تعمیر نیوز - تازہ ترین

ہندوستان: ہندوستان: شمالی ہند: جنوبی ہند: مشرقی مغربی ہند: تجزیہ: تجزیہ:
ہند - تاریخ/تہذیب/ثقافت: تاریخ دکن: مسلمانان ہند: کلاسیکی ادب: اردو ہے جسکا نام: ناول: جنسیات:

بتاریخ : ‪2010-09-02

رمضان اور روزہ

۔۔۔ دہلی میں ہم جہاں رہتے ہیں وہاں سے وہ علاقے اور محلے بہت دور واقع ہیں جہاں سچ مچ رمضان کی رونقیں لگتی ہیں اور جہاں افطار کے بعد سے رات دیر تک لوگ کچھ نہ کچھ کھاتے ہی رہتے ہیں۔ ہماری مراد پرانی دلی اور جامعہ جیسے علاقوں سے ہے جہاں جانے کے بعد آدمی کا ایمان ترو تازہ ہو جاتا ہے۔ اگرچہ ہمارے محلے میں ایک مسجد بھی ہے ، جہاں سے اذانوں کی آوازیں پابندی سے آتی رہتی ہیں اور ذرا دور سے افطار کے سائرن کی آواز بھی آتی ہے۔ سحری کے وقت کے ختم ہونے کا اعلان بھی واضح طور پر سنائی دیتا ہے۔ لیکن ہمیں تو رونقوں والے رمضان کی عادت ہے۔

ایک زمانے میں ہم حیدرآباد کے جس محلہ میں رہتے تھے وہاں ہمارے گھر کے اطراف اتنی مسجدیں آباد تھیں اور اتنی پاس پاس واقع تھیں کہ افطار کے شروع ہونے اور سحری کے ختم ہونے کے وقت ہمارا گھر اچانک خوش الحان موذنوں کی اذانوں اور سائرنوں سے گونج اٹھتا تھا۔ ان اذانوں کے پس منظر میں ہم اپنے آپ ہی سحری کے لئے جاگ جاتے تھے۔ لیکن اس کے باوجود بعض بےلوث اصحاب ایسے بھی ہوا کرتے تھے جو گھر گھر جا کر روزہ داروں کو سحری کے لئے جگانے کا نیک کام انجام دیا کرتے تھے۔
ایک صاحب ایسے بھی تھے جو اپنے ساتھ ایک لمبا بانس بھی رکھا کرتے تھے۔ "سحری کرو اٹھو" کے مخصوص نعرے کے علاوہ اس بانس کی مدد سے روزہ داروں کو سحری کیلئے جگایا کرتے تھے۔ ہم عموماً دیوان خانے میں سو جایا کرتے تھے جس کی کھڑکیاں کھلی رہتی تھیں۔ بسا اوقات وہ اس بانس کو کھڑکی کے اندر داخل کر دیتے تھے اور ہمارے پاؤں کو اس کے ذریعے کچوکے دیا کرتے تھے تاکہ ہم اچھی طرح جاگ جائیں۔ ظاہر ہے کہ ہم جاگ تو جاتے تھے لیکن اس پر بھی ان کے دل کو تشفی نہیں ہوتی تھی اور یوں گلی کے باقی ماندہ روزہ داروں کو جگانے کے بعد جب وہ واپس جانے لگتے تھے اور ہمارے بستر کو خالی پاتے تو دروازے پر دستک دے کر پوچھ لیا کرتے تھے کہ :
جناب ! آپ جاگ گئے ہیں یا جاگنے کے بعد اندر جا کر کسی اور بستر پر تو نہیں سو گئے ہیں؟
(اندازہ لگائیے کہ کتنے مردم شناس اور قیافہ شناس تھے !)

غرض ان دنوں ہر طرف رمضان ہی رمضان دکھائی دیتا تھا۔ جو روزہ نہیں رکھتا تھا وہ بھی احتراماً اپنی شکل ایسی بنائے رکھتا تھا کہ گویا بنا سحری کے روزہ رکھا ہوا ہے !!

بشکریہ : روزنامہ سیاست (2010-08-20) کے کالم "میرا کالم : مجتبیٰ حسین" سے۔

7 تبصرے:

Abdullah نے لکھا ۔۔۔

:)
Dilchasp

بلاامتیاز نے لکھا ۔۔۔

اچھی اور دلچسپ تحریر ہے
ویسے پنڈی بھی ایک بے ترتیب شہر ہے جس کی ہر گلی کے کئی اطراف مساجد ہیں۔ یہآں بھی سحر و افطار میں گویا فضا ازان سے گونج اٹحتی ہے۔۔
البتہ جو شہر اور کالونیاں پلاننگ سے بنائے گئے ہیں وہاں فقط ایک ہی ازان اور ہوٹر کی اواز اتی ہے

یاسر خوامخواہ جاپانی نے لکھا ۔۔۔

بہت دلچسپ تحریر ھے۔
بچپن کا پر سکوں وقت یاد دلا دیا۔

افتخار اجمل بھوپال نے لکھا ۔۔۔

يہ پرانے وقتوں کی باتين ہيں ۔ اب دنيا ترقی کر گئی ہے ۔ لوگ اپنے کس معاملہ ميں کسی دوسرے کی مداخلت برداشت نہيں کرتے ۔ کچھ جو زيادہ ترقی کر گئے ہيں وہ تو اپنے والدين کی مداخلت بھی برداشت نہيں کرتے

کاشف نصیر نے لکھا ۔۔۔

دلچسپ، آج کل کہاں ہوتے ہیں؟

Hyderabadi نے لکھا ۔۔۔

@ Abdullah ، بلاامتیاز ، یاسر خوامخواہ جاپانی
پسندیدگی کیلئے آپ تمام کا شکریہ.

@ افتخار اجمل بھوپال
جی بات تو پرانے وقتوں کی ہی ہے مگر اس خلوص و محبت کی ہے جو آج عنقا ہے. والدین کی مداخلت والی بات سمجھ میں نہیں آئی. ویسے کبھی کبھی یوں بھی ہوتا ہے کہ والدین جدید تکنولوجی سے ناواقفیت کے سبب کوئی غلط مشورہ دے دیں تو وہ ناگوار گزرتا ہے. مگر اسکے باوجود ہماری بچپن کی اسلامی تعلیم نے یہی سکھایا ہے کہ والدین کو ٹوکنے کے بجائے ناگواری کو برداشت کر لیا جائے.

@ کاشف نصیر
شکریہ. رمضان کا آخری دہا اور عید عموماً اپنے وطن حیدرآباد دکن میں گزرتی ہے.

شو ٹائم نے لکھا ۔۔۔

اب تو عید مبارک ہی کہیں گے

سب کو عید کی خوشیاں مبارک ہو
دعاؤں میں یاد رکھیئے گا

تبصرہ میں مسکانوں کے استعمال کیلئے متعلقہ مسکان کا کوڈ کاپی کریں
:));));;):D;):p:((:):(:X=((:-o
:-/:-*:|8-}:)]~x(:-tb-(:-Lx(=))

تبصرہ کیجئے