیل کر چکا ہے اور اس کی سوچ و فکر بھی بدل گئی ہے۔ پھر اس نے اپنے سیاہ کرتوت اور دیگر دہشت گردوں کے متعلق تمام تفصیلات فراہم کر دیں۔
صحافتی و تحقیقاتی ذرائع کے مطابق 58 سالہ اسیم آنند کی اس ذہنی تبدیلی کا مرکزی سبب جیل میں محروس 20 سالہ ایک مسلمان نوجوان محمد عبدالکلیم کی رحم دلی ، صلہ رحمی اور حسنِ اخلاق رہا ہے۔
سوامی اسیم آنند نے اپنے بیان میں کہا کہ :

کلیم کے ساتھ میل جول کے دوران مجھے معلوم ہوا کہ وہ مکہ مسجد بم دھماکے کے کیس میں بےگناہ پھانسا گیا ہے اور دیڑھ سال سے حراست میں ہے۔ جیل میں میرے قیام کے دوران اس نے میری بہت خدمت کی۔ وہ میرے لئے کھانا لانے ، پانی پلانے میں آگے رہا کرتا تھا۔ انسانی ہمدردی پر مبنی اس کے اسی رویے نے میری سوچوں میں انقلاب پیدا کیا اور میں نے فیصلہ کر لیا کہ پرائشچت (کفارہ) کے طور پر مجھے اپنے گناہوں کا کھلے عام اعتراف کرتے ہوئے اقبالیہ بیان دے دینا چاہئے۔

ہماری چھاؤں چوری ہو گئی ہے !

2011-01-01T23:41:00.002+05:30

آدھی رات کا وقت ہے۔
کاچی گوڑہ ریلوے اسٹیشن سے ایک تانگہ روانہ ہو کر حسینی علم پہنچتا ہے۔ ایک قدیم مکان کے سامنے تانگہ رکوا کر ایک صاحب تانگے سے اپنا سامان لے کر اترتے ہیں اور مکان کے دروازے پر دستک دیتے ہیں۔ کچھ دیر کے انتظار کے بعد دروازہ کھلتا ہے اور اندر سے ایک بوڑھا آدمی ہاتھ میں لاٹین لئے برآمد ہوتا ہے اور نووارد کو سوالیہ نگاہوں سے نیچے سے اوپر تک دیکھتا ہے۔
"معاف کیجئے ، کیا میں نعیم صاحب سے مل سکتا ہوں؟" نووارد بوڑھے سے پوچھتا ہے۔
"آپ کہاں سے تشریف لائے ہیں؟" بوڑھا نووارد سے سوال کرتا ہے۔
"جی میں اورنگ آباد سے آیا ہوں۔"
"اچھا"۔ ایک لمحے کے سکوت کے بعد بوڑھا کہتا ہے : "اندر آئیے۔۔۔۔"
نووارد بسم اللہ کہہ کر مکان میں داخل ہو جاتا ہے۔ اندر آنے کے بعد بوڑھا کہتا ہے :
"نعیم صاحب سو رہے ہیں، آپ بھی آرام کر لیجئے ، صبح ملاقات ہو جائے گی۔"
"مگر بابا ، آپ کون ہیں؟" نووارد گومگو کی حالت میں سوال کرتا ہے۔
"سب باتیں صبح ہو جائیں گی۔ فی الحال مجھے بھی نیند آ رہی ہے ، آپ بھی سو جائیے۔" اتنا کہہ کر بوڑھا آگے بڑھ جاتا ہے۔

صبح ناشتے کی میز پر بوڑھے بابا اپنے مہمان کو تفصیل بتاتے ہوئے کہتے ہیں :
"میرا نام رام لعل ہے۔ یہ مکان آج سے چھ ماہ قبل نعیم صاحب سے میں نے خرید لیا تھا ۔۔۔۔ اگر میں آپ کو سچائی بتا دیتا تو آدھی رات کو آپ کہاں بھٹکتے پھرتے؟ یہی وجہ تھی کہ رات میں نے آپ کو کچھ نہیں بتایا"۔

یہ سچا قصہ ہے پرانے حیدرآباد کا جہاں کی گنگا جمنا تہذیب کو کبھی سارا عالم سلام کرتا تھا جہاں رہنے والا ہر انسان خلوص اور محبت کا مجسمہ ہوا کرتا تھا۔ جہاں کی قدیم روایتیں اتحاد و یکجہتی کی علامت تھیں ۔۔۔۔
اب وہ روایتیں کہیں گم ہو چکی ہیں ۔۔۔ اب تو وہ حیدرآباد ہی کہیں گم ہو چکا ہے !

سچ پوچھئے تو ان دنوں گمشدگی کی وبا پھیلی ہوئی ہے۔ گمشدگی کہئے ، چوری کہئے یا اغوا ۔۔۔ اخباروں میں روزانہ کسی نہ کسی کے لاپتہ ہو جانے یا اغوا کر لئے جانے کی خبروں کی اشاعت اب ایک عام سی بات ہو گئی ہے ۔۔۔۔ کسی کی بیوی کھو گئی ہے تو کسی کا بیٹا اغوا کر لیا گیا ہے ۔۔۔۔ یہاں تک کہ ایمان دھرم بھی اب محفوظ نہیں ہے۔
ہوشیار باش ! کسی کا بھی کچھ بھی کبھی بھی چوری ہو سکتا ہے۔
ہمارے ایک شاعر دوست نورالدین امیر کا شعر ہے :
سروں پر دھوپ کی چادر تنی ہے
ہماری چھاؤں چوری ہو گئی ہے

اقتباس بشکریہ : "اک شہر تھا عالم میں انتخاب" از - سردار سلیم

ہندی غزل : کبھی انکار چٹکی میں ، کبھی اقرار چٹکی میں

2010-12-10T15:44:00.003+05:30

دِوِجندر دِوِج (Dwijendra Dwij / द्विजेन्द्र द्विज)

ہماچل پردیش (دارالحکومت: شملہ) سے تعلق رکھنے والے ہندی کے مقبول نوجوان شاعر ہیں۔ ہماچل پردیش یونیورسٹی کے پوسٹ گریجویٹ اسٹڈیز سنٹر سے انگریزی میں ماسٹرز ڈگری حاصل کی ہے۔ آپ کی غزلوں کا ایک مجموعہ "جن گن من" کے عنوان سے 2003ء میں شائع ہو چکا ہے۔
دوج کی شاعری ان کے اپنے بلاگز پر پڑھی جا سکتی ہے:

کچھ ماہ قبل ایک ہندی شعری و ادبی انجمن نے ایک طرحی شعری محفل کا انعقاد کیا تھا جس کے لئے طرحی مصرع یہ دیا گیا تھا :

کبھی انکار چٹکی میں ، کبھی اقرار چٹکی میں

حاصلِ مشاعرہ غزل ، جناب دِوِجندر دِوِج (Dwijendra Dwij) کی رہی جسے ذیل میں ملاحظہ فرمائیے گا۔
اردوداں قارئین کے لئے شائد یہ بات باعثِ حیرت ہو کہ ہندی غزل خواں شعراء کے ہاں بھی کس قدر "اردو نوازی" موجود ہے۔ اس پوری غزل میں شائد ہندی کے صرف تین الفاظ موجود ہیں :

اندھیار = اندھیرا

اُجیار = اُجالا

اوتار = خدا رسیدہ آدمی

***
ہوا کے رُخ سے وہ بھی ہو گئے لاچار چٹکی میں
ہوا کے رُخ بدل دیتے تھے جو اخبار چٹکی میں

کبھی اندھیار چٹکی میں ، کبھی اُجیار چٹکی میں
کبھی انکار چٹکی میں ، کبھی اقرار چٹکی میں

بھلے مل جائے گا ہر چیز کا بازار چٹکی میں
نہیں بِکتا کبھی لیکن کوئی خوددار چٹکی میں

بہت تھے ولولے دل کے مگر اب سامنے ان کے
اُڑن چھو ہو گئی ہے طاقتِ گفتار چٹکی میں

عجب تقریر کی ہے رہنما نے امن پر یارو
نکل آئے ہیں چاقو تیر اور تلوار چٹکی میں

طریقہ ، قاعدہ ، قانون ہیں الفاظ اب ایسے
اُڑاتے ہیں جنہیں کچھ آج کے اوتار چٹکی میں

کبھی خاموش رہ کر کٹ رہے ریوڑ بھی بولیں گے
کبھی خاموش ہوں گے خوف کے دربار چٹکی میں

وہ جن کی عمر ساری کٹ گئی خوابوں کی جنت میں
حقیقت سے کہاں ہوں گے بھلا دوچار چٹکی میں

نتیجہ یہ بڑی گہری کسی سازش کا ہوتا ہے
نہیں ہلتے کسی گھر کے در و دیوار چٹکی میں

ڈرا دے گا تمہیں گہرائیوں کا ذکر بھی ان کی
جو دریا تیر کے ہم نے کئے ہیں پار چٹکی میں

پرندے اور تصور کے لئے سرحد نہیں ہوتی
کبھی اِس پار چٹکی میں ، کبھی اُس پار چٹکی میں

بس اتنا ہی کہا تھا شہر کا موسم نہیں اچھا
سزا کا ہو گیا سچ کہہ کے دِوِج حقدار چٹکی میں

ہند کی سیاست کے حمام کی برہنگی

2010-12-05T03:36:00.005+05:30

ہندوستان کے ممتاز اور قدیم انگریزی اخبار "دی ہندو" کے ڈپٹی ایڈیٹر معروف صحافی سدھارتھ وردھاراجن نے اپنے بلاگ Reality, one bite at a time کی تازہ تحریر میں چونکا دینے والے تلخ حقائق کا ذکر کیا ہے۔

ہندوستان کے حالیہ تنازع 2G SPECTRUM کے بارے میں کمپٹرولر اینڈ آڈیٹر جنرل آف انڈیا کی دی گئی رپورٹ ملک بھر میں بحث کا موضوع بنی ہوئی ہے۔ اس رپورٹ میں بتایا گیا ہے کہ اس وقت کے ٹیلی کام وزیر اے راجا نے کس طرح قواعد و ضوابط کو بالائے طاق رکھ کر من مانے انداز میں فوجی اسپکٹرم کے حلقوں کا الاٹمنٹ کیا تھا اور اپنے چند چہیتوں کو اس طرح الاٹمنٹ کر کے انہوں نے حکومت ہند کو کوئی ایک لاکھ 70 ہزار کروڑ روپے کے نقصان سے دوچار کیا تھا؟

ٹاٹا ، مکیش امبانی گروپ ۔۔۔ دو بڑے میڈیا ہاؤس NDTV اور انڈین ایکسپریس ۔۔۔۔ کے متعلق "کچھ تازہ ترین" معلومات درکار ہوں تو "نیرا راڈیا" کی گفتگو سن لیں جس کی آڈیو ٹیپس آؤٹ لک میگزین نے انٹرنیٹ پر یہاں پبلش کر دیا ہے۔
ان ٹیپس سے "ہندوستانی سیکولرزم" کی سب سے بڑی علمبردار (بزعم خود) برکھا دت اور عظیم معروف صحافی ویر سانگھوی کا بھی گھناؤنا کردار ابھر کر سامنے آتا ہے !

سدھارتھ وردھاراجن کہتے ہیں :

The Niira Radia audio archive loaded on to the Internet by Open and Outlook magazines last week is the red pill of our time. It reveals the source codes, networks, routers, viruses and malware that make up the matrix of the Indian State. The transmission of information, also known as “news”, between different nodes is vital for the system to work efficiently. The news is also the medium for reconciling conflicts between different sectors of the establishment. If you hear the recordings, you begin to understand the truth about the Wonderland that is India. No wonder there are many amongst us who would rather swallow the blue pill. For once you go in, the only way out is to keep digging. And yes, the rabbit-hole runs deep.

ان آڈیو ٹیپس کو ہمارے اس زمانے کی "سرخ رنگ گولی" سمجھ لیا جائے کہ اس سے کاروباری اداروں کے خفیہ اشاروں ، خفیہ نیٹ ورکس ، خفیہ کارندوں ، خفیہ پیروکاروں ، زہریلے جرثوموں اور بدکاروں کا انکشاف ہوتا ہے جو کہ ہماری مملکت کے ڈھانچے ، سانچے میں دور دور تک سرایت کر گئے ہیں۔ اطلاعات کی ترسیل جس کو "نیوز" کہا جاتا ہے ، وہ مختلف شعبوں اور سطحوں کے مابین حکمرانی کے نظام کو کارکرد اور فعال بنائے رکھنے میں ایک اہم کردار ادا کیا کرتی ہے۔
"نیوز" ، حکمرانی کے مختلف اداروں ، مختلف شعبوں کے مابین اختلافات اور آویزشوں کو گھٹا دینے اور ان کا خاتمہ کر دینے میں بھی ایک مصالحتی ، مفاہمتی کردار ادا کرتی ہے۔ اگر آپ ان ریکارڈنگز کو سن لیں تو پھر آپ اس حقیقت اور سچائی سے واقف ہونے لگیں گے کہ ہندوستان کیسی عجیب و غریب اور کتنی حیران کن سرزمین ہے؟

سدھارتھ وردھاراجن مزید لکھتے ہیں :

We also hear in the tapes an iconic businessman, Ratan Tata, who today makes sanctimonious statements about crony capitalism and the danger of India becoming a banana republic, lobbying through his PR agent, Ms Radia, for A. Raja to be given the Telecom portfolio.

If the allocation of spectrum by the Manmohan Singh government in 2008 and 2009 is one of the biggest scams in independent India, then the involvement of businessmen like Ratan Tata, Sunil Mittal and Mukesh Ambani in lobbying for their choice of telecom minister when the UPA government returned to power in May 2009 is surely a very important part of the back-story.

ہم ٹیپس میں یہ بھی سنتے ہیں کہ ایک دیوتا سمان بزنس مین رتن ٹاٹا ، جو کہ اب پوترتا اور پاکبازی کے بیانات دینے لگے ہیں کہ ہمیں یہ بتائیں کہ گٹھ جوڑ والی سرمایہ کاری crony capitalism کیا ہوتی ہے؟ اور خطرہ یہ ہے کہ ہندوستان ایک پلپلی جمہوریت banana republic بن کر رہ جائے گا۔ رتن ٹاٹا نے اپنی پبلک ریلیشن ایجنٹ کماری راڈیا کے ذریعہ اپنے لئے پیروی کرائی تھی کہ اے-راجا کہ ٹیلی کام وزارت دی جائے۔
من موہن سنگھ حکومت نے 2008ء میں اور 2009ء میں اگر اسپکٹرم کا الاٹمنٹ کیا ہے تو پھر یہ آزاد ہندوستان کے سب سے بڑے اسکامس میں سے ایک ہے۔ پھر اس اسکام میں رتن ٹاٹا ، سنیل متل اور مکیش امبانی جیسے قدآور بزنس مین ملوث ہیں جو کہ اپنی پسند کا ٹیلی کام وزیر ، سنگھاسن پر بٹھائے جانے کے لئے پیرویاں کرتے رہے اور یہ پیرویاں اس وقت کی گئیں جبکہ 2009ء میں UPA دوسری بار برسراقتدار آئی تھی۔

***
سدھارتھ وردھا راجن کا تازہ آرٹیکل ان کے اپنے بلاگ پر :
Welcome to the Matrix of the Indian state

اخبار "دی ہندو" کالم میں :
Welcome to the Matrix of the Indian state

اردو ترجمہ بشکریہ : روزنامہ "اعتماد" ، اتوار 5-ڈسمبر
اس حمام میں سب برہنہ : ہندوستانی مملکت کی نئی صورت گری

عید مبارک

2010-11-16T22:01:00.001+05:30

عمل پیرا ہوں سب احکام قرآن و سنت پر
میسر دولتِ عرفاں سبھی کو زندگی بھر ہو
ہو مستحکم خدا کے فضل سے ملت کا شیرازہ
سبھی ہوں ایک صف میں کوئی اکبر ہو نہ اصغر ہو

(ڈاکٹر احمد علی برقی اعظمی)

اردو کا ابتدائی زمانہ - ادبی تہذیب و تاریخ کے پہلو

2010-11-10T17:57:00.006+05:30

اردوداں صاحب کا شکریہ کہ ان کے ایک تبصرہ کے ذریعے ایک قیمتی کتاب علم میں آئی۔
کتاب کا نام ہے : اردو کا ابتدائی زمانہ - ادبی تہذیب و تاریخ کے پہلو
اور مصنف ہیں : پروفیسر شمس الرحمٰن فاروقی

پہلے کتاب کا دیباچہ اردو یونیکوڈ میں نیچے ملاحظہ فرمائیں ۔۔۔۔۔۔۔۔

شکاگو یونیورسٹی میں [National Endowment for Humanities] نامی ادارے کے تعاون سے ایک وسیع و عریض منصوبہ کئی سال ہوئے بنا تھا۔ اس منصوبے کے تحت ہندوستان کی بڑی زبانوں کی ادبی تہذیب ، ادبی اور ثقافتی تاریخ سے ان کے رشتوں ، ان کے آپسی روابط اور ادب کے بارے میں ان زبانوں میں رائج تصورات کا مطالعہ مقصود تھا کہ ہندوستان ہی نہیں ، مغرب میں بھی کوئی بسیط اور جامع کام اس موضوع پر نہیں ہوا ہے۔
قدیم و جدید ہندوستان میں ادب اور لسان اور اقتدار میں کس طرح کے رشتے وجود میں آئے؟ کوئی زبان "ادبی" زبان کس طرح اور کب بنتی ہے؟ کس زبان میں ادب پیدا کرنے والوں کے مابین اور ادب کو برتنے والوں کے مابین جو سلسلے قائم ہوتے ہیں ، کیا ان کی نوعیت صرف طاقت پر مبنی ہوتی ہے؟ یا صرف بیع و شریٰ کے معاملات پر ، یا کوئی تہذیبی آدرش اور ثقافتی تعامل بھی اثرانداز ہوتا ہے؟

اس منصوبے کو [Literary Cultures in Indian History] کا نام دیا گیا ، اور قدیم جدید بڑی ہندوستانی زبانوں کے ماہرین جمع کیے گئے ، ہر ایک نے اپنے اختصاص کے اعتبار سے مضامین لکھے اور دوسروں کے مضامین پر اظہار رائے کیا۔ ہر مضمون کو انتہائی باریک بیں اور دور رس جرح و تعدیل کے عمل سے گذارا گیا۔ بحث اور سوال جواب کی روشنی میں ہر مضمون ایک سے زیادہ بار لکھا گیا۔ تجویز یہ ہے کہ ان مضامین کو ایک یا دو مجلدات کی شکل میں شائع کرایا جائے۔ ظاہر ہے کہ سب مضامین انگریزی میں ہیں۔
شکاگو یونیورسٹی میں سنسکرت کے پروفیسر شیلڈن پالک [Sheldon Pollock] اس پورے پروگرام کے بانی ڈائرکٹر اور سنسکرت ادب کے متعلق مقالے کے مصنف بھی ہیں۔

میرے ذمے [Early Urdu] پر مضمون لکھنے کا فریضہ تھا۔ اردو / ہندی کے معاملات کو سلجھائے بغیر [Early Urdu] کی اصطلاح بےمعنی رہتی ہے۔ لہذا میں نے اپنی بات جدید ہندی کے آغاز کی مخفی (اور ظاہر) سیاست اور اردو ادبی تہذیب پر اس سے اثر سے شروع کی۔
اس کے بعد میں نے اس سوال سے بحث کی کہ اردو زبان اگرچہ دہلی کے آس پاس پیدا ہوئی ، لیکن اس میں ادب کی پیداوار اول اول گجرات اور دکن میں کیوں ہوئی؟
پھر گجرات اور دکن میں نظری تنقید اور شعریات کا طلوع ، اس سلسلے میں امیر خسرو اور سنسکرت کا مرکزی کردار زیر بحث آیا۔
اس کے بعد میں نے مندرجہ ذیل معاملات کی چھان بین کی :

دہلی کا ادبی منظر نامے پر دیر میں ورود
لیکن دہلی کے ادبی سامراجی مزاج کے باعث غیر دہلی کے ادیبوں اور "باہر والوں" کا اردو کی فہرست استناد [Canon] سے اخراج
اور پھر اٹھارویں صدی کی دہلی میں نئی ادبی تہذیب اور شعریات کا آغاز۔
دہلی میں "اصلاح زبان" کی "مہم" اور ایہام "تحریک" کی حقیقت کیا ہے؟
استادی / شاگردی کا ادارہ دہلی کے علاوہ کہیں اور کیوں نہ وجود میں آیا؟

ان سوالات اور "دہلی اسکول" اور "لکھنؤ اسکول" پر بھی اس مقالے میں ایک حد تک کلام کیا گیا ہے۔

کوئی تین چار سال کی مشقت کے نتیجے میں میرا مضمون بڑھ کر ایک پوری کتاب بن گیا۔ اس کا مختصر کیا ہوا روپ شیلڈن پالک کی مرتبہ کتاب میں شائع ہوگا۔ اصل انگریزی کتاب اور اس کا یہ (اردو) ترجمہ الگ سے کتابی شکل میں شائع کئے جا رہے ہیں۔

یہ کتاب انگریزی میں :
Early Urdu Literary Culture and History
By : Shamsur Rahman Faruqi
Amazon [dot] com link

اردو میں پی-ڈی-ایف فائلوں کی شکل میں ڈاؤن لوڈ کیجئے :
ڈاؤن لوڈ بشکریہ : www.columbia.edu

اردو کا ابتدائی زمانہ - ادبی تہذیب و تاریخ کے پہلو :: مصنف - پروفیسر شمس الرحمٰن فاروقی
باب اول : (تاریخ ، عقیدہ اور سیاست) - ڈاؤن لوڈ
باب دوم : (تاریخ کی تعمیر نو ، تہذیب کی تشکیل نو) - ڈاؤن لوڈ
باب سوم : (شروعات ، وقفے ، قیاسات) - ڈاؤن لوڈ
باب چہارم : (نظری تنقید ، اور شعریات کا طلوع) - ڈاؤن لوڈ
باب پنجم : (وقفے ، اور پھر حقیقی آغاز ، شمال میں) - ڈاؤن لوڈ
باب ششم : (ولی نام کا ایک شخص) - ڈاؤن لوڈ
باب ہفتم : (نئے زمانے ، نئی ادبی تہذیب) - ڈاؤن لوڈ
کتابیات - Bibliography : (تحریریں ، جن کا حوالہ دیا گیا) - ڈاؤن لوڈ
اشاریہ - Index : ڈاؤن لوڈ

***
متعلقہ تحریر : اردو زبان کا ارتقا

ممتاز نعت گو حیدرآبادی شاعر "بےہوش محبوبنگری" کا انتقال

2010-10-17T18:49:00.002+05:30

6-اکتوبر-1925ء کو ضلع محبوب نگر میں پیدا ہوئے شہرِ حیدرآباد کے ممتاز نعت گو شاعر محمد عبدالقادر (المعروف بہ : بےہوش محبوب نگری) ، 16-اکتوبر-2010ء کو 85 سال کی عمر میں انتقال کر گئے۔ انا للہ وانا الیہ راجعون

منفرد انداز کی نعت گوئی میں مقبول ، ہندوستان کے مختلف شہروں میں منعقدہ نعتیہ اور دیگر مشاعروں میں شریک ہونے والے جناب بےہوش محبوب نگری نے دکنی زبان میں بےشمار نعتیں تخلیق کی ہیں۔ منقبت ، سلام ، نظم اور دیگر اصنافِ سخن میں ان کی قلمی کاوشیں موجود ہیں۔ ان کے دو نعتیہ شعری مجموعے "ہوشِ عقیدت" اور "ہوشِ عبدیت" منظرِ عام پر آ چکے ہیں۔
ممتاز شاعر حضرت معز الدین ملتانی (رحمۃ اللہ علیہ) کے حلقۂ ارادت میں شامل مرحوم کو مولانا حمید الدین عاقل حسامی (رحمۃ اللہ علیہ) سے بھی کافی عقیدت تھی۔

مرحوم کے پسماندگان میں اہلیہ اور ایک دختر کے علاوہ 6 فرزندان شامل ہیں۔ آپ کے ایک فرزند ڈاکٹر طیب پاشا قادری بھی حیدرآباد کے نامور شاعر مانے جاتے ہیں اور ہندوستان اور خلیجی ممالک کے مشاعروں میں شرکت کرتے رہے ہیں۔

تم اپنے رب کی کن کن نعمتوں کو جھٹلاؤ گے؟

2010-10-13T15:20:00.002+05:30

سورہ الرحمٰن میں ایک آیت 31 مرتبہ دہرائی گئی ہے
فبأي آلاء ربكما تكذبان
پس تم اپنے رب کی کن کن نعمتوں کو جھٹلاؤ گے؟

بچپن سے یہ آیت دہراتے آ رہے ہیں۔ مگر ۔۔۔۔۔ آج جب ایک ایمیل ملا تو اس آیت کے نئے معانی بھی علم میں آئے۔ آپ بھی ملاحظہ فرمائیں ۔۔۔۔۔۔۔۔۔۔۔۔۔

قرآن کریم میں لکھا ہوا ہر لفظ معتبر ہے ، چاہے وہ ایک بار ہی لکھا ہو
اور جو آیت ، ایک سورۃ میں 31 مرتبہ دہرائی جائے ، کیا اس پر ہم نے کبھی غور کیا ہے؟

اور یہ فرمان کہ :
پس تم اپنے رب کی کن کن نعمتوں کو جھٹلاؤ گے؟
کسی خاص طبقہ کے لئے نہیں بلکہ ہر انسان کے لئے ہے۔
یعنی ہم میں سے ہر ایک اپنی جگہ خوش قسمت ہے۔ ہم میں سے کوئی بھی اللہ کی نعمتوں کو جھٹلا کر اپنے آپ کو محروم و مظلوم نہیں کہہ سکتا۔

گننے کی بات یہ نہیں کہ کیا نہیں ملا ؟ بلکہ ۔۔۔۔
پہلے یہ گن لیا جانا چاہئے کہ ہمیں کیا کیا ملا ہے؟
اور جب ہم یہ گن لیں تو پھر اپنے خالق کا شکر بھی واجب ہے ، لہذا ربّ کائینات کی شکرگزاری کی جائے۔
جب ہمیں لگے کہ ہر نعمت گن بھی لی اور شکر کا حق بھی ادا کر دیا (جو کہ ممکن ہی نہیں) تو پھر ۔۔۔

تو پھر ۔۔۔
ہمیں احساس ہوگا کہ اب ایسا کچھ رہا ہی نہیں جس کی ناشکری کی جائے۔
اور اِس مقام تک پہنچتے پہنچتے یہ سمجھ آ جائے گی کہ :

جو ہمیں میسر ہے ، وہ ہمارا بھلا ہے اور جو نہیں ہے وہ بھی ہمارا بھلا ہے ۔۔۔ کہ :
اللہ سے زیادہ ہم سے کوئی پیار نہیں کر سکتا !!

دولت مشترکہ کھیل 2010ء - ‪2010 Common Wealth Games

2010-10-05T14:40:00.005+05:30

3-اکتوبر-2010ء بروز اتوار سے دولت مشترکہ کھیل سن 2010ء کا آغاز ہو چکا ہے۔
ڈیڈ لائینس ، اسکینڈلز ، گندگی اور بیشمار خامیوں کے باوجود کامن ویلتھ گیمز برائے 2010ء کی نئی دہلی کے نوتعمیر شدہ وسیع و عریض جواہر لعل نہرو اسٹیڈیم میں رنگا رنگ افتاحی تقریب کے ساتھ ہی شروعات ہو گئی ہے۔

دولت مشترکہ کی سربراہ ملکہ الزبیتھ کی نمائیندگی کرنے والے پرنس چارلس نے کہا :
"19 ویں دولت مشترکہ کھیلوں کا آغاز کرتے ہوئے میں بڑی مسرت محسوس کر رہا ہوں"۔

صدر جمہوریہ ہند پرتیبھا پاٹل نے 60 ہزار تماشائیوں کی تالیوں کی گونج میں کھیلوں کے آغآز کا اعلان کرتے ہوئے کہا :
"دہلی میں 2010ء کے دولت مشترکہ کھیل شروع ہوتے ہیں۔ آئیے کھیلوں کو شروع کریں"۔

کامن ویلتھ گیمز فیڈریشن کے صدر مائک فنل نے دہلی کے عوام کی میزبانی اور گرمجوشی کی ستائش کرتے ہوئے کہا :
"سب سے شاندار افتتاحی تقریب کیلئے دہلی کو ہماری طرف سے مبارکباد پیش ہے ، یہ سرور بخش افتتاح واقعتاً کھیلوں کا بہترین آغاز ہے"

12 دنوں پر محیط کھیلوں کے اس میلے میں 71 ممالک کے 7000 سے زائد کھلاڑی ایک دوسرے پر بازی لے جانے کی کوشش کریں گے۔
موسیقار اے آر رحمٰن نے تھیم سانگ "جیو ، اٹھو ، بڑھو ، جیتو" کے ذریعے اتھیلیٹس میں کامیابی کی تحریک برپا کی۔
معروف گلوکار ہری ہرن نے "سواگتم (خوش آمدید)" کے عنوان سے ایک موسیقی ریز پروگرام پیش کیا۔
ہندوستانی (495) اور پاکستانی (54) اتھیلیٹس جتھوں کا تماشائیوں نے سب سے زیادہ گرمجوشی سے استقبال کیا۔

دولت مشترکہ کھیل 2010ء - آفیشل ویب سائیٹ
دولت مشترکہ کھیل 2010ء - معلوماتی ویب سائیٹ

بابری مسجد : مقدمہ کا فیصلہ -- ردّعمل

2010-10-01T04:30:00.001+05:30

مسلم پرسنل لا بورڈ کا بیان :
عدالت نے تاریخ اور حقائق کو نظرانداز کر دیا : رام کی پیدائش کی جگہ کا تصور ، فیصلہ کی بنیاد بنا

الہ آباد ہائی کورٹ کی لکھنؤ بنچ کے فیصلہ میں تاریخ اور حقائق کو یکسر نظرانداز کیا گیا ہے۔
فیصلہ میں یہ اعلان کیا گیا ہے کہ جس مقام پر رام کی مورتی رکھی ہوئی ہے ، وہ مقام شری رام چندر جی کی جائے پیدائش ہے جو کسی دستاویزی یا دیگر ثبوت کی بنیاد پر نہیں بلکہ محض ایک تصور ہے۔

بابری مسجد 1528ء میں کھلی اراضی پر تعمیر کی گئی تھی ، وہاں رام کا کوئی مندر نہیں تھا۔ آرکیالوجیکل سروے آف انڈیا کی جانب سے کھدوائی میں ایسے کسی مندر کی موجودگی ثابت نہیں ہوئی ہے۔

آل انڈیا مسلم پرسنل لا بورڈ اس فیصلہ سے متفق نہیں ہے اور مقدمہ کے مسلم فریقین فیصلہ کے خلاف جلد ہی سپریم کورٹ میں اپیل دائر کریں گے۔ دستاویزی اور دیگر شواہد کی بنیاد پر بابری مسجد مقدمہ کو برحق ثابت کرنے کی انتھک کوشش کی جائے گی۔

صدر کل ہند مجلس اتحاد المسلمین کا بیان :
الہ آباد ہائی کورٹ کے فیصلہ سے مسلمان مایوس : ایک تہائی زمین ناقابل قبول : سپریم کورٹ سے رجوع ہوا جائے گا : مسلمانوں سے صبر و تحمل کی اپیل

الہ آباد ہائی کورٹ کے فیصلہ سے مسلمانوں کو بہت زیادہ مایوسی تو ضرور ہوئی ہے لیکن مسلمان صبر و تحمل کا مظاہرہ کریں گے۔
معزز ججس کی جانب سے ایک تہائی زمین حوالہ کرنے کا جو فیصلہ سنایا گیا ہے وہ مسلمانوں کو قابل قبول نہیں ہے۔ مسلم فریق کی جانب سے جو ثبوت پیش کئے گئے تھے ، درحقیقت ہائی کورٹ کی بنچ نے اسے ملاحظہ نہیں کیا ہے۔ ہائی کورٹ کی جانب سے جن امور اور ثبوتوں کو نظرانداز کیا گیا ہے اس کے خلاف سپریم کورٹ میں اپیل کی جائے گی۔

دو ججس جسٹس اگروال اور جسٹس صبغۃ اللہ خان نے تسلیم کیا ہے کہ وہاں مسجد تھی ، اور انہوں نے یہ بھی مانا کہ اس مقام پر مندر کو توڑ کر مسجد بنائی نہیں گئی تھی۔ بلکہ جسٹس خان نے تو یہ بھی کہا کہ : کوئی مندر گرایا نہیں گیا ، وہاں مسجد موجود تھی۔
6-ڈسمبر-1992ء کو ملک کی تاریخ میں بربریت کا جو واقعہ پیش آیا اور بابری مسجد کو شہید کر دیا گیا ، یہ ایک المناک واقعہ تھا۔ ان تمام ثبوتوں کو سپریم کورٹ میں پیش کیا جائے گا۔

وزیر اعظم من موہن سنگھ کا بیان :
سپریم کورٹ میں چارہ جوئی تک ایودھیا کا موقف جوں کا توں رہے گا

رام جنم بھومی - بابری مسجد ملکیت کیس پر الہ آباد ہائی کورٹ کی جانب سے فیصلہ سامنے آ چکا ہے۔ یہ طویل عدالتی جدوجہد کا منطقی نتیجہ ہے۔ یہ مسئلہ انتہائی حساس نوعیت کا ہے جس پر مختلف شعبہ ہائے حیات سے تعلق رکھنے والے عوام مختلف نظریات رکھتے ہیں۔
ہائی کورٹ نے فریقین کو سپریم کورٹ میں اپیل دائر کرنے کیلئے تین ماہ کی مہلت دی ہے۔ فیصلہ کا مختصر خلاصہ فی الحال یہی ہے کہ ایودھیا اراضی کا جوں کا توں موقف برقرار رکھا جائے تاوقتیکہ مقدمہ سپریم کورٹ سے رجوع نہیں کیا جاتا۔

میں ہندوستانی عوام پر مکمل یقین رکھتا ہوں۔ اس عظیم الشان ملک کی سیکولر روایات ، بھائی چارہ اور رواداری پر بھی مجھے مکمل اعتماد ہے۔
میں عوام سے اپیل کرتا ہوں کہ وہ تمام مذاہب اور مذہبی عقائد کا ہندوستانی تہذیب و روایات کی روشنی میں احترام کریں۔ حکومت کی جانب سے میں تیقن دیتا ہوں کہ حکومت ، قانون کی حکمرانی کی برقراری ، امن و امان کی بحالی ، فرقہ وارانہ ہم آہنگی اور سماجی نظام کو قائم رکھنے کے عہد کی پابند ہے۔
امید ہے کہ ایودھیا تنازعہ پر عدالتی فیصلہ کے بعد عوام کا ردعمل بالکل مثبت اور باوقار ہوگا۔ فیصلہ کا احترام کرتے ہوئے عوام ملک کو مقامِ افتخار پر پہنچانے میں تعاون کریں گے۔

بابری مسجد فیصلہ :: live updates

2010-09-30T17:04:00.010+05:30

تازہ ترین ۔۔۔۔۔۔۔۔۔۔

بابری مسجد - رام جنم بھومی فیصلہ
الہ آباد ہائی کورٹ لکھنؤ بنچ

مکمل فیصلہ کیلئے یہ ویب سائیٹ :
http://rjbm.nic.in/

لائیو اَپ ڈیٹس :

** اکثریتی فیصلہ کے مطابق متازعہ زمین تین حصوں میں تقسیم کی جائے گی۔
وکلاء کے بیان کے مطابق ، تین حصہ دار یہ رہیں گے :

سنی وقف بورڈ
نرموہی اکھاڑا
"رام لالہ" پارٹی

** مقدمہ کا مختصر خلاصہ

** مقدمہ کے اہم نکات

** معزز جج جسٹس صبغت اللہ خان کا فیصلہ
پی-ڈی-ایف فائل ڈاؤن لوڈ کریں

** معزز جج جسٹس سدھیر اگروال کا فیصلہ
پی-ڈی-ایف فائل ڈاؤن لوڈ کریں

** الہ آباد ہائی کورٹ کے اس فیصلہ کے خلاف سنی وقف بورڈ سپریم کورٹ میں اپیل کرے گا !
وقف بورڈ نے کہا ہے کہ اسے ہائی کورٹ کا فیصلہ قبول نہیں ہے۔
واضح رہے کہ عدلیہ کے فیصلہ میں درج ذیل نکات بھی شامل ہیں :

متنازعہ زمین رام کی جنم بھومی ہے
شہید مسجد کے مرکزی مینار کے نیچے والی جگہ ، جہاں مورتیاں رکھی گئی ہیں ، وہ ہندوؤں کو دی جانی چاہئے۔
متنازعہ جگہ جو مندر تھا ، اسے ڈھا کر مسجد تعمیر کی گئی تھی اور وہاں مسلمان عبادت نہیں کر رہے تھے۔

** آر ایس ایس چیف موہن بھاگوت کا بیان :
ہائی کورٹ کا فیصلہ کسی کی فتح یا شکست کا اعلان نہیں ہے۔
ہم ہر فرد کو بشمول مسلمانوں کو مدعو کرتے ہیں کہ وہ مندر کی تعمیر کیلئے آگے آئیں۔ رام مندر کی تعمیر نہ تو ردعمل ہے اور نہ ہی کسی خاص قوم کے خلاف ہے۔

بھاگوت نے مسلمانوں سے اپیل کرتے ہوئے کہا ہے کہ : وہ "ماضی کو فراموش" کر دیں !

ہند کے مسلم اکثریتی شہر حیدرآباد میں کرفیو جیسا ماحول دیکھا گیا۔ اسکول ، کالج اور آفسوں میں نہایت ہی کم حاضری رہی۔ دوپہر دو بجے سے قبل اسکول ، کالجز اور آفس خالی ہو گئے۔ شاپنگ مال ، عام دکانیں ، پٹرول پمپس ، سینما ہال وغیرہ کو پولیس کی جانب سے دوپہر میں بند کرواتے دیکھا گیا۔
عوام نے گھروں میں بند رہ کر ٹی وی کے ذریعے لمحہ بہ لمحہ فیصلہ کے متعلق تفصیلات کو دیکھنا پسند کیا۔

بابری مسجد : مقدمہ کا فیصلہ : 30-ستمبر-2010ء

2010-09-30T05:27:00.004+05:30

30-ستمبر-2010ء ، ساڑھے تین بجے دوپہر (ہندوستانی معیاری وقت)
بابری مسجد / رام جنم بھومی ملکیت مقدمہ کا فیصلہ

فیصلہ جس کے حق میں ہوگا ، زمین اس کے حوالے کر دی جائے گی : سپریم کورٹ میں اٹارنی جنرل کا بیان
الہ آباد ہائی کورٹ کی لکھنؤ بنچ کا فیصلہ حتمی نہیں بلکہ اس فیصلہ کے خلاف سپریم کورٹ میں اپیل کی جا سکے گی
اخبارات اور ٹیلی وژن چینلز میں عدلیہ کے فیصلہ کی رپورٹنگ اور صورتحال کے تجزیے اور تبصرے کے لئے رہنمایانہ خطوط جاری کئے گئے ہیں
ملک بھر میں موبائل فونوں کے ذریعے بلک (bulk) ایس-ایم-ایس کی خدمات کو معطل کر دیا گیا ہے
ملک کے تمام حساس علاقوں میں فورسز کی تعیناتی عمل میں لائی گئی ہے اور نظم و نسق کو چوکس رکھا گیا ہے

امن کی برقراری کے لیے وزیر اعظم من موہن سنگھ کی اپیل

حیدرآباد کے تین معروف و مقبول اردو روزناموں کے اداریے

بابری مسجد ۔۔۔۔ تاریخ کے جھروکے سے ۔۔۔ (بشکریہ : روزنامہ "اعتماد")